പ്രധാനമന്ത്രി നരേന്ദ്ര മോഡിയെ വെല്ലുവിളിച്ച് പശ്ചിമബംഗാള്‍ മുഖ്യമന്ത്രി മമതാ ബാനര്‍ജി. മോഡിക്ക് സ്വന്തം അക്കൗണ്ട് വിവരങ്ങള്‍ വെളിപ്പെടുത്താന്‍ ധൈര്യമുണ്ടോയെന്ന് മമത ചോദിച്ചു. ബിജെപി എംഎല്‍എമാരുടെ ബാങ്ക് അക്കൗണ്ട് വിവരങ്ങള്‍ വെളിപ്പെടുത്തണമെന്ന് മോഡി ആവശ്യപ്പെട്ട സാഹചര്യത്തിലാണ് മമതയുടെ വെല്ലുവിളി. നോട്ട് നിരോധനത്തിനെതിരെ ഉത്തര്‍പ്രദേശില്‍ നടന്ന പ്രതിഷേധ പരിപാടികള്‍ക്കിടെയാണ് മമത മോഡിക്കെതിരെ തിരിഞ്ഞത്.

മറ്റുള്ളവര്‍ വിവരങ്ങള്‍ വെളിപ്പെടുത്തുന്നതിന് മുന്‍പേ മോഡിയും ബിജെപി അധ്യക്ഷന്‍ അമിത് ഷായും സ്വന്തം അക്കൗണ്ട് വിവരങ്ങള്‍ വെളിപ്പെടുത്തണം. നോട്ട് പിന്‍വലിക്കല്‍ നിലവില്‍ വരുന്നതിനു മുന്‍പ് തന്നെ
വന്‍ തുകയുടെ നിരവധി വസ്തുവകകള്‍ ബിജെപിയുടെയും അധ്യക്ഷനായ അമിത് ഷായുടെയും പേരിലേക്ക് മാറ്റിയെന്നും മമത ആരോപിച്ചു.

തുഗ്ലക്കിനേയും ഹിറ്റ്‌ലറെയും കടത്തിവെട്ടുകയാണ് മോഡി. സാധാരണ ജനങ്ങളുടെ ഭരണഘടനാപരമായ അവകാശങ്ങളെ കാറ്റില്‍പറത്തുകയാണ് മോഡി ചെയ്തത്. കച്ചവടവും വിപണിയും കൃഷിയുമെല്ലാം തകര്‍ത്ത നോട്ട് നിരോധനം പിന്‍വലിക്കും വരെ സമരം തുടരുമെന്നും മമത വ്യക്തമാക്കി.
കഴിഞ്ഞ ദിവസമാണ് ബിജെപി എംപിമാരും എംഎല്‍എമാരും ബാങ്ക് ഇടപാടുകളുടെ വിശദാംശങ്ങള്‍ നല്‍കണമെന്ന് പ്രധാനമന്ത്രി നരേന്ദ്ര മോഡി ആവശ്യപ്പെട്ടത്.

നോട്ട് അസാധുവാക്കിയ നവംബര്‍ 8 മുതല്‍ ഡിസംബര്‍ 31 വരെയുള്ള ഇടപാടുകളെക്കുറിച്ചുള്ള വിശദാംശങ്ങള്‍ പാര്‍ട്ടി അധ്യക്ഷന്‍ അമിത് ഷായ്ക്കു നല്‍കണമെന്നാണ് നിര്‍ദേശം. ചൊവ്വാഴ്ച്ച രാവിലെ ചേര്‍ന്ന ബിജെപി പാര്‍ലമെന്ററി പാര്‍ട്ടി യോഗത്തിലാണ് നരേന്ദ്ര മോഡി ഇക്കാര്യം ആവശ്യപ്പെട്ടത്.