സുരക്ഷാസൈനികര് സോഷ്യല് മീഡിയയില് ചിത്രങ്ങള് പോസ്റ്റ് ചെയ്താല് നിയമനടപടി
സുരക്ഷാഭടന്മാര് നവമാധ്യമം ഉപയോഗിക്കുന്നതില് കേന്ദ്ര സര്ക്കാര് കൂടുതല് നിയന്ത്രണം കൊണ്ടുവന്നു. കേന്ദ്ര സേനകളുടെ പ്രവര്ത്തനങ്ങളും രഹസ്യമായി സൂക്ഷിക്കേണ്ട വിവരങ്ങളും പ്രസിദ്ധീകരിച്ചാല് കടുത്ത നിയമനടപടി സ്വീകരിക്കും. ഇതിനായി മൂന്നുപേജുള്ള പുതിയ മാര്ഗനിര്ദേശങ്ങള് കേന്ദ്ര ആഭ്യന്തരമന്ത്രാലയം പുറത്തിറക്കി. അര്ധസൈനിക വിഭാഗങ്ങളിലെ ഭടന്മാര് സൈനികനീക്കങ്ങളും ആക്രമണങ്ങളുമായി ബന്ധപ്പെട്ട ചിത്രങ്ങളും സ്മാര്ട് ഫോണില് പകര്ത്തി സമൂഹമാധ്യമങ്ങളില് പോസ്റ്റ് ചെയ്യുന്നത് നിയന്ത്രിക്കാനാണ് പുതിയ നിയമം. ഇതനുസരിച്ച് ഔദ്യോഗിക ആവശ്യത്തിനെടുക്കുന്ന ചിത്രങ്ങള്, വിഡിയോ തുടങ്ങിയവ സമൂഹമാധ്യമത്തിലൂടെ പ്രചരിപ്പിക്കുന്നവര്ക്കെതിരെ നിയമനടപടികള് സ്വീകരിക്കും.
75 ശതമാനം സുരക്ഷാഭടന്മാരും ഫോട്ടോ എടുക്കാന് കഴിയുന്ന ഫോണുകള് ഉപയോഗിക്കുന്നു എന്നാണ് കണക്ക്. ഏറ്റുമുട്ടലുകളോ ഭീകരാക്രമണങ്ങളോ നടന്നാല് സേന ഔദ്യോഗികമായി നിയോഗിച്ചവര് ചിത്രങ്ങള് എടുക്കണം. ഏതെങ്കിലും കാരണവശാല് ഔദ്യോഗികമായി നിയോഗിച്ചവരെ കിട്ടിയില്ലെങ്കില് സുരക്ഷാഭടന്മാര്ക്ക് സ്മാര്ട് ഫോണില് ചിത്രമെടുക്കാം. എന്നാല് ഉടന്തന്നെ ഈ ഫോണ് മേലുദ്യോഗസ്ഥനെ ഏല്പിക്കണം.
ഫോണ് തിരിച്ചേല്പിക്കുമ്പോള് ഈ ദൃശ്യങ്ങള് ഇല്ലെന്ന് മേലുദ്യോഗസ്ഥന് ഉറപ്പുവരുത്തണം. അതേസമയം ഏതൊക്കെ ചിത്രങ്ങള് പുറത്തുവിടാം, എന്തൊക്കെ പാടില്ല എന്ന കാര്യങ്ങള് പുതിയ നിയമത്തില് വ്യക്തമാക്കുന്നില്ല. ഇക്കാര്യം അതത് സുരക്ഷാ ഏജന്സികളുടെ ഡയറക്ടര് ജനറലിന് തീരുമാനിക്കാമെന്നാണ് വിശദീകരണം. എന്നാല് സുരക്ഷാസേന നടത്തുന്ന പല സൈനികനീക്കങ്ങളിലും സംസ്ഥാന പൊലീസും പട്ടാളവും പങ്കെടുക്കാറുണ്ടെന്നും അവര് വഴി തുടര്ന്നും ഫോട്ടോകള് ചോരാന് സാധ്യതയുണ്ടെന്നും ഒരുവിഭാഗം ചൂണ്ടിക്കാട്ടുന്നു.
https://www.facebook.com/Malayalivartha
