അപകടങ്ങള്‍ തുടര്‍കഥയാവുകയാണ്. വിനോദയാത്രയ്ക്കു ശേഷം പുതുച്ചേരിയില്‍ നിന്നു ചെന്നൈയിലേക്കു മടങ്ങിയ ഐടി ജീവനക്കാരുടെ വാഹനം ലോറിയില്‍ ഇടിച്ച് മരിച്ചത് മലയാളി യുവതി ഉള്‍പ്പെടെ നാലു പേര്‍. അപകടത്തില്‍പ്പെട്ടത് ടെക്കികളാണ്. തൃശൂര്‍ അഞ്ചേരി വളര്‍ക്കാവ് നിവാസിയായ ഒറ്റപ്പാലം കല്ലുവഴിയില്‍ മേലെ വടക്കേമഠത്തില്‍ മുരളീധരന്റെ മകള്‍ ഐശ്വര്യ എം. നായരും (23) മൂന്നു സഹപ്രവര്‍ത്തകരുമാണു മരിച്ചത്. തിരുവനന്തപുരം സ്വദേശിനി അഖില നായര്‍ക്കു പരുക്കേറ്റു. അഖില അപകട നില തരണം ചെയ്തിട്ടുണ്ട്.

തമിഴ്‌നാട്ടുകാരായ ദീപക് ചക്രവര്‍ത്തി(22), പ്രശാന്ത് കുമാര്‍(25), ആന്ധ്ര സ്വദേശിനി മേഘ(23) എന്നിവരാണു മരിച്ച മറ്റുള്ളവര്‍. ചെന്നൈ സോണി എറിക്‌സണില്‍ ജോലിചെയ്തിരുന്ന ഇവര്‍ ആറുപേരും പുതുച്ചേരിയില്‍ പോയശേഷം കാറില്‍ മടങ്ങുമ്പോള്‍ ശനിയാഴ്ച രാവിലെയാണ് അപകടം. ദീപന്‍ ചക്രവര്‍ത്തിയാണ് കാറോടിച്ചിരുന്നത്. ഐശ്വര്യ, ദീപന്‍, പ്രശാന്ത്കുമാര്‍ എന്നിവര്‍ സംഭവസ്ഥലത്തുതന്നെ മരിച്ചു. ആശുപത്രിയിലേക്ക് കൊണ്ടുപോകുന്നതിനിടെ മേഘയും മരിച്ചു. എട്ടുമാസംമുന്‍പാണ് ഐശ്വര്യ സോണി എറിക്‌സണില്‍ സോഫ്റ്റ്‌വേര്‍ എന്‍ജിനീയറായി ചേര്‍ന്നത്.

ചെങ്കല്‍പേട്ടിനു സമീപം നിര്‍ത്തിയിട്ടിരുന്ന ലോറിയുടെ പിന്നില്‍ വിനോദയാത്രാ സംഘത്തിന്റെ കാര്‍ ഇടിക്കുകയായിരുന്നു. എല്ലാവരും എറിക്‌സണ്‍ ഇന്ത്യ ഗ്ലോബല്‍ സര്‍വീസ് കമ്പനി ജീവനക്കാരാണ്. ഐശ്വര്യയുടെ സംസ്‌കാരം നടത്തി. മാതാപിതാക്കള്‍ ഇന്തോനേഷ്യയിലാണ്.