കൊല്ലം, മലപ്പുറം, മൈസൂര്,ചിറ്റൂര് കളക്ട്രേറ്റുകളില് ബോംബ് സ്ഫോടനങ്ങള് നടത്തിയത് അല്ഖായിദ അനുഭാവസംഘടനയായ ബേസ് മൂവ്മെന്റിന്റെ പ്രവര്ത്തകരാണെന്ന് ദേശീയ അന്വേഷണ ഏജന്സി
കൊല്ലം, മലപ്പുറം, മൈസൂര്,ചിറ്റൂര് കളക്ട്രേറ്റുകളില് ബോംബ് സ്ഫോടനങ്ങള് നടത്തിയത് 2015 ജനുവരിയില് രൂപീകരിച്ച അല്ഖായിദ അനുഭാവസംഘടനയായ ബേസ് മൂവ്മെന്റിന്റെ പ്രവര്ത്തകരാണെന്ന് ദേശീയ അന്വേഷണ ഏജന്സി (എന്ഐഎ). മധുരയില് നിന്നും ചെന്നൈയില് നിന്നും അറസ്റ്റിലായ ബേസ് മൂവ്മെന്റ് പ്രവര്ത്തകരെ വിശദമായി ചോദ്യം ചെയ്ത ശേഷമാണ് എന്ഐഎ ഇക്കാര്യം അറിയിച്ചത്. പ്രതികളെ ഇന്ന് ബെംഗളൂരുവിലെ പ്രത്യേക എന്ഐഎ കോടതിയില് ഹാജരാക്കുമെന്നും അന്വേഷണഉദ്യോഗസ്ഥര് വാര്ത്തക്കുറിപ്പില് അറിയിച്ചു.
മധുരയില് നിന്ന് പോലീസ് പിടികൂടിയ അബ്ബാസും ദാവൂദും അല്ഖായിദ ആശയങ്ങളില് ആകൃഷ്ടരായാണ് തീവ്രവാദ പ്രവര്ത്തനങ്ങളിലേക്ക് തിരിഞ്ഞത്.
മധുരയില് ലൈബ്രറി നടത്തുന്ന അബ്ബാസ് പുസ്തകങ്ങളിലൂടേയും ദാവൂദ് ഇന്റെര്നെറ്റിലൂടെയുമാണ് തീവ്രവാദആശയങ്ങളിലേക്ക് അടുക്കുന്നത്. മധുര കേന്ദ്രീകരിച്ചു പ്രവര്ത്തിക്കുന്ന ഇമാം അലിയുടെ ഗുണ്ടാസംഘവുമായി ബന്ധമുണ്ടായിരുന്ന അബ്ബാസും ഷംസുദ്ദീനും അവിടെ നിന്നാണ് ബോംബ് നിര്മ്മാണം പഠിക്കുന്നത്. ജയിലുകളിലേക്കും കളക്ട്രേറ്റുകളിലേക്കും ഭീഷണി കത്തുകള് അയക്കുന്നതായിരുന്നു തുടക്കത്തില് ഇവരുടെ പ്രവര്ത്തനം.
ബേസ് മൂവ്മെന്റ് നടത്തിയ ബോംബ് സ്ഫോടനങ്ങള്ക്ക് പിറകിലെ ബുദ്ധികേന്ദ്രം അബ്ബാസും ദാവൂദുമായിരുന്നു. അബ്ബാസും ഷംസൂദ്ദീനും ചേര്ന്ന് ബോംബുകള് നിര്മ്മിച്ചപ്പോള് സ്ഫോടനസ്ഥലത്ത് ഉപേക്ഷിക്കേണ്ട പെന്െ്രെഡവിലേക്ക് ആവശ്യമായ വിവരങ്ങള് തയ്യാറാക്കിയത് ദാവൂദാണ്.
സ്ഫോടനം നടന്ന സ്ഥലങ്ങളില് കണ്ടെടുത്ത പോസ്റ്ററുകളെല്ലാം മധുരയില് നിന്ന് അറസ്റ്റിലായ സംസംകരീം രാജയുടെ പ്രസ്സിലാണ് അച്ചടിച്ചത്. കരീമും ദാവൂദും ചേര്ന്നാണ് അഞ്ച് ഇടങ്ങളിലും ബോംബുകള് സ്ഥാപിച്ചത്.
പ്രാദേശിക ഗുണ്ടാനേതാവ് കൂടിയായ ഷംസൂദ്ദീന്റെ പേരില് ലോക്കല് പോലീസ് നിരവധി കേസുകള് രജിസ്റ്റര് ചെയ്തിട്ടുണ്ട്. ഗുണ്ടാപിരിവിലൂടെ ഷംസുദ്ദീന് നേടിയ പണവും ആരാധനാലയങ്ങളില് കാരുണ്യപ്രവര്ത്തനങ്ങളുടെ പേരില് അബ്ബാസ് സ്വരൂപിച്ച പണവുമായിരുന്നു ഇവരുടെ പ്രവര്ത്തനങ്ങള്ക്ക് മൂലധനമായത്.
https://www.facebook.com/Malayalivartha
