രാജ്യത്ത് ഉയര്‍ന്ന മൂല്യമള്ള നോട്ടുകള്‍ പിന്‍വലിച്ചതിനാല്‍ അസാധു നോട്ടുകള്‍ മാറ്റിവാങ്ങാനുള്ള കാലയളവിനുള്ളില്‍ പത്ത് ശതമാനം നോട്ടുകള്‍ തിരികെ എത്തില്ലെന്ന് കേന്ദ്രസര്‍ക്കാര്‍. നേരത്തേ ഇതിന്റെ ഇരട്ടി നോട്ടുകളെങ്കിലും തിരിച്ചെത്തില്ലെന്നാണ് സര്‍ക്കാര്‍ കണക്കുകൂട്ടിയിരുന്നത്.

ഇതുവരെ 9.85 ലക്ഷം കോടിയുടെ നോട്ടുകള്‍ തിരിച്ചെത്തിയ സാഹചര്യത്തിലാണ് സര്‍ക്കാര്‍ നിന്ന് പുതിയ വിവരം പുറത്തുവന്നിരിക്കുന്നത്. രാജ്യത്ത് മൂന്നു ലക്ഷം കോടിയിലേറെ കള്ളപ്പണമുണ്ടെന്നും നോട്ട് പിന്‍വലിക്കലിലൂടെ ഈ തുക തിരിച്ചെത്തില്ലെന്നുമാണ് കേന്ദ്ര സര്‍ക്കാര്‍ കണക്കാക്കിയിരുന്നത്.

തിരികെയെത്താത്ത നോട്ടുകള്‍ രാജ്യത്തിന് ഗുണകരമാകുമെന്നും റിസര്‍വ് ബാങ്കിന്റെ ബാധ്യതയില്‍ വലിയൊരു ശതമാനം കുറവുണ്ടാകുമെന്നുമാണ് സര്‍ക്കാര്‍ പറഞ്ഞിരുന്നത്. എന്നാല്‍ നോട്ട് പിന്‍വലിച്ച് ഒരു മാസത്തിനകം തന്നെ 65 ശതമാനത്തിലേറെ തുക തിരിച്ചെത്തിക്കഴിഞ്ഞു. ആകെ 14.6 ലക്ഷം കോടിയുടെ നോട്ടുകളാണ് സര്‍ക്കാര്‍ അസാധുവാക്കിയിരുന്നത്.

നോട്ട് മാറ്റിവാങ്ങാന്‍ ഇനിയും ആഴ്ചകള്‍ ശേഷിക്കേ, സര്‍ക്കാര്‍ പ്രതീക്ഷിച്ചതിനേക്കാള്‍ കൂടുതല്‍ തുക തിരിച്ചെത്തുമെന്ന് ഉറപ്പായിട്ടുണ്ട്. നോട്ട് മാറ്റുന്നതിന്റെ മറവില്‍ കള്ളപ്പണം വെളുപ്പിച്ചിട്ടുണ്ടെന്ന സംശയവും ഇതോടെ ഉയരുന്നുണ്ട്. നടപടിയില്‍ സര്‍ക്കാരിന്റെ പ്രധാന ലക്ഷ്യത്തിനു തന്നെ തിരിച്ചടിയാണിത്.

അതേസമയം, അക്കൗണ്ടുകളില്‍ പണം നിക്ഷേപിച്ചതുകൊണ്ട് മാത്രം കള്ളപ്പണം വെളുപ്പിക്കാനാകില്ലെന്ന പ്രസ്താവനയുമായി ധനമന്ത്രി അരുണ്‍ ജെയ്റ്റ്‌ലി രംഗത്തെത്തി. ആദായനികുതി വകുപ്പ് നിക്ഷേപങ്ങളില്‍ നിരീക്ഷണം നടത്തിവരികയാണെന്നും വെളിപ്പെടുത്താത്ത വരുമാനത്തില്‍ നിന്നുള്ള തുക പിടികൂടുമെന്നും ജെയ്റ്റ്‌ലി വ്യക്തമാക്കി.