ദേശീയ പാതയോരത്തെ മദ്യശാലകള്‍ അടച്ചുപൂട്ടണമെന്ന സുപ്രീം കോടതി മറികടക്കാന്‍ ദേശീയ പാതകള്‍ ജില്ലാ പാതകളാക്കി കേന്ദ്രഭരണ പ്രദേശമായ ഛണ്ഡിഗഢ്. കോടതി വിധിയെ എങ്ങനെ മറികടക്കണമെന്ന് സംസ്ഥാനങ്ങള്‍ തലപുകഞ്ഞാലോചിക്കുന്നതിനിടെയാണ് 20 വര്‍ഷം മുന്‍പ് ദേശീയ പാതകളക്കി പ്രഖ്യാപിച്ച ഈ റോഡുകളെ ജില്ലാ പാതാകളാക്കി മാറ്റിക്കൊണ്ട് ഉത്തരവ് ഭേദഗതി ചെയ്തിരിക്കുന്നത്.

എല്ലാ സംസ്ഥാനങ്ങളിലേയും കേന്ദ്രഭരണ പ്രദേശങ്ങളിലേയും ദേശീയ പാതയോരത്തെ മദ്യശാലകള്‍ അടച്ചു പൂട്ടണമെന്നും പാതയോരങ്ങളുടെ 500 മീറ്റര്‍ ചുറ്റളവില്‍ മദ്യശാലകള്‍ പ്രവര്‍ത്തിക്കാന്‍ പാടില്ലെന്നുമായിരുന്നു സുപ്രീം കോടതി നിര്‍ദ്ദേശം. കോടതി ഉത്തരവിനെ തുടര്‍ന്ന് ഛണ്ഡിഗഢില്‍ ഇരുപതോളം മദ്യാശാലകളാണ് അടച്ചുപൂട്ടിയത്.

വി1 മുതല്‍ വി7 വരെ ഛണ്ഡീഗഢിലെ പാതകളെ ഏഴ് കാറ്റഗറികളായാണ് തരംതിരിച്ചിരിക്കുന്നത്. കോടതി ഉത്തരവിനു പിന്നാലെ ഛണ്ഡിഗഢ് ഭരണസമിതി നിയോഗിച്ച നാലംഗ സമിതിയാണ് പാതകളെ പുനപരിശോധനയ്ക്ക് വിധേയമാക്കി ദേശീയ പാതകളെ ജില്ലാ പാതകളായി നിര്‍ദ്ദേശിച്ചത്.

ദേശീയ പാതയോരത്തു നിന്നും മദ്യശാലകള്‍ മാറ്റിസ്ഥാപിക്കണമെന്ന കോടതി ഉത്തരവ് എല്ലാ സംസ്ഥാനങ്ങള്‍ക്കും ഇരുട്ടടി ആയിരിക്കുന്ന പശ്ചാത്തലത്തിലാണ് മദ്യശാലകള്‍ക്കു വേണ്ടി മാത്രം ദേശീയ പാതകളുടെ പേര് മാറ്റിക്കൊണ്ടുള്ള ഛണ്ഡിഗഢിന്റെ തീരുമാനം. കോടതി ഉത്തരവില്‍ ഭേദഗതി ആവശ്യപ്പെട്ടു കൊണ്ട് സംസ്ഥാനങ്ങള്‍ സുപ്രീം കോടതിയെ സമീപിച്ചെങ്കിലും ഉത്തരവില്‍ മാറ്റം വരുത്താനാവില്ലെന്നും ദേശീയ പാതകളുടെ 500 മീറ്റര്‍ ചുറ്റളവില്‍ മദ്യശാലകള്‍ പാടില്ലെന്നും കോടതി വ്യക്തമാക്കി.

മദ്യവില്‍പ്പനയില്‍ നിന്നുള്ള എക്‌സൈസ് വരുമാനം മദ്യവില്‍പ്പനയില്‍ നിന്നാണെന്നിരിക്കെ മദ്യശാലകള്‍ മാറ്റിസ്ഥാപിക്കാനുള്ള കോടതി ഉത്തരവ് സംസ്ഥാനങ്ങളുടെ മൊത്തവരുമാനത്തെ സാരമായി ബാധിക്കുന്ന പശ്ചാത്തലത്തിലാണ് ഉത്തരവില്‍ വ്യക്തത തേടി കേരളം അടക്കമുള്ള സംസ്ഥാനങ്ങള്‍ സുപ്രീം കോടതിയെ സമീപിച്ചത്.