വിമാനത്തിലെ സീറ്റു തര്‍ക്കത്തിനിടെ എയര്‍ഇന്ത്യ ജീവനക്കാരനെ ചെരുപ്പൂരിയടിച്ച ശിവസേന എംപി രവീന്ദ്ര ഗെയ്ക്‌വാദിനെ വിമാനക്കമ്പനി കരിമ്പട്ടികയില്‍ ഉള്‍പ്പെടുത്തി. 60 വയസുള്ള എയര്‍ ഇന്ത്യയുടെ ഡ്യൂട്ടി മാനേജര്‍ സുകുമാറിനെയാണു ശിവസേന എംപി രവീന്ദ്ര ഗെയ്ക്‌വാദ് ചെരുപ്പിനടിക്കുകയും ഷര്‍ട്ട് വലിച്ചു കീറുകയും ചെയ്തത്.

ജീവനക്കാരനെ താന്‍ ചെരുപ്പൂരിയടിച്ചെന്ന് എംപി തന്നെ മാധ്യമപ്രവര്‍ത്തകര്‍ക്കു മുന്നില്‍ സമ്മതിച്ചിരുന്നു. 25 തവണ താന്‍ അയാളെ അടിച്ചെന്നാണ് എംപി പറഞ്ഞത്. കരിമ്പട്ടികയില്‍ പെടുത്തിയതിനു പുറമേ ജീവനക്കാരനെ മര്‍ദ്ദിച്ചതിനും, സര്‍വീസ് വൈകിപ്പിച്ചതിനും ഇയാള്‍ക്കെതിരെ എയര്‍ ഇന്ത്യ അധികൃതര്‍ പരാതിയും നല്‍കി.

ഒരു രാഷ്ട്രീയ പാര്‍ട്ടിയും വ്യക്തിയെ കൈയേറ്റം ചെയ്യുന്നതിനെ പിന്തുണയ്ക്കില്ലെന്നും രവീന്ദ്ര ഗെയ്ക്‌വാദിന്റെ ഭാഗത്തുനിന്ന് നടക്കാന്‍ പാടില്ലാത്തതാണു സംഭവിച്ചതെന്നും വ്യോമയാന മന്ത്രി അശോക് ഗജപതി രാജു പറഞ്ഞിരുന്നു. ഇതിനു പിന്നാലെയാണ് എയര്‍ഇന്ത്യ കര്‍ശന നടപടികളെടുത്തത്.