ഓരോ ഇടപാടിനും 25 രൂപ വീതം ഈടാക്കുമെന്ന മുന്‍ ഉത്തരവ് തിരുത്തി സ്റ്റേറ്റ്  ബാങ്ക് ഓഫ് ഇന്ത്യ. എ.ടി.എം ഇടപാടുകള്‍ക്കുള്ള നിരക്കുകള്‍ ഏപ്രില്‍ ഒന്നുമുതല്‍ തുടരുന്നവയാണെന്നും യാതൊരു വിധ വര്‍ദ്ധനവില്ലെന്നും എസ്. ബി.ഐ അധികൃതര്‍ അറിയിച്ചു. ഇതു പ്രകാരം ഒരു എസ്. ബി.ഐ ഉപഭോക്താവിന് എസ്.ബി.ഐ എ.ടി.എം വഴിയും എസ്.ബി.ഐ ഇതര എ. ടി. എം വഴിയും അഞ്ചു തവണ വീതം പണം പിന്‍വലിക്കാം.

എസ്.ബി.ഐ എ. ടി. എം വഴി പണം പിന്‍വലിക്കുമ്പോള്‍ ആറാം തവണ മുതല്‍ 12.50 പൈസയും മറ്റ് എ. ടി .എം വഴി പിന്‍വലിക്കുമ്പോള്‍ ആറാം തവണ മുതല്‍ 25 രൂപയും ചാര്‍ജ്ജായി ഈടാക്കും. മെട്രോ നഗരങ്ങളില്‍ എസ്.ബി. ഐ എ.ടി. എം വഴി അഞ്ച് തവണ പിന്‍വലിക്കാമെങ്കിലും മറ്റ് ബാങ്ക് എ.ടി.എം വഴി മൂന്നു തവണയേ സൗജന്യമായി പിന്‍വലിക്കാനാവൂ. നേരത്തെ മൂന്നുമാസം കൂടുമ്പോഴാണ് ഈ തുക ഈടാക്കിയിരുന്നതെങ്കില്‍ ജൂണ്‍ ഒന്നുമുതല്‍ എല്ലാ മാസവും അക്കൗണ്ടില്‍ നിന്ന് തുക ഈടാക്കും. 

25 രൂപ ഈടാക്കില്ല 

ഓരോ ഇടപാടിനും 25 രൂപ ഈടാക്കുന്നത് എസ്. ബി.ഐ വാലറ്റ് ആയ എസ്.ബി.ഐ ബഡ്ഡിയില്‍ നിന്ന് ബിസിനസ്സ് കറസ്‌പോണ്ടന്റ്‌സ് വഴി പിന്‍വലിക്കുന്നതിനാണെന്നും ആദ്യ ഉത്തരവില്‍ ബിസിനസ്സ് കറസ്‌പോണ്ടന്റ്‌സ് വഴി ഉപയോഗിക്കുന്നവര്‍ക്ക് മാത്രം എന്ന് സൂചിപ്പിക്കാന്‍ വിട്ടുപോയതാണെന്നും എസ്.ബി.ഐ അധികൃതര്‍ തിരുത്തിയ ഉത്തരവിലൂടെ അറിയിച്ചു.

എസ്.ബി. ഐ ശാഖകള്‍ ഇല്ലാത്ത ഗ്രാമപ്രദേശങ്ങളിലെ ജനങ്ങള്‍ക്ക് എസ്.ബി.ഐ സൗകര്യം ലഭിക്കാനാണ് അക്ഷയ പോലുള്ള കേന്ദ്രങ്ങളേയും വ്യക്തികളെയും ബിസിനസ്സ് കറസ്‌പോണ്ടന്റ് മാരായി ബാങ്ക് നിയമിച്ചത്. സ്വകാര്യ വാലറ്റ് കമ്പനികളോട് മത്സരിക്കാന്‍ ഈയിടെയാണ് എസ്.ബി.ഐ വാലറ്റ് ആയ എസ്.ബി.ഐ ബഡ്ഡി എ.ടി.എമ്മുമായി ബന്ധിപ്പിത്. ഇവരില്‍ നിന്നാണ് ഒരു ഇടപാടിന് 25 രൂപ ഈടാക്കുന്നത്.

മറ്റ് പുതിയ നിര്‍ദ്ദേശങ്ങള്‍ 

ഐ.എം.പി.എസിന് ഫീസ്

ഇന്റര്‍നെറ്റ് ബാങ്കിംഗ്, മൊബൈല്‍ ബാങ്കിംഗ്, യു.പി.ഐ, യു.എസ്.എസ്.ഡി എന്നിവ മുഖേന ഐ.എം.പി.എസ് പണമിടപാടിനും ഫീസുണ്ട്. ഇതുകൂടാതെ സേവന നികുതിയും നല്‍കണം. 

