വണ്ടി പിടിത്തം മലയാളികളെ ആരും പഠിപ്പിക്കേണ്ട. എന്തെന്തു സംഭവങ്ങളാ വണ്ടി പിടിത്തത്തിനിടെ ഉണ്ടാകുന്നത്. എന്നാല്‍ തികച്ചും വ്യത്യസ്ഥമായ സംഭവമാണ് ആന്ധ്രാപ്രദേശില്‍ സംഭവിച്ചത്. യാത്രികനെ നോക്കി തൊഴുതുനില്ക്കുന്ന പോലീസിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലായി മാറിയിരിക്കുകയാണ്. 

റോഡില്‍ വാഹനപരിശോധന നടത്തുന്നതിനിടെയാണ് സിഐ ബി. സുഭാഷ് കുമാര്‍ ആ കാഴ്ച കണ്ടത്. നിറയെ ആളുകളുമായി ഒരു ബൈക്ക്. കൈകാട്ടി വണ്ടി നിര്‍ത്തിയ അദ്ദേഹം ആളെ എണ്ണി. ഒന്ന്, രണ്ട്, മൂന്ന്, നാല്, അഞ്ച്.... ഓടിച്ചയാള്‍ക്ക് ഹെല്‍മറ്റുമില്ല.. ഒന്നും പറഞ്ഞിട്ട് കാര്യമില്ലെന്ന് മനസിലായ സിഐ നിസംഗനായി ഒന്നു നോക്കിയ ശേഷം ബൈക്ക് യാത്രികനെ നോക്കി തൊഴുത് അടിയറവ് പറഞ്ഞു. 

കെ. ഹനുമാന്തരായുഡു എന്നയാളാണ് ബൈക്ക് ഓടിച്ചത്. അദ്ദേഹത്തിന്റെ രണ്ടു മക്കളെ ബൈക്കിന്റെ പെട്രോള്‍ ടാങ്കിന്റെ മുകളിലും പിന്നില്‍ ഭാര്യയേയും ബന്ധുവായ ഒരു കുട്ടിയേയും ഇരുത്തിയായിരുന്നു യാത്ര. സിഐ ബി. സുഭാഷ് കുമാറിന്റെ നേതൃത്വത്തില്‍ നടന്ന റോഡ് സുരക്ഷാ ക്ലാസില്‍ ഹനുമന്തരായുഡുവും പങ്കെടുത്തിരുന്നു. അതിനു തൊട്ടുപിന്നാലെയാണ് ഈ നിയമലംഘനമെന്നതാണ് രസകരം. 

നിരാശയും നിസഹായതയുമാണ് ആ സമയം തനിക്ക് തോന്നിയതെന്നാണ് സിഐ പറയുന്നത്. ഹെല്‍മെറ്റ് പോലും ധരിക്കാതെ അദ്ദേഹം ബൈക്ക് ഓടിക്കുന്‌പോള്‍ ടാങ്കിലിരിക്കുന്ന കുട്ടികളുടെ കാലുകള്‍ ഹാന്‍ഡില്‍ ബാറിനിടയില്‍ കുടുങ്ങിയിരിക്കുകയായിരുന്നു. ഇതിനു മുന്പ് പലപ്രാവശ്യം നിയമം പാലിക്കാതെ അദ്ദേഹം ബൈക്ക് ഓടിക്കുന്നത് കണ്ടിട്ടുണ്ടെന്നും പോലീസുദ്യോഗസ്ഥര്‍ പറയുന്നു. 

കുഗ്രാമമായ ഇവിടെ റോഡ് സുരക്ഷയെക്കുറിച്ച് ആളുകള്‍ക്ക് യാതൊരു ധാരണയുമില്ല. കഴിഞ്ഞ നാലു മാസങ്ങളായി റോഡ് സുരക്ഷയെക്കുറിച്ചുള്ള ബോധവത്കരണം പോലീസ് ഈ പ്രദേശത്ത് നടത്തിവരികയാണ്. അമിത ഭാരം വച്ചുകൊണ്ട് യാത്ര ചെയ്യുന്‌പോഴുണ്ടാകുന്ന അപകടത്തിന്റെയും, ഹെല്‍മറ്റ് ധരിച്ചുള്ള യാത്രയുടെ പ്രാധാന്യത്തിനെ കുറിച്ചും, മറ്റ് റോഡ് സുരക്ഷയെക്കുറിച്ചുള്ള സന്ദേശവും വീഡിയോ ദൃശ്യങ്ങള്‍ കാണിച്ചുകൊണ്ടാണ് ബോധവത്ക്കരണം നടത്തിയിരുന്നത്. പക്ഷെ നിരാശയാണ് മിക്കപ്പോഴും ഫലമെന്നും ആരും നിയമം പാലിക്കുന്നില്ലെന്നും സി.ഐ ബി. സുഭാഷ് കുമാര്‍ പറഞ്ഞു.