ചണ്ഡിഗഡിലെ ഫത്തേഗര്‍ സാഹിബിലെ ഗുരുദ്വാരയില്‍ വച്ച് ക്രിക്കറ്റ് താരം യുവരാജ് സിങ് നടിയും മോഡലുമായ ഹസല്‍ കീച്ചിനെ വരണമാല്യം അണിയിക്കും. ക്രിക്കറ്റ് മത്സരങ്ങള്‍ തുടങ്ങുന്ന അതേ ആവേശത്തോടെ തന്നെയാണ് യുവരാജ് സിങ്ങിന്റെ വിവാഹ ആഘോഷങ്ങളും ആരംഭിച്ചത്. പത്തുദിവസം നീണ്ടുനില്‍ക്കുന്ന വിവാഹത്തിന്റെ പേരുപോലും യുവരാജ് ഹസല്‍ പ്രീമിയര്‍ ലീഗ് എന്നാണ്. അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തില്‍ ഇന്നലെ ലളിത് ഹോട്ടലില്‍ സംഗീത രാവും ആഘോഷമായി നടത്തി.

പ്രധാനമന്ത്രി നരേന്ദ്ര മോദിയും ബോളിവുഡ് ക്രിക്കറ്റ് താരങ്ങളും രാഷ്ട്രീയ സാംസ്‌കാരിക മേഖലയില്‍ നിന്നുള്ളവരും വിവാഹത്തിന് എത്തുമെന്നാണു പ്രതീക്ഷിക്കുന്നത്. എന്നാല്‍ യുവരാജിന്റെ അച്ഛന്‍ യോഗ്‌രാജ് സിങ് വിവാഹത്തില്‍ നിന്നു വിട്ടുനില്‍ക്കുമെന്ന് നേരത്തെ അറിയിച്ചിരുന്നു.

മതപരമായ ആചാരങ്ങള്‍ക്കനുസരിച്ചു നടത്തുന്നതിനാലാണ് താന്‍ വിവാഹത്തില്‍ പങ്കെടുക്കാത്തതെന്നാണ് അദ്ദേഹം പറഞ്ഞത്.''എന്റെ മകന്റെ വിവാഹ ആഘോഷത്തില്‍ നിന്നു വിട്ടുനില്‍ക്കാനുള്ള തീരുമാനം നിര്‍ഭാഗ്യകരം തന്നെയാണ്. ഏതെങ്കിലും മതപരമായ ഗുരുക്കന്മാരുടെ സാന്നിധ്യത്തിലാണു വിവാഹമെങ്കില്‍ താന്‍ പങ്കെടുക്കില്ലെന്ന് യുവരാജിന്റെ അമ്മയെ അറിയിച്ചിട്ടുണ്ട്. അതാണു വിധി, ഞാന്‍ പോകില്ല. ഞാന്‍ ദൈവത്തില്‍ മാത്രമേ വിശ്വസിക്കുന്നുള്ളു അല്ലാതെ മതപുരോഹിതന്മാരില്‍ എനിക്കു വിശ്വാസമില്ല''.

സിഖ് ആചാരം പ്രകാരം നടക്കുന്ന വിവാഹത്തിനു പുറമെ ഹിന്ദു ആചാരപ്രകാരവും വിവാഹ ആഘോഷങ്ങള്‍ സംഘടിപ്പിക്കുന്നുണ്ട്. ഡിസംബര്‍ രണ്ടിന് ഗോവയിലെ ഫാംഹൗസില്‍ വച്ചാണ് ഇരുവരും ഹിന്ദു ആചാരപ്രകാരം വിവാഹിതരാകുന്നത്. ഡിസംബര്‍ ഏഴിന് ഡല്‍ഹിയില്‍വച്ചു വിവാഹവിരുന്നോടെ ആഘോഷങ്ങള്‍ സമാപിക്കും.