ജീവന്‍ വിലപ്പെട്ടതാണ് ഹെല്‍മെറ്റ് ധരിക്കൂ... നിരന്തരം കേള്‍ക്കുന്ന വാക്കുകളാണിത്. എന്നാല്‍ സാക്ഷാല്‍ സച്ചിന്‍ തെണ്ടുല്‍ക്കറാണ് ഇത്തവണ ഇതു പറയുന്നത്. ഇരുചക്ര വാഹനത്തില്‍ തന്നെ പിന്തുടര്‍ന്ന് സെല്‍ഫി എടുത്ത യുവാക്കളോടാണ് സച്ചിന്റെ ഉപദേശം.

സച്ചിന്‍ ഫെയ്‌സ്ബുക്കില്‍ ഒരു വിഡിയോയും പങ്കു വച്ചിട്ടുണ്ട്. ജീവിതം വിലപ്പെട്ടതാണെന്നും ഇരുചക്രവാഹനത്തില്‍ സഞ്ചരിക്കുമ്പോള്‍ ഹെല്‍മെറ്റ് ധരിക്കണം എന്നുമാണ് സച്ചിന്‍ യുവക്കളോട് പറഞ്ഞത്. കൂടാതെ ഇനി ഹെല്‍മെറ്റ് ധരിക്കാതെ ഇരുചക്രവാഹനം ഓടിക്കില്ല എന്ന് യുവാക്കളെക്കൊണ്ട് സത്യവും ചെയിപ്പിച്ചു ലിറ്റില്‍ മാസ്റ്റര്‍. 

യുവാക്കളോടു മാത്രമല്ല പിന്നാലെ ബൈക്കില്‍ എത്തിയ ഒരു കുടുംബത്തോടും സച്ചിന്‍ ഇതു തന്നെ ആവശ്യപ്പെടുന്നുണ്ട്. ഹെല്‍മെറ്റ് ധരിക്കൂ സഹോദരാ എന്നാണ് ആ കുടുംബനാഥനോട് സച്ചിന്‍ പറഞ്ഞത്. ഹെല്‍മെറ്റ് ഇല്ലാതെ യാത്ര ചെയ്യുന്നത് വളരെ അപകടകരമാണെന്നും ഇനി ഒരിക്കലും ഹെല്‍മെറ്റ് ധരിക്കാതെ യാത്ര ചെയ്യരുതെന്നും സച്ചില്‍ ഇവരോട് ആവര്‍ത്തിച്ചു പറയുന്നുമുണ്ട്.