അര്ഹതപ്പെട്ട സര്ക്കാര് ആനുകൂല്യങ്ങള് ലഭിക്കുന്നതിന് ആധാര് നിര്ബന്ധമല്ലെന്ന് കേന്ദ്രസര്ക്കാര്
സര്ക്കാരില്നിന്നു അര്ഹതപ്പെട്ട ആനുകൂല്യം ലഭിക്കുന്നതിന് ആധാര് കാര്ഡ് നിര്ബന്ധമല്ലെന്ന് കേന്ദ്രസര്ക്കാര് വ്യക്തമാക്കി.
സബ്സിഡി ഉള്പ്പെടെയുള്ള തുകകള് ലഭിക്കുന്നതിന് ആധാര് കാര്ഡില്ലെങ്കില് മറ്റേതെങ്കിലും തിരിച്ചറിയല് രേഖ ഹാജരാക്കിയാല് മതിയാകും. ഇതു സംബന്ധിച്ച സുപ്രീംകോടതി ഉത്തരവ് കണക്കിലെടുത്താണ് ഈ വിശദീകരണമെന്ന് ഐടി ആന്റ് ഇലക്ട്രോണിക്സ് സഹമന്ത്രി പി.പി ചൗധരി ലോക്സഭയില് പറഞ്ഞു.
2015 ഒക്ടോബര് 15ന് ആണു സുപ്രീംകോടതി ഇതു സംബന്ധിച്ച ഉത്തരവു പുറപ്പെടുവിച്ചത്. പൊതുജനങ്ങള്ക്ക് സര്ക്കാര് ആനുകൂല്യങ്ങള് ലഭിക്കാന് ആധാര് കാര്ഡ് നിര്ബന്ധമല്ലെന്ന് സുപ്രീംകോടതി ഉത്തരവ് പുറപ്പെടുവിച്ചിരുന്നു. സബ്സിഡിയടക്കം ഒരു ആനുകൂല്യത്തിനും ആധാര് നിര്ബന്ധമാക്കരുതെന്ന് കോടതി നിര്ദേശിച്ചു.
കേന്ദ്രസര്ക്കാര്, യു.ഐ.എ.ഡി, എണ്ണക്കമ്പനികളായ എച്ച്.പി.സി.എല്, ഐ.ഒ.സി, ബി.പി.സി.എല് എന്നിവര് ആനുകൂല്യങ്ങള് ജനങ്ങള്ക്ക് ലഭ്യമാക്കാന് ആധാര് കാര്ഡ് നിര്ബന്ധമാക്കണമെന്നാവശ്യപ്പെട്ട് കോടതിയെ സമീപിച്ചിരുന്നു. ഈ വിഷയത്തിലായിരുന്നു കോടതി നിര്ദേശം.
ആനുകൂല്യങ്ങള് ലഭിക്കാന് ആധാര് നിര്ബന്ധമില്ലെന്ന് കാണിച്ച് സംസ്ഥാനങ്ങള്ക്ക് കത്തയക്കണമെന്നും കോടതി കേന്ദ്രസര്ക്കാരിന് നിര്ദേശം നല്കിയിരുന്നു.
എല്ലാ സേവനങ്ങളെയും ആധാര്വഴി ബന്ധിപ്പിക്കാനുള്ള നടപടികളുമായി കേന്ദ്രസര്ക്കാര് മുന്നോട്ടുപോകുന്നതിനിടെയായിരുന്നു സുപ്രീംകോടതി ഉത്തരവ്. കഴിഞ്ഞ യു.പി.എ സര്ക്കാര് ആവിഷ്കരിച്ച ആധാര്പദ്ധതി ജനങ്ങളുടെ സ്വകാര്യതയിലേക്കുള്ള കടന്നുകയറ്റമായി മാറുമെന്നതിനാല് ഇത് നടപ്പാക്കരുതെന്ന് വിവിധ കോണുകളില്നിന്ന് ആവശ്യമുയര്ന്നിരുന്നു.
എന്നാല്, ബി.ജെ.പി സര്ക്കാരും ആനുകൂല്യങ്ങള്ക്ക് ആധാര് നിര്ബന്ധമാക്കാനുള്ള നീക്കങ്ങളാണ് നടത്തിയത്. പാചകവാതക സബ്സിഡി ആധാര് മുഖേന ബാങ്ക് അക്കൗണ്ടുമായി ബന്ധിപ്പിച്ച് നല്കുന്ന പദ്ധതി ആരംഭിച്ചിരുന്നു.
https://www.facebook.com/Malayalivartha
