ഐക്യരാഷ്ട്രസഭയില്‍ വാര്‍ത്താവിനിമയവും പബ്ലിക് ഇന്‍ഫര്‍മേഷനും കൈകാര്യം ചെയ്യുന്ന അണ്ടര്‍ സെക്രട്ടറി ജനറല്‍ ആയി പ്രവര്‍ത്തിച്ചിരുന്ന ശശി തരൂര്‍ കോണ്‍ഗ്രസ് രാഷ്ട്രീയത്തിലൂടെ തിരുവനന്തപുരത്ത് മത്സരത്തിനെത്തി കേന്ദ്ര മന്ത്രിയായി. ഇതിനിടെ ഐപിഎല്‍ വിവാദമെത്തി. പിന്നെ സുനന്ദാ പുഷ്‌കറിനെ ഭാര്യയാക്കി. മൂന്നാം വിവാഹമായിരുന്നു അത്.

ആഘോഷത്തോടെ ഈ കല്ല്യാണത്തെ മലയാളികള്‍ ഏറ്റെടുത്തു. പിന്നെ നടന്നതെല്ലാം നാടകീയ മുഹൂര്‍ത്തങ്ങള്‍. പുഷ്‌കറിന്റെ മരണം കൊലപാതകമെന്ന് ആരോപണത്തിലെത്തിച്ചു. ഇതെല്ലാം അതിജീവിച്ച തരൂര്‍ വീണ്ടും പാര്‍ലമെന്റ് തെരഞ്ഞെടുപ്പില്‍ ജയിച്ചു.

അവസാനമായി ശശി തരൂര്‍ എംപിക്ക് പുതിയ കാമുകിയെ ലഭിച്ചോ എന്നതാണ് ഉയരുന്ന അഭ്യൂഹം. ജയ്പൂര്‍ സ്വദേശിനിയായ സുന്ദരിയായ യുവതിയുമായി തരൂര്‍ അടുപ്പത്തിലാണെന്നാണ് ടൈംസ് ഓഫ് ഇന്ത്യ അടക്കമുള്ള ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നത്. സുനന്ദാ പുഷ്‌കര്‍ വിവാദവുമായി ബന്ധപ്പെട്ട് ടൈംസ് ഓഫ് ഇന്ത്യയും തരൂരുമായി പ്രശ്‌നങ്ങള്‍ ഏറെയുണ്ട്. പക്ഷേ ഈ വാര്‍ത്ത മറ്റ് മാദ്ധ്യമങ്ങളും ഏറ്റെടുക്കുന്നു. ശശി തരൂര്‍ നാലാം വിവാഹത്തിന് തയ്യാറെടുക്കുന്നതായാണ് അഭ്യൂഹം. ജയ്പൂര്‍ രാജകുടുംബാംഗമാണ് യുവതിയെന്നും ഇരുവരും പല സ്ഥലങ്ങളിലും ഒന്നിച്ചുകണ്ടുവെന്നും മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു.

തരൂരിന്റെ ഒപ്പം കാണപ്പെട്ടത് ജയ്പൂര്‍ രാജകുടുംബത്തിലെ അനന്തരാവകാശിയും രാജസ്ഥാന്‍ ബിജെപി എംഎല്‍എ കൂടിയായ ദിയാ കുമാരിയാണെന്നാണ് മറ്റു ചില മാദ്ധ്യമങ്ങള്‍ പറയുന്നത്. കഴിഞ്ഞ ജയ്പൂര്‍ സാഹിത്യോത്സവത്തിലും ഇരുവരും ഒന്നിച്ചാണു പങ്കെടുത്തത്. ഇതാണ് അഭ്യൂഹം വളരാന്‍ കാരണം. ഇതിനോടൊന്നും ആരും പ്രതികരിക്കുന്നുമില്ല. നിശബ്ദതയെ സമ്മതമായി ചിത്രീകരിക്കുകയും ചെയ്യുന്നു.