ഒരു ലക്ഷം രൂപവരെ ഇടപാടിന് ഫീസ് അഞ്ച് രൂപ, ഒരു ലക്ഷത്തിനു മുകളില്‍ രണ്ടു ലക്ഷം രൂപവരെ 15 രൂപ, രണ്ടു ലക്ഷത്തിനു മുകളില്‍ അഞ്ച് ലക്ഷം രൂപവരെ 25 രൂപ

ബഡ്ഡിക്ക് ചാര്‍ജ്ജ് 

ബിസിനസ് കറസ്‌പോണ്ടന്റുമാര്‍ മുഖേന 10,000 രൂപവരെ നടത്തുന്ന നിക്ഷേപത്തിന് ആകെത്തുകയുടെ 0.25 ശതമാനവും സേവന നികുതിയും ഫീസ്. നികുതിക്ക് പുറമേ മിനിമം രണ്ടു രൂപയും പരമാവധി എട്ട് രൂപയുമാണ് ഈടാക്കുക. ബിസിനസ് കറസ്‌പോണ്ടന്റുമാര്‍ മുഖേന 2,000 രൂപവരെ പിന്‍വലിക്കുന്നതിന് തുകയുടെ 2.50 ശതമാനവും (മിനിമം ആറു രൂപ) സേവന നികുതിയുമാണ് ഫീസ്

മുഷിഞ്ഞ നോട്ട് കൈമാറുന്നതിന് ഫീസ്

20 മുഷിഞ്ഞ നോട്ടുകളോ അല്ലെങ്കില്‍ പരമാവധി 5,000 രൂപയുടെ മുഷിഞ്ഞ നോട്ടുകളോ മാത്രമേ സൗജന്യമായി മാറാനാകൂ. 20ലേറെ നോട്ടുകളോ 5,000 രൂപയില്‍ കൂടുതല്‍ മൂല്യമോ ഉണ്ടെങ്കില്‍ ഓരോ നോട്ടിനും രണ്ടു രൂപ വീതമോ ആയിരം രൂപയ്ക്ക് അഞ്ച് രൂപ വീതമോ ഫീസ് ഈടാക്കും. സേവന നികുതിയും നല്‍കണം. ഏത് ഫീസാണോ കൂടുതല്‍, അതാവും ഇടാക്കുക.

ഉദാഹരണത്തിന്, 

500 രൂപയുടെ 25 മുഷിഞ്ഞ നോട്ടുകള്‍ ഉണ്ടെന്നിരിക്കട്ടെ. ഇവയുടെ മൊത്തം മൂല്യം 12,500 രൂപ. ഓരോ നോട്ടിനും രണ്ടു രൂപ വീതം ആകുമ്പോള്‍ , ഫീസ് 50 രൂപയും സേവന നികുതിയുമാണ്. ആയിരം രൂപയ്ക്ക് അഞ്ച് രൂപ വീതം ആകുമ്പോള്‍ , ഫീസ് 62.50 രൂപയും സേവന നികുതിയും വരും. കൂടിയ ഫീസായ 62.50 രൂപയും സേവന നികുതിയുമാണ് എസ്.ബി.ഐ ഈടാക്കുക.

മിനിമം ബാലന്‍സ് വേണ്ടാത്ത അക്കൗണ്ടുകള്‍ക്ക് ചാര്‍ജ്ജ്

ബേസിക് സേവിംഗ്‌സ് ബാങ്ക് ഡെപ്പോസിറ്റ് അക്കൗണ്ടുടമകള്‍ക്ക് ഇനിമുതല്‍ റൂപേ കാര്‍ഡ് മാത്രമേ സൗജന്യമായി നല്‍കൂ. ഇവര്‍ക്ക് പത്ത് ലീഫുള്ള ചെക്ക് ബുക്കിന് 30 രൂപയും സേവന നികുതിയും ഫീസ് ഈടാക്കും. 25 ലീഫ് ചെക്ക് ബുക്കിന് ഫീസ് 75 രൂപയും സേവന നികുതിയും, 50 ലീഫ് ചെക്ക് ബുക്കിന് ഫീസ് 150 രൂപയും സേവന നികുതിയും. ഇവര്‍ക്ക് പ്രതിമാസം എ.ടി.എമ്മില്‍ നിന്നോ ബാങ്ക് ശാഖയിലെത്തിയോ നാല് തവണ സൗജന്യമായി പണം പിന്‍വലിക്കാം. സൗജന്യ പരിധിക്ക് ശേഷം, ബാങ്കിലെത്തിയുള്ള ഓരോ പണംപിന്‍വലിക്കലിനും 50 രൂപയും സേവന നികുതിയും ഫീസ്. മറ്റു ബാങ്ക് എ.ടി.എമ്മിലെ ഓരോ ഇടപാടിനും 20 രൂപയും സേവന നികുതിയും, ഫീസ് എസ്.ബി.ഐ എ.ടി.എമ്മുകളില്‍ ഫീസ് പത്തു രൂപ വീതവും സേവന നികുതിയും.