പ്രകൃതിവാദികള് കാര് ഉപേക്ഷിച്ച് സൈക്കിള് ഓടിക്കണമെന്ന് മനോഹര് പരീക്കര്
പരിസ്ഥിതി സംരക്ഷണം ചൂണ്ടിക്കാണിച്ച് വികസന പ്രവര്ത്തനങ്ങള്ക്കെതിരെ പ്രതികരിക്കുന്നവര് കാര് യാത്ര നിര്ത്തി സൈക്കിള് ഓടിക്കണമെന്ന് കേന്ദ്ര പ്രതിരോധ മന്ത്രി മനോഹര് പരീക്കര്.
പ്രകൃതിയെ നശിപ്പിക്കരുതെന്നാണ് അവര് പറയുന്നത്. എങ്കില് കാറുകള് വാങ്ങരുത്. അതാണ് ലളിതമായ പ്രശ്നപരിഹാരം. പ്രകൃതി സ്വയമേ സംരക്ഷിക്കപ്പെടും. സൈക്കിള് ഉപയോഗിക്കൂ മനോഹര് പരീക്കര് വ്യക്തമാക്കി. ഗോവയിലെ പനാജിയില് നിന്നും 25 കിലോമീറ്റര് അകലെ ബിചോളിം മണ്ഡലത്തില് നടന്ന തെരഞ്ഞെടുപ്പ് റാലിയില് സംസാരിക്കുകയായിരുന്നു പരീക്കര്. രാഷ്ട്രീയ സ്ഥിരതയാണ് ബിജെപി ഗോവയ്ക്ക് നല്കിയിരിക്കുന്ന പരമപ്രധാനമായ കാര്യം.
അതിനാല് സംസ്ഥാനത്ത് സമൃദ്ധിയുണ്ടായി. അതുകാരണം നിരവധി എതിര്പ്പുകള് ഉയര്ന്നിട്ടും പദ്ധതികള് പൂര്ത്തിയാക്കാന് സര്ക്കാരിന് കഴിഞ്ഞു. ഗോവയില് എന്തിനെതിരേയും പ്രതിഷേധം ഉയരുന്നത് കാണാം. മുഖ്യമന്ത്രി ആയിരുന്ന സമയത്ത് മണ്ഡോവി നദിയ്ക്ക് മുകളിലൂടെയുള്ള മൂന്നാമത്തെ പാലത്തിന് അനുമതി ലഭിക്കാന് തനിക്ക് ഹൈക്കോടതിയെ സമീപിക്കേണ്ടി വന്നുവെന്നും പരീക്കര് പറഞ്ഞു.
സ്വീഡനില്, പ്രധാനമന്ത്രി പോലും സൈക്കിള് ആണ് ഉപയോഗിക്കുന്നത്. നമ്മളും സൈക്കിള് ഉപയോഗിക്കാന് തുടങ്ങണം. സ്വീഡന് കാഷ്ലെസ് സമൂഹവുമാണ്. പണരഹിത സമൂഹത്തിന് മികച്ച ഇടമാണ് ഗോവ. പണമില്ലെന്നല്ല കാഷ്ലെസ് എന്നതുകൊണ്ട് അര്ത്ഥമാക്കുന്നത്. കുറച്ചുപണമുള്ള സമൂഹം എന്നാണ് അതിനര്ത്ഥം. ആവശ്യമില്ലാത്ത ഇടത്തെല്ലാം നാം പണം ചെലവാക്കുന്നു. കാര്ഡുകള് മുഖേനയോ മൊബൈല് മുഖേനയോ നമുക്ക് വിനിമയം നടത്താവുന്നതാണെന്നും പരീക്കര് ചൂണ്ടിക്കാട്ടി.
https://www.facebook.com/Malayalivartha
