ബോളിവുഡ് സിനിമകളില്‍ കണ്ടു പരിചിതമായ നാടകീയ മുഹൂര്‍ത്തങ്ങളാണ് കാന്‍പൂരിലെ കല്യാണ വേദിയില്‍ അരങ്ങേറിയത്. തോക്കുമായി എത്തിയ യുവതിയുടെ നാടകത്തിലൂടെ കല്യാണവും മുടങ്ങി യുവതിക്കു തന്റെ ഭര്‍ത്താവിനെ തിരികെ ലഭിക്കുകയും ചെയ്തു.

വരനും വധുവും വേദിയില്‍ നില്‍ക്കവെയാണ് യുവതി തോക്കുമായി രംഗപ്രവേശം ചെയ്തത്. താന്‍ വരന്റെ ലൗവര്‍ ആണെന്നും ക്ഷേത്രത്തില്‍ വെച്ച് രഹസ്യമായി കല്യാണം കഴിച്ചതാണെന്നും യുവതി വേദിയില്‍ കയറി നിന്ന് പ്രഖ്യാപിച്ചു. കാന്‍പൂരില്‍ ഷിവില്‍ പ്രദേശത്ത് കഴിഞ്ഞ ബുധനാഴ്ചയാണ് സിനിമയെ വെല്ലും തിരക്കഥ നടന്നത്.

ദേവേന്ദ്ര അവാസ്തിയാണ് വരനായി എത്തി നാണംകെട്ട് മടങ്ങിയത്. നേരത്തെ തന്നെ ദമ്പതികളായ ഇവര്‍ തോക്കു ചൂണ്ടിക്കൊണ്ട് തന്റെ ഭര്‍ത്താവായ വരനെക്കൊണ്ട് വേറൊരു പെണ്ണിനെയും കല്യാണം കഴിക്കില്ലെന്ന് വേദിയില്‍ പറയിപ്പിക്കുകയും ചെയ്തു.

പിന്നാലെ വധു കല്യാണത്തില്‍ നിന്ന് പിന്മാറുകയായിരുന്നു. ഭീഷണിക്കൊപ്പം താന്‍ ഗര്‍ഭിണി ആണെന്നും ദേവേന്ദ്രയുടെ കുഞ്ഞ് തന്റെ വയറ്റില്‍ വളരുന്നുണ്ടെന്നും യുവതി പ്രഖ്യാപിച്ചു. വധുവിന്റെയും വരന്റെയും കൂട്ടര്‍ വാക്കു തര്‍ക്കമാകുകയും ചെയ്തു. കല്യാണത്തിനായി 500 പേരുടെ സംഘം ഉണ്ടായിരുന്നു. വധുവിന്റെ വീട്ടുകാര്‍ നല്‍കിയ പണവും മറ്റ് വിലപിടിപ്പുള്ള വസ്തുക്കളും സംഘം തിരിച്ചു വാങ്ങി. പ്രദേശവാസികളുടെ അഭ്യര്‍ത്ഥന പ്രകാരം കേസെടുക്കാതെ വിട്ടു.