കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ഇന്ന് മധ്യപ്രദേശിലെ മന്ദ്‌സുറില്‍ സന്ദര്‍ശനം നടത്തും. ഉത്പന്നങ്ങള്‍ക്കു താങ്ങുവില ഉള്‍പ്പെടെ വിവിധ ആവശ്യങ്ങളുന്നയിച്ച് ഇവിടെ സമരം നടത്തിയ കര്‍ഷകര്‍ക്കു നേരെ പോലീസ് നടത്തിയ വെടിവയ്പില്‍ ആറു പേര്‍ കൊല്ലപ്പെടുകയും മൂന്നു പേര്‍ക്കു പരിക്കേല്‍ക്കുകയും ചെയ്തിരുന്നു.

കര്‍ഷകസമരം കനത്തതിനെത്തുടര്‍ന്ന് മന്ദ്‌സുറിലെ പിപാല്‍യ മാണ്ഡി മേഖലയില്‍ കര്‍ഫ്യു പ്രഖ്യാപിക്കുകയും ചെയ്തിരുന്നു. രാജ്യത്തെ കര്‍ഷകരുമായി എന്‍ഡിഎ സര്‍ക്കാര്‍ യുദ്ധം നടത്തുകയാണെന്നും, ബിജെപിയുടെ പുതിയ ഇന്ത്യയില്‍ കര്‍ഷകര്‍ അവകാശങ്ങള്‍ ചോദിക്കുമ്പോള്‍ വെടിയുണ്ടകളാണു ലഭിക്കുന്നതെന്നും സന്ദര്‍ശനത്തിനു മുന്നോടിയായി രാഹുല്‍ പറഞ്ഞിരുന്നു. രാഹുലിനൊപ്പം മുതിര്‍ന്ന കോണ്‍ഗ്രസ് നേതാക്കളും ഇന്നു മന്ദ്‌സുറിലെത്തും.