അപ്പാര്‍ട്ട്‌മെന്റിലെ ലിഫ്റ്റില്‍ കുടുങ്ങി പത്ത് വയസുകാരിക്ക് ദാരുണാന്ത്യം. വിശാഖപട്ടണത്ത് ഞായറാഴ്ചയാണ് സംഭവം. സ്വാതിയെന്ന പെണ്‍കുട്ടിയാണ് ലിഫ്റ്റിന്റെ വാതിലിനും ഗ്രില്ലിനും ഇടയില്‍ കുടുങ്ങിയത്. കുട്ടി ലിഫ്റ്റില്‍ കുടുങ്ങിയതറിയാതെ ലിഫ്റ്റ് നീങ്ങി തുടങ്ങിയതാണ് ദാരുണമായ അപകടത്തില്‍ കലാശിച്ചത്. തന്റെ അമ്മാവന്‍ സെക്യൂരിറ്റിയായി ജോലി ചെയ്യുന്ന അപ്പാര്‍ട്ട്‌മെന്റില്‍ എത്തിയതായിരുന്നു കൊല്ലപ്പെട്ട പെണ്‍കുട്ടി.

കളിക്കുന്നതിനിടെ ലിഫ്റ്റിന്റെ വാതിലില്‍ എത്തുകയായിരുന്നു. ലിഫ്റ്റ് നീങ്ങിത്തുടങ്ങിയതോടെ പെണ്‍കുട്ടി ഇടയില്‍പ്പെട്ട് ചതഞ്ഞരയുകയായിരുന്നു. നെഞ്ചിനും വയറ്റിലും ഗുരുതരമായി പരുക്കേറ്റ പെണ്‍കുട്ടി സംഭവസ്ഥലത്ത് വച്ച് തന്നെ മരിച്ചു. ലിഫ്റ്റില്‍ കുരുങ്ങിയ സ്വാതിയുടെ ശരീരം ചതഞ്ഞരയുന്നത് സി.സി.ടി.വി ക്യാമറയില്‍ പതിഞ്ഞിട്ടുണ്ട്. സംഭവത്തില്‍ അസ്വാഭാവിക മരണത്തിന് പോലീസ് കേസെടുത്തു.

സംഭവത്തില്‍ അപ്പാര്‍ട്ട്‌മെന്റ മാനേജ്‌മെന്റിനെതിരെ സ്വാതിയുടെ ബന്ധുക്കള്‍ രംഗത്ത് വന്നിട്ടുണ്ട്. മാനേജ്‌മെന്റിന്റെ വീഴ്ചയാണ് സ്വാതിയുടെ മരണത്തിന് കാരണമെന്ന് ബന്ധുക്കള്‍ ആരോപിച്ചു. ലിഫ്റ്റ് നന്നാക്കിയിട്ട് മാസങ്ങളാതെന്നും അവര്‍ കൂട്ടിച്ചേര്‍ത്തു. സ്വാതിയുടെ പിതാവ് സമീപത്തെ മറ്റൊരു അപ്പാര്‍ട്ട്‌മെന്റില്‍ സെക്യൂരിറ്റി ജീവനക്കാരനാണ്.