ഇന്ത്യയുടെ മിന്നലാക്രമണത്തിനുശേഷം നിയന്ത്രണരേഖയിലെ സംഘര്‍ഷത്തില്‍ ബിഎസ്എഫ് 15 പാക്ക് പട്ടാളക്കാരെ വധിച്ചിട്ടുണ്ടെന്ന് ബിഎസ്എഫ് ഡയറക്ടര്‍ ജനറല്‍ കെ.കെ. ശര്‍മ അറിയിച്ചു. നുഴഞ്ഞു കയറാന്‍ ശ്രമിച്ച 10 ഭീകരരെയും വധിച്ചു. ഇന്ത്യന്‍ തിരിച്ചടിയില്‍ നിരവധി പാക്ക് സൈനിക പോസ്റ്റുകള്‍ തകര്‍ത്തുവെന്നും ബിഎസ്എഫ് മേധാവി അറിയിച്ചു.

സാംബയില്‍ കൊല്ലപ്പെട്ട മൂന്നു ഭീകരരും രാജ്യാന്തര അതിര്‍ത്തിയില്‍ നുഴഞ്ഞുകയറിയത് 80 മീറ്റര്‍ നീളത്തില്‍ കൃഷിയിടത്തിന് അടിയിലൂടെ നിര്‍മിച്ച തുരങ്കത്തിലൂടെയെന്നു ബിഎസ്എഫ് മേധാവി കെ.കെ.ശര്‍മ പറഞ്ഞു. ഭീകരരരുമായുള്ള ഏറ്റുമുട്ടലിനുശേഷം നടത്തിയ പരിശോധനയില്‍ അതിര്‍ത്തിവേലി പൊളിച്ചുകടന്നതിന്റെ തെളിവു ലഭിച്ചില്ല.

ഇന്നലെ രാവിലെയാണ് അതിര്‍ത്തിയില്‍ തുരങ്കം കണ്ടെത്തിയതെന്നും ബിഎസ്എഫ് മേധാവി പറഞ്ഞു. വിളവിറക്കിയ കൃഷിസ്ഥലത്താണു തുരങ്കം. രാജ്യാന്തര അതിര്‍ത്തിയില്‍നിന്ന് 75-80 മീറ്റര്‍ അകലെയാണിത്. അതിര്‍ത്തിവേലിയില്‍നിന്നു 35-40 മീറ്റര്‍ അകലെയും. തുരങ്കത്തിലൂടെ ഇഴഞ്ഞാണു ഭീകരര്‍ എത്തിയതെന്നതിനു തെളിവുണ്ടെന്നു ബിഎസ്എഫ് മേധാവി പറഞ്ഞു.

മേഖലയില്‍ ഒളിച്ചിരിപ്പുണ്ടെന്നു കരുതുന്ന ഭീകരരെ കണ്ടെത്താന്‍ സൈന്യം വ്യാപകമായ തിരച്ചില്‍ തുടരുന്നു. കോര്‍ ആസ്ഥാനത്തുനിന്നു മൂന്നു കിലോമീറ്റര്‍ അകലെ ആര്‍മി യൂണിറ്റില്‍ ചൊവ്വാഴ്ച പുലര്‍ച്ചെയുണ്ടായ ഭീകരാക്രമണത്തില്‍ രണ്ട് ഓഫിസര്‍മാര്‍ അടക്കം ഏഴു സൈനികരാണു വീരമ്യത്യു വരിച്ചത്.