സഹോദരന്റെ പ്രണയം സഹോദരി മതാപിതാക്കളെ അറിയിച്ചു, തുടര്‍ന്ന് നടന്നത് ക്രൂരമായ കൊലപാതകം. ദളിത് യുവതിയുമായുള്ള പ്രണയത്തെ എതിര്‍ത്ത കുടുംബാംഗങ്ങളെയെല്ലാം യുവാവ് കൊലപ്പെടുത്തുകയായിരുന്നു.
വെല്ലൂരിലാണ് ഞെട്ടിക്കുന്ന കൊലപാതകം അരങ്ങേറിയത്. വൈദ്യുതി ബോര്‍ഡ് ജീവനക്കാരനായ മോഹന്‍, ഭാര്യ രാജേശ്വരി, മകള്‍ സുകന്യ എന്നിവരെ മോഹനന്റെ മകന്‍ തമിഴരശന്‍ (25) കൊലപ്പെടുത്തി. ദളിത് യുവതിയുമായുള്ള പ്രണയത്തെ ചൊല്ലി വീട്ടിലുണ്ടായ വഴക്കാണ് ക്രൂരമായ കൊലപാതകങ്ങള്‍ക്ക് പ്രേരിപ്പിച്ചതെന്ന് യുവാവ് പിന്നീട് പോലീസിനോട് കുറ്റസമ്മതം നടത്തി.

സഹോദരി സുകന്യയാണ് മാതാപിതാക്കളെ പ്രണയത്തെക്കുറിച്ച് അറിയിച്ചത്. ഇതോടെ തമിഴരശന്‍ കുടുംബത്തില്‍നിന്ന് ഒറ്റപ്പെട്ടു.
ഇയാള്‍ അച്ഛനോട് രണ്ടുലക്ഷംരൂപ കടം വാങ്ങിയിരുന്നു. മോഹനന്‍ പണം ആവശ്യപ്പെട്ട് തമിഴരശനുമായി തര്‍ക്കത്തിലേര്‍പ്പെട്ടു. സുകന്യയെ തന്റെ പിന്തുടര്‍ച്ചാവകാശിയായി പ്രഖ്യാപിക്കുമെന്നും എല്ലാ സ്വത്തുക്കളും എഴുതിക്കൊടുക്കുമെന്നും ഭീഷണിപ്പെടുത്തി.

ക്ഷുഭിതനായ തമിഴരശന്‍ കുടുംബാംഗങ്ങളെ കൊലപ്പെടുത്താന്‍ തീരുമാനിക്കുകയായിരുന്നു. ഞായറാഴ്ച രാത്രി ആദ്യം സഹോദരിയെയും പിന്നീട് അമ്മയെയും കഴുത്തറുത്ത് കൊന്നു. സഹോദരിയുടെ മുഖം കല്ലുപയോഗിച്ച് ഇടിച്ച് വികൃതമാക്കി. പിന്നീട് നൈറ്റ് ഡ്യൂട്ടി കഴിഞ്ഞുവരുന്ന അച്ഛനെ കാത്ത് മൃതദേഹങ്ങള്‍ക്കുസമീപം പുലര്‍ച്ചെ ആറുമണിവരെ ഇരുന്നു. മോഹനന്‍ എത്തിയയുടനെ ആക്രമിച്ചുവീഴ്ത്തി കത്തി ഉപയോഗിച്ച് കഴുത്തറുത്തു. എന്നാല്‍, മോഹനന്‍ നടത്തിയ പ്രതിരോധത്തില്‍ തമിഴരശനും ഗുരുതരമായി പരിക്കേറ്റു. ഇയാള്‍ ആശുപത്രിയില്‍ ചികിത്സയിലാണ്.