കാലഘട്ടത്തിന്റെ തന്നെ ഫോണ്‍ എന്ന് വിശേഷിപ്പിക്കുന്ന നോക്കിയ 3310 തിരിച്ചെത്തുന്നു. ഒരിക്കല്‍ മറഞ്ഞ 3310 വ്യാഴാഴ്ചയോടെ മാര്‍ക്കറ്റില്‍ എത്തുന്നു. കെട്ടിലും മട്ടിലും മാറ്റം വരുത്തിയാണ് വീണ്ടും വില്‍പനയ്‌ക്കെത്തിച്ചിരിക്കുന്നത്. വില്‍പനയ്‌ക്കെത്തിച്ചു എന്ന് മാത്രമല്ല മൊബൈല്‍ മോഡലായ 3310 തന്നെയാണ് ഇതിന്റെ വിലയും എന്നതാണ് കൗതുകം. ഓണ്‍ലൈന്‍ വഴി വില്‍പന നടത്തില്ലെങ്കിലും മെയ് 18 വ്യാഴാഴ്ച മുതല്‍ കടകളില്‍ നിന്ന് ഉപഭോക്താക്കള്‍ക്ക് നോക്കിയ വീണ്ടും സ്വന്തമാക്കാം.

ചുവപ്പ്, മഞ്ഞ, കടും നീല, ചാര നിറം എന്നീ നാല് കളറുകളിലാണ് ഇത്തവണ 3310 വിപണണിയിലെത്തിയത്. മൊബൈല്‍ ഉപഭോഗത്തിലെ ഗൃഹാതുരത്വത്തെ ഓര്‍മിപ്പിച്ച് കൊണ്ട് ഇരപിടിക്കുന്ന പാമ്പ് ഗെയിമും, 2ജി ഇന്റര്‍നെറ്റ് സപ്പോര്‍ട്ടും പുതിയ 3310 വാഗ്ദാനം ചെയ്യുന്നുണ്ട്. യു എസ് ബി ചാര്‍ജിംഗ് മോഡ്, 2 മെഗാപിക്‌സല്‍ ബാക്ക് ക്യാമറ, 2.40 ഇഞ്ച് ഡിസ്‌പ്ലേ, 1200 എംഎഎച്ച് ബാറ്ററി ലൈഫ് എന്നിവയും ഇതിന്റെ പ്രത്യേകതയാണ്. ഒരാഴ്ച ബാറ്ററി ആയുസ്സ് എന്ന വാഗ്ദാനത്തോട് കൂടി 3310 വീണ്ടുമെത്തുന്നുവെന്ന് കേട്ടപ്പോഴെ ഏറെ പ്രതീക്ഷയിലായിരുന്നു നോക്കിയയുടെ പ്രിയ ഉപഭോക്താക്കള്‍. കണക്കുകള്‍ പ്രകാരം 12.6 കോടി പഴയ നോക്കിയ 3310 ഫോണുകളെങ്കിലും കമ്പനി വിറ്റഴിച്ചിട്ടുണ്ട്.