അസാധുവാക്കിയ നോട്ടുകള് ഇനി ബാങ്കില് നിക്ഷേപിക്കുന്നതിന് കര്ശന നിയന്ത്രണം: നിക്ഷേപിക്കാവുന്നത് 5000 രൂപ മാത്രം
അസാധുവാക്കിയ നോട്ടുകള് ബാങ്കില് നിക്ഷേപിക്കുന്നതിന് കേന്ദ്ര സര്ക്കാര് കര്ശന നിയന്ത്രണങ്ങളേര്പ്പെടുത്തി . ഡിസംബര് 30 വരെ 5000 രൂപയില് കൂടുതലുള്ള പഴയ 500, 1000 രൂപ നോട്ടുകള് ഒരുതവണ മാത്രമേ ബാങ്കില് നിക്ഷേപിക്കാനാകൂ. ബാങ്ക് അക്കൗണ്ടുകളിലൂടെ കള്ളപ്പണം വെളുപ്പിക്കുന്നതായി കണ്ടെത്തിയതോടെയാണ് പഴയ നോട്ടുകളുടെ നിക്ഷേപത്തില് കടുത്ത നിയന്ത്രണങ്ങള് ഏര്പ്പെടുത്തിയതെന്നാണ് ധനമന്ത്രാലയം വിശദീകരിക്കുന്നത്.
ഡിസംബര് 30നു ശേഷം അസാധുവാക്കിയ 500 രൂപ, 1000 രൂപ നോട്ടുകള് ബാങ്കില് നിക്ഷേപിക്കാന് കഴിയില്ല. റിസര്വ് ബാങ്ക് ശാഖകളിലേ ഇനി അടയ്ക്കാനാകൂ. 5000 രൂപയ്ക്കു മുകളില് വിവിധ തവണകളായി പഴയ നോട്ടുകള് നിക്ഷേപിച്ചാലും കര്ശന പരിശോധനകള്ക്കു വിധേയമാക്കും.
അയ്യായിരം രൂപയിലധികമുള്ള പഴയ നോട്ടുകള് നിക്ഷേപിക്കാനെത്തുന്നവര് ഇതു വരെ പണം നിക്ഷേപിക്കാതിരുന്നതിനുള്ള കാരണം ബാങ്ക് ഉദ്യോഗസ്ഥരോടു വ്യക്തമാക്കണം. നിക്ഷേപം സംബന്ധിച്ചു രണ്ട് ബാങ്ക് ഉദ്യോഗസ്ഥര് നിക്ഷേപകരെ ചോദ്യം ചെയ്യും. നിക്ഷേപകരുടെ വിശദീകരണം റിക്കാര്ഡ് ചെയ്യും. വിശദീകരണം തൃപ്തികരമാണെങ്കില് മാത്രമേ ബാങ്കില് പണം സ്വീകരിക്കൂ. വിശദീകരണത്തില് സംശയം തോന്നിയാല് തുടര്ന്നു വിശദമായ പരിശോധനകള്ക്കു വിധേയമാക്കാമെന്നും ധനകാര്യ മന്ത്രാലയം പുറത്തിറക്കിയ ഉത്തരവില് വ്യക്തമാക്കുന്നു. ഇതിനുശേഷം പണത്തിന്റെ സ്രോതസ് സംബന്ധിച്ച് വിശദമായ പരിശോധനയും നടത്തും.
സ്വകാര്യ, പൊതുമേഖല, സഹകരണ ബാങ്കുകള്ക്ക് ഈ ഉത്തരവ് ബാധകമാണ്. കെവൈസി മാനദണ്ഡങ്ങള് പാലിച്ചിട്ടുള്ള അക്കൗണ്ടില് മാത്രമേ ഡിസംബര് 30 വരെ പഴയ നോട്ടുകള് നിക്ഷേിക്കാനാകൂ.
പഴയ നോട്ടുകള് നിക്ഷേപിക്കാനുള്ള അവസാന തീയതി ഡിസംബര് 30ന് അവസാനിക്കാനിരിക്കെയാണ് പുതിയ നിയന്ത്രണം കൊണ്ടുവന്നത്. നിലവില് പഴയനോട്ടുകളുടെ വലിയ തുകകള് നിക്ഷേപമായി ബാങ്ക് അക്കൗണ്ടില് ഇടാമായിരുന്നു.
അതേസമയം, കള്ളപ്പണം വെളുപ്പിക്കാനുള്ള പദ്ധതിയായ പ്രധാനമന്ത്രി ഗരീബ് കല്യാണ് യോജന പ്രകാരം ബാങ്ക് അക്കൗണ്ടുകളില് പണം നിക്ഷേപിക്കുന്നതിന് നിയന്ത്രണമില്ല. അതുപ്രകാരം നികുതി അടച്ചേ പണം നിക്ഷേപിക്കാന് പറ്റൂ.പിന്വലിച്ച നോട്ടുകള് ബാങ്കില് നിക്ഷേപിക്കാന് ഡിസംബര് 30വരെ സമയമുണ്ടെന്ന കേന്ദ്ര അറിയിപ്പ് വിശ്വസിച്ച് കാത്തിരുന്നവരാണ് പുതിയ നിയന്ത്രണം വഴി വെട്ടിലായിരിക്കുന്നത്.
https://www.facebook.com/Malayalivartha
