ഉയര്‍ന്ന മൂല്യമുള്ള നോട്ടുകള്‍ കേന്ദ്രസര്‍ക്കാര്‍ അസാധുവാക്കിയതിനുശേഷം രണ്ടു ലക്ഷമോ അതില്‍ കൂടുതലോ നിക്ഷേപിച്ചിട്ടുള്ള നികുതിദായകര്‍ അതു പുതിയ ആദായനികുതി റിട്ടേണ്‍ ഫോമില്‍ വെളിപ്പെടുത്തണം. 2017-18 അസെസ്‌മെന്റ് വര്‍ഷത്തിലേക്കുള്ള ലഘൂകരിച്ച പുതിയ ആദായനികുതി റിട്ടേണ്‍ ഫോം ഇന്നലെ പുറത്തിറക്കിയതായി സെന്‍ട്രല്‍ ബോര്‍ഡ് ഓഫ് ഡയറക്ട് ടാക്‌സസ് (സിബിഡിടി) അറിയിച്ചു.

ഇതില്‍ 2016 നവംബര്‍ ഒന്‍പതിനും ഡിസംബര്‍ 30നും ഇടയില്‍ രണ്ടു ലക്ഷമോ അതില്‍ കൂടുതലോ നിക്ഷേപം നടത്തിയിട്ടുണ്ടെങ്കില്‍ അതു രേഖപ്പെടുത്താനുള്ള കോളം കൊടുത്തിട്ടുണ്ട്. ആദായനികുതി റിട്ടേണില്‍ 12 അക്ക ആധാര്‍ നമ്പര്‍ കാണിക്കുന്നതും നിര്‍ബന്ധമാക്കിയിട്ടുണ്ട്. അതില്ലെങ്കില്‍ 28 അക്കമുള്ള ആധാര്‍ എന്റോള്‍മെന്റ് നമ്പര്‍ കാണിച്ചിരിക്കണം.