തീരെ ദരിദ്രമായ ചുറ്റുപാടില് ജനിച്ചു; വൈകല്യമുള്ള അവസ്ഥയിലും രമേഷ് നേടിയെടുത്തത്
മഹാരാഷ്ട്രയിലെ സോളാപൂര് ജില്ലയിലെ മഹാഗാവ് ഗ്രാമത്തിലെ രമേഷ് ഗോലാപ് ഐഎഎസ് ഉദ്യോഗസ്ഥനായത് വിധിയോടു കൂടി പടവെട്ടിയാണ്. അച്ഛന് സൈക്കിള് റിപ്പെയറിങ് കടയായിരുന്നു. മദ്യപാനം കൂടിയതോടെ കട അടച്ചു പൂട്ടേണ്ടി വന്നു. വീട്ടിലെ ദാരിദ്ര്യം അകറ്റാന് രാമുവും അമ്മ വിമലയ്ക്കൊപ്പം വളകള് വില്ക്കാനിറങ്ങി. പിന്നീട് സ്വപ്നങ്ങള് ഒന്നൊന്നായി വെട്ടിപ്പിടിച്ചു.
പഠനത്തില് മിടുക്കനായിരുന്ന രാമുവിന് പക്ഷേ സ്വന്തം ഗ്രാമത്തില് അതിനുള്ള അവസരം ഉണ്ടായിരുന്നില്ല. കാരണം അവിടെ ഒരു പ്രൈമറി സ്കൂള് മാത്രമായിരുന്നു. ഇതോടെ ബന്ധുക്കളുടെ അടുത്തേക്ക് താമസം മാറി. 2005ല് രാമു പന്ത്രണ്ടാം ക്ലാസില് പഠിക്കുന്പോള് അച്ഛന് മരിച്ചു. വണ്ടിക്കൂലി ഇല്ലാത്തതിനാല് രാമുവിന് പോകാന് കഴിഞ്ഞില്ല. ഇതറിഞ്ഞ ചില അയല്ക്കാര് പണം നല്കി. അങ്ങനെ അച്ഛന്റെ അന്ത്യകര്മങ്ങള് ചെയ്യാന് സാധിച്ചു.
പന്ത്രണ്ടാം ക്ലാസില് ഉന്നത വിജയം നേടിയിട്ടും ഉയര്ന്ന വിദ്യാഭ്യാസത്തിന് ഒരുപാട് ബുദ്ധിമുട്ടി. ഓപ്പണ് യൂണിവേഴ്സിറ്റിയില് നിന്നാണ് ബിഎഡും ആര്ട്സ് ഡിഗ്രിയും നേടിയത്. 2009ല് അധ്യാപകനായി ജോലിയില് പ്രവേശിച്ചു. ഇതോടെ ജീവിതത്തില് നിന്ന് ദാരിദ്ര്യം മെല്ലെ അകന്നു. എങ്കിലും രാമു അടങ്ങിയിരുന്നില്ല. കൂടുതല് ഉയര്ന്ന ലക്ഷ്യങ്ങള് എത്തിപ്പിടിക്കാന് തീരുമാനിച്ചു.
ഗ്രാമത്തെ ഗ്രസിച്ചിരിക്കുന്ന അഴിമതിക്കെതിരേ എന്തെങ്കിലും ചെയ്യണമെന്ന് രാമു തീരുമാനിച്ചു. അങ്ങനെയാണ് അധ്യാപക ജീവിതത്തില് നിന്ന് ആറുമാസം അവധിയെടുത്ത് പുനയില് യുപിഎസ്സി പരീക്ഷയ്ക്ക് തയാറെടുത്തു തുടങ്ങിയത്. അന്ന് യുപിഎസ്സിയുടെ അര്ഥം പോലും രാമുവിന് അറിയില്ലായിരുന്നു. പിന്നീട് കഠിനമായ പരിശീലനത്തിന്റെ നാളുകള്. എന്നിട്ടും ഫലം വന്നപ്പോള് രാമു ലിസ്റ്റില് ഇല്ല. എങ്കിലും വിട്ടുകൊടുക്കാന് ഈ യുവാവ് തയാറായിരുന്നില്ല. 2012ല് ഐഎഎസ് ലഭിച്ചു. അഖിലേന്ത്യാ തലത്തില് 287ാം റാങ്ക്.
ഇന്ന് ജാര്ഖണ്ഡ് എനര്ജി ഡിപ്പാര്ട്ട്മെന്റില് ജോയിന്റ് സെക്രട്ടറിയാണ് ഈ യുവാവ്. ഒപ്പം ഐഎഎസ് സ്വപ്നമായി കൊണ്ടു നടക്കുന്നവര്ക്കു പ്രചോദനം നല്കുന്ന മോട്ടിവേഷണല് സ്പീക്കറും. ഒരുകാലത്ത് തന്റെ കൈപിടിച്ച് വളകള് വില്ക്കാന് നടന്നിരുന്ന മകന് ഇന്ന് ഉന്നത ഉദ്യോഗസ്ഥനായതിന്റെ ആഹ്ളാദമാണ് രാമുവിന്റെ അമ്മയുടെ കണ്ണുകളില്. മകന് ഉയരങ്ങള് കീഴടക്കുന്പോഴും ആ അമ്മ അവന് നല്കുന്ന ഉപദേശം ഒന്നു മാത്രം. നീ വന്ന വഴി മറക്കരുത്. ആ വാക്കുകള് തന്നെയാണ് ഇന്നും ഈ ഐഎഎസ് ഉദ്യോഗസ്ഥന്റെ മാര്ഗദീപം.
https://www.facebook.com/Malayalivartha
