കുറവ് സീറ്റ് കിട്ടിയിട്ടും ഗോവയില്‍ ബി.ജെ.പി അധികാരം പിടിച്ചതിന്റെ രഹസ്യം' കേന്ദ്രമന്ത്രി നിതിന്‍ ഗഡ്കരി മാനേജ്‌മെന്റ് വിദ്യാര്‍ത്ഥികളോട് വെളിപ്പെടുത്തി. എല്ലാ രഹസ്യങ്ങളും മന്ത്രി പറഞ്ഞില്ലെങ്കിലും തീരുമാനം ഉടന്‍ എടുക്കുന്നതിലും വിവരങ്ങള്‍ അപ്പപ്പോള്‍ കൈമാറുന്നതിലും കാണിച്ച മാനേജ്‌മെന്റ് വൈദഗ്ദ്ധ്യമാണ് ഗോവ ഓപ്പറേഷന്‍' വിജയിപ്പിച്ചതെന്നാണ് പറഞ്ഞതിന്റെ ചുരുക്കം. മുംബയിലെ വെല്ലിങ്കര്‍ മാനേജ്‌മെന്റ് ഇന്‍സ്റ്റിറ്റിയൂട്ടിലെ വിദ്യാര്‍ത്ഥികളോട് ആശയവിനിമയം നടത്തുകയായിരുന്നു അദ്ദേഹം.

ഗോവയിലെ പാര്‍ട്ടി നിരീക്ഷകനായിരുന്നു ഗഡ്കരി. ഫലപ്രഖ്യാപനം പൂര്‍ത്തിയായതിന്റെ തൊട്ടടുത്ത നിമിഷം ബി.ജെ.പി പ്രസിഡന്റ് അമിത് ഷായുടെ ഫോണ്‍ ഗഡ്കരിക്ക് വന്നു. ഉടനേ നേരില്‍ കണ്ട് സംസാരിക്കണമെന്നായിരുന്നു സന്ദേശം. ഗഡ്കരി അമിത് ഷായുടെ വസതിയിലെത്തുന്നു. അപ്പോള്‍ വൈകിട്ട് 7 മണി. നമുക്ക് സര്‍ക്കാര്‍ രൂപീകരിക്കാനുള്ള നമ്പര്‍ ഇല്ല എന്ന ഗഡ്കരിയുടെ അറിയിപ്പിന് അമിത് ഷായുടെ മറുപടി ഇങ്ങനെ: നമ്മള്‍ അവിടെ സര്‍ക്കാര്‍ രൂപീകരിക്കും. നിങ്ങള്‍ ഉടന്‍ ഗോവയ്ക്ക് തിരിക്കുക. ഒട്ടും സമയം കളയാതെ ഗോവയിലെത്തിയ ഗഡ്കരിക്ക് അന്ന് ഉറക്കം നഷ്ടപ്പെട്ട രാത്രി ആയിരുന്നു.

രാത്രി 1.30ന് എം.ജി.പി പാര്‍ട്ടിയുടെ നേതാവ് സുദിന്‍ ധാവിലിക്കര്‍ ഗഡ്കരിയുമായി കൂടിക്കാഴ്ച നടത്തുന്നു. പരീക്കര്‍ മുഖ്യമന്ത്രി സ്ഥാനം ഏറ്റെടുക്കുകയാണെങ്കില്‍ പിന്തുണ തരാം എന്നായിരുന്നു എം.ജി.പി പാര്‍ട്ടിയുടെ വാഗ്ദാനം. ഒപ്പം ചില വലിയ പദ്ധതികള്‍ക്ക് കേന്ദ്ര സര്‍ക്കാര്‍ പച്ചക്കൊടി നല്‍കുകയും വേണം. വെളുപ്പിന് 5 മണിക്ക് ഗോവ ഫോര്‍വേഡ് പാര്‍ട്ടിയുടെ വിജയ് സര്‍ദേശായി ഗഡ്കരിയെ കാണുന്നു. പരീക്കറിനെ മുഖ്യമന്ത്രി ആക്കിയാല്‍ പിന്തുണ എന്നായിരുന്നു സര്‍ദേശായിയുടെയും മനോഗതം. രാവിലെ 5.15ന് ഗഡ്കരി അമിത്ഷായെ വിളിച്ചുണര്‍ത്തി വിവരങ്ങള്‍ ധരിപ്പിച്ചു. ഷായുടെ മറുപടി ഇങ്ങനെ ഇപ്പോള്‍ പ്രധാനമന്ത്രി ഉറക്കമാണ്. രാവിലെ 7 മണിക്ക് തിരിച്ച് വിളിക്കാം.

പരീക്കറിനെ ഗോവയ്ക്ക് വിടണമെങ്കില്‍ ബി.ജെ.പി പാര്‍ലമെന്ററി ബോര്‍ഡിന്റെ അനുമതി വേണം. പരീക്കറിന്റെ മനസിലിരുപ്പും അറിയണം. രാവിലെ 8.30ന് വിളിച്ചിട്ട് അമിത് ഷാ, ഗോവയില്‍ സര്‍ക്കാര്‍ രൂപീകരിക്കാന്‍ കഴിയുമെങ്കില്‍ പരീക്കര്‍ വരുമെന്നും പ്രധാനമന്ത്രിയുടെ അനുമതി ലഭിച്ചെന്നും അറിയിച്ചു. ഒരു രാത്രി കൊണ്ടാണ് ഇതെല്ലാം സംഭവിച്ചതെന്ന് വിദ്യാര്‍ത്ഥികളെ അറിയിച്ച ഗഡ്കരി, ആ രാത്രിയില്‍ ഉറങ്ങിപ്പോയ കോണ്‍ഗ്രസ് പിറ്റേന്ന് വൈകി ഉണര്‍ന്നപ്പോഴേക്കും എല്ലാം കഴിഞ്ഞിരുന്നതായും പറഞ്ഞു. ശരിയായ തീരുമാനങ്ങള്‍ വേഗം എടുക്കുക. അതിനെക്കാള്‍ വേഗത്തില്‍ അതു നടപ്പാക്കുക. ഇതാണ് മാനേജ്‌മെന്റ് വിദ്യാര്‍ത്ഥികള്‍ എപ്പോഴും ഓര്‍ക്കേണ്ട പാഠമെന്നും ഗഡ്കരി വിശദീകരിച്ചു.