500ന്റെയും ആയിരത്തിന്റെയും നോട്ടുകള്‍ പിന്‍വലിച്ചുകൊണ്ടുള്ള സുപ്രധാന പ്രഖ്യാപനം പ്രധാനമന്ത്രി നരേന്ദ്ര മോഡി രാജ്യത്തെ അറിയിച്ചു. ഇതിനെ തുടര്‍ന്ന് ഇന്ന് അര്‍ദ്ധരാത്രി മുതല്‍ രണ്ട് ദിവസം എടിഎം കൗണ്ടറുകള്‍ അടച്ചിടും. മറ്റന്നാള്‍ മുതല്‍ മാത്രമേ എടിഎം കൗണ്ടറുകള്‍ പ്രവര്‍ത്തിക്കുകയുള്ളൂ. രാജ്യത്തെ മുഴുവന്‍ എടിഎമ്മുകളും നവംബര്‍ ഒന്‍പത്, പത്ത് എന്നീ തിയതികളില്‍ പ്രവര്‍ത്തിക്കില്ല. അവശ്യ സര്‍വീസ് കണക്കിലെടുത്താണ് ആശുപത്രികളില്‍ 1000ത്തിന്റെയും 500ന്റെയും പഴയനോട്ടുകള്‍ നവംബര്‍ 11ന് വരെയാണ് സ്വീകരിക്കുക.

കള്ളപ്പണം ഇല്ലാത്തവര്‍ക്ക് ഒരു പണവും നഷ്ടമാകില്ല. റെയില്‍വെ ബുക്കിങ്ങിലും മൂന്ന് ദിവസത്തെ ഇളവ് 500, 1000 നോട്ടുകള്‍ക്ക് അനുവദിച്ചിട്ടുണ്ട്. ആയിരത്തിന്റെയും അഞ്ഞൂറിന്റെയും നോട്ടുകള്‍ ഡിസംബര്‍ 30നകം ബാങ്കുകളില്‍ നിന്ന് മാറ്റാന്‍ സാധിക്കാത്തവര്‍ക്ക് 2017 മാര്‍ച്ച് 31വരെ മാറ്റാന്‍ സമയം അനുവദിക്കും. ഇതിന് തിരിച്ചറിയില്‍ കാര്‍ഡ് നല്‍കുകയും വേണമെന്നതാണ് ഇതില്‍ പ്രധാന തീരുമാനം. അതുകൊണ്ട് നേരാംവണ്ണം പണം സമ്പാദിച്ചവരെ സംബന്ധിച്ചിടത്തോളം ഇതൊരു പ്രശ്‌നമായി മാറില്ല.
എന്നാല്‍, കള്ളപ്പണക്കാരുടെ നെഞ്ചത്തടിക്കുന്ന ഈ തീരുമാനം സാധാരണക്കാരെയും വലയ്ക്കുമെന്ന കാര്യം ഉറപ്പാണ്. ഇന്നു അര്‍ദ്ധരാത്രി മുതല്‍ തീരുമാനം പ്രാബല്യത്തില്‍ വരുന്നതോടെ പുതിയതായി ആയിരം നോട്ടുകള്‍ അച്ചടിക്കില്ലെങ്കിലും 500ന്റെയും 2000ത്തിന്റെയും നോട്ടുകള്‍ എളുപ്പത്തില്‍ തന്നെ തിരികെ എത്തും.
രണ്ടായിരത്തിന്റെ പുതിയ നോട്ട് ഉടന്‍ പുറത്തിറക്കാനാണ് സര്‍ക്കാര്‍ ഒരുങ്ങുന്നത്. ഈ 2000 നോട്ടുകള്‍ക്ക് ചില പ്രത്യേകതകള്‍ കൂടിയുണ്ട്. ഈ സാഹചര്യത്തില്‍ കള്ളപ്പണക്കാരെ നേരിടാനുള്ള സര്‍ജിക്കല്‍ സ്‌ട്രൈക്ക് തന്നെയാണ് കേന്ദ്രസര്‍ക്കാറിന്റെ ഭാഗത്തു നിന്നും ഉണ്ടായിരിക്കുന്നത്. പെട്ടന്നുള്ള തീരുമാനം സാധാരണക്കാരെ വലയ്ക്കുമെങ്കിലും ഗ്രാമനഗര വ്യത്യാസമില്ലാതെ ബാങ്കിങ് സൗകര്യങ്ങളുള്ള കേരളത്തെ സാധാരണയായി ബാധിക്കില്ല.