ശശി തരൂരിന് രണ്ട് ആണ്‍ മക്കളുണ്ട്. ആദ്യ ഭാര്യയിലുള്ള ഇരട്ട മക്കളാണ് അവര്‍. ഇതില്‍ ആദ്യത്തെ മകന്റെ വിവാഹം കഴിഞ്ഞു. രണ്ടാമത്തെ മകന്റെ വിവാഹ നിശ്ചയവുമായുവുമായി. ഇതിനിടെയിലാണ് അടുത്ത കല്ല്യാണത്തിന് തരൂര്‍ തയ്യാറെടുക്കുന്നതായുള്ള വാര്‍ത്തകളെത്തുന്നത്. തരൂരിന്റെ മൂന്നാംഭാര്യയായിരുന്ന സുനന്ദ പുഷ്‌കര്‍ 2014 ജനുവരിയിലാണ് മരിച്ചത്. ഡല്‍ഹിയിലെ പഞ്ചനക്ഷത്ര ഹോട്ടലില്‍ ഇവരെ മരിച്ചനിലയില്‍ കണ്ടെത്തുകയായിരുന്നു.

തരൂരിനൊപ്പം കാണപ്പെട്ടത് ജയ്പൂര്‍ രാജകുമാരിയായ ദിയാകുമാരിയാണെന്നാണ് റിപ്പോര്‍ട്ടുകള്‍. ദിയാകുമാരി രാജസ്ഥാന്‍ നിയമസഭയിലെ ബിജെപി അംഗമാണ്. സവായി മധോപുരില്‍നിന്നാണ് ദിയ നിയമസഭയിലെത്തിയത്. ജയ്പൂര്‍ മഹാരാജാ സവായി ഭവാനി സിംഗിന്റെയും പത്മിനി ദേവിയുടെയും മകളും ജയ്പൂര്‍ രാജ്മാതയും സൗന്ദര്യറാണിയുമായ മഹാറാണി ഗായത്രിദേവിയുടെ പേരക്കുട്ടിയുമാണ്. മലയാളി ക്രിക്കറ്റര്‍ ശ്രീശാന്തിന്റെ ഭാര്യവീട്ടുകാരുമായി ഇവര്‍ക്ക് ബന്ധവുമുണ്ടെന്ന സൂചനയുമുണ്ട്.
ന്യൂയോര്‍ക്ക് സര്‍വകലാശാലയിലെ ഹ്യൂമാനിറ്റീസ് അദ്ധ്യാപികയായ തിലോത്തമ മുഖര്‍ജിയായിരുന്നു തരൂരിന്റെ ആദ്യഭാര്യ. മാദ്ധ്യമപ്രവര്‍ത്തകരായ കനിഷ്‌ക്, ഇഷാന്‍ എന്നീ രണ്ടു മക്കള്‍ ഈ ബന്ധത്തിലുണ്ട്. യുഎന്നിലെ കനേഡിയന്‍ നയതന്ത്രജ്ഞ ക്രിസ്റ്റ് ഗില്‍സായിരുന്നു രണ്ടാം ഭാര്യ. ഇവരുമായുള്ള ബന്ധം പിരിഞ്ഞശേഷമാണ് 2010 ഓഗസ്റ്റ് 22 ന് കശ്മീര്‍ സ്വദേശിയായ സുനന്ദ പുഷ്‌കറിനെ വിവാഹംചെയ്തത്. സുനന്ദയുടെ മരണം തരൂരിന് ഏറെ പ്രശ്‌നങ്ങള്‍ സൃഷ്ടിച്ചിരുന്നു. അതിനിടെയാണ് പുതിയ വാര്‍ത്തകളെത്തുന്നത്.

എഴുത്തുകാരനും പത്രപ്രവര്‍ത്തകനും കൂടിയായ തരൂര്‍ ബിജെപി ക്യാമ്ബിലേക്ക് മാറുമെന്ന് അഭ്യൂഹങ്ങളുണ്ട്. അതിനിടെയാണ് ബിജെപിയുമായി അടുപ്പമുള്ള രാജ കുടുംബത്തില്‍ നിന്നും തരൂര്‍ കാമുകിയെ കണ്ടെത്തിയതായുള്ള വാര്‍ത്തകള്‍ പ്രചരിക്കുന്നത്.