ത്രിവര്ണ ബോക്സില് ഷൂ നല്കി; കടയുടമ അകത്തായി
ത്രിവര്ണ ചിത്രം പതിച്ച ബോക്സില് ഷൂ വിറ്റ കടയുടമ അഴിക്കുള്ളിലായി. രാജസ്ഥാനിലെ കോട്ടയിലാണ് സംഭവം. കടയില് ഷൂ വാങ്ങാന് എത്തിയവര് കടയുടമയുടെ പ്രവൃത്തി കണ്ട് അക്ഷരാര്ത്ഥത്തില് ഞെട്ടി. ഇവരുടെ പരാതിയില് കേസെടുത്ത വിജ്ഞാന് നഗര് പോലീസ് കടയുടമ മഹേഷിനെ പിടികൂടുകയായിരുന്നു. ദേശീയ ചിഹ്നങ്ങളെ അപമാനിക്കുന്നത് തടയുന്ന വകുപ്പ് പ്രകാരമാണ് അറസ്റ്റ്.
ക്രാന്തി തിവാരി എന്നയാളാണ് കടയുടമയുടെ പ്രവൃത്തിക്കെതിരെ പരാതി നല്കിയത്. സിറ്റി മാളിലെ 24ാം നമ്പര് ഷോപ്പില് ഷൂ വാങ്ങാനെത്തിയ തനിക്ക് ദേശീയപതാകയുടെ ചിത്രം പതിച്ച ബോക്സില് ഷൂ പൊതിഞ്ഞു നല്കിയെന്നും അത് ദേശീയ പതാകയെ അപമാനിക്കുന്നതാണെന്നും ക്രാന്തി തിവാരി നല്കിയ പരാതിയില് പറയുന്നു.
കടയില് എത്തിയ പോലീസ് ത്രിവര്ണ ചിത്രം പതിച്ച ബോക്സുകള് പിടിച്ചെടുത്തു. പരാതി സത്യമാണെന്ന് ബോധ്യപ്പെട്ടതോടെയാണ് കടയുടമയ്ക്കെതിരെ കേസെടുത്തത്. ഡല്ഹിയില് നിന്നാണ് ചൈന മെയ്ഡ് ഷൂ വ്യാപകമായി വാങ്ങിയതെന്ന് ഇയാള് മൊഴി നല്കിയിട്ടുണ്ട്. ഇതുപ്രകാരം പോലീസ് മൊത്തവ്യാപാരിയുടെ വിവരങ്ങള് തേടിയ പോലീസ് അന്വേഷണം ആരംഭിച്ചു. 1971ലെ നാഷണല് ഓണര് ആക്ടിലെ രണ്ടാം സെക്ഷന് പ്രകാരമാണ് ഇയാള്ക്കെതിരെ കേസെടുത്തിരിക്കുന്നത്. ഒരു വര്ഷം വരെ തടവുശിക്ഷ കിട്ടാവുന്ന കുറ്റമാണിത്.
https://www.facebook.com/Malayalivartha
