ദക്ഷിണ ഗോവയില്‍ പുഴയ്ക്ക് കുറുകെയുള്ള നടപ്പാലം തകര്‍ന്ന് രണ്ടു മരണം. മുപ്പതോളം പേരെ കാണാതായെന്നും പൊലീസ് അറിയിച്ചു. രക്ഷാപ്രവര്‍ത്തനം തുടരുകയാണ്. ഗോവയുടെ തലസ്ഥാനമായ പനജിയില്‍ നിന്നും 55 കിലോമീറ്റര്‍ അകലെ വൈകിട്ട് ഏഴു മണിയോടെയാണ് അപകടമുണ്ടായത്. സന്‍വോര്‍ഡം പുഴയ്ക്ക് കുറുകെ പോര്‍ച്ചുഗീസ് കാലത്തു നിര്‍മിച്ച പാലമാണ് തകര്‍ന്നത്.

പഴയ പാലമായതിനാല്‍ ഏതാനും വര്‍ഷമായി ഇതിലൂടെ വാഹനങ്ങള്‍ കടന്നു പോകാന്‍ അനുവദിച്ചിരുന്നില്ല. പാലത്തില്‍ നിന്നും ഒരാള്‍ ആത്മഹത്യയ്ക്ക് ശ്രമിച്ചുവെന്ന റിപ്പോര്‍ട്ടിനെ തുടര്‍ന്ന് വലിയ ജനക്കൂട്ടം പാലത്തില്‍ കയറിയതാണ് അപകടത്തിന് കാരണമെന്നും റിപ്പോര്‍ട്ടുകളുണ്ട്. പുഴയില്‍ വീണ ചിലര്‍ നീന്തി കരയ്ക്ക് കയറിയെന്നും ഏതാനും പേരെ രക്ഷപ്പെടുത്തിയെന്നും പ്രദേശവാസികള്‍ പറഞ്ഞു.