കേരത്തെ സോമാലിയയോട് ഉപമിച്ച പ്രധാനമന്ത്രി നരേന്ദ്ര മോദിയെ 'പോ മോനെ മോദി' എന്ന ഹാഷ്ടാഗ് കൊണ്ട് ഓടിച്ചവരാണ് മലയാളികള്‍. ഇപ്പോഴിതാ കശാപ്പ് നിരോധന വേളയില്‍ കേരളത്തിലെത്തിയ ബിജെപി ദേശീയ അധ്യക്ഷന്‍ അമിത് ഷായ്ക്കും ട്വിറ്ററില്‍ ഹാഷ്ടാഗ് പൊങ്കാല! അലവലാതി ഷാജി എന്ന ഹാഷ്ടാഗ് ഇപ്പോള്‍ ട്വിറ്റര്‍ ഇന്ത്യയില്‍ ട്രെന്‍ഡിങ് ആണ്. ഇതിനെതിരെ സംഘപരിവാര്‍ അനുകൂലികള്‍ രംഗത്തെത്തിക്കഴിഞ്ഞു.

ജയന്റെ സുപ്രസിദ്ധ ഡയലോഗ് ആണ് 'പെമ്പിള്ളേരെ റോഡിലൂടെം നടക്കാന്‍ നീ സമ്മതിക്കില്ല അല്ലേ... ഡാ... നീയാണി അലവലാതി ഷാജി... അല്ലേ' എന്നത്. ഇവിടെയിപ്പോള്‍ മലയാളികള്‍ അമിത് ഷായെ ആണ് അലവലാതി ഷാജി എന്ന് വിളിക്കുന്നത്.

ബിജെപിയുടെ കേരളത്തിലെ ആസ്ഥാന മന്ദിരത്തിന് തറക്കില്ലിടാനും മതമേലധ്യക്ഷന്‍മാരുമായി കൂടിക്കാഴ്ച നടത്താനും ആണ് അമിത് ഷാ കേരളത്തില്‍ എത്തിയത്. കേന്ദ്ര സര്‍ക്കാരിന്റെ കശാപ്പ് നിരോധന ഉത്തരവിനെതിരെ ശക്തമായ പ്രതിഷേധം ആണ് കേരളത്തില്‍ നിന്ന് ഉയരുന്നത്.

ട്വിറ്റര്‍ ഇന്ത്യയില്‍ അലവലാതി ഷാജി എന്ന ഹാഷ്ടാഗ് പെട്ടെന്നാണ് ട്രെന്‍ഡിങ് ആയത്. ഒരുവേള അത് ഒന്നാം സ്ഥാനത്ത് എത്തുകയും ചെയ്തു. നീയാണോടാ ഞങ്ങളുടെ ബീഫ് തീറ്റ മുട്ടിച്ച അലവലാതി ഷാജി എന്നാണ് ചിലര്‍ ട്വീറ്റ് ചെയ്തിരിക്കുന്നത്. അമിത് ഷായ്ക്കും ബിജെപിയ്ക്കും രൂക്ഷ വിമര്‍ശനങ്ങളാണ് ഉള്ളത്.