ആരും കൊതിക്കുന്ന ജോലി! കാഡ്‌ബെറിയും ഓറിയോയും ചോക്ലേറ്റ് ടേസ്റ്റര്‍ ജോലിയിലേക്ക് ആളെ ക്ഷണിക്കുന്നു; ജോലി ഇതാണ്, ചോക്ലേറ്റ് രുചിക്കുക അതിനെക്കുറിച്ച് ഫീഡ്ബാക്ക് തയ്യാറാക്കുക!
ഇങ്ങനെയൊക്കെ ജോലി ഉണ്ടാകുമോ..? കേള്‍ക്കുമ്പോള്‍ ഒരു അത്ഭുതമൊക്കെ തോന്നുമെങ്കിലും സംഗതി സത്യമാണ്. ലോകത്തെ ലീഡിങ് ചോക്ലേറ്റ് ബ്രാന്‍ഡുകളിലുള്‍പ്പെടുന്ന മൊണ്ടേലിസിന്റെ ഉടമസ്ഥതയില്‍ വരുന്ന കാഡ്‌ബെറീസ്, ഓറിയോ, മില്‍ക്ക എന്നീ കമ്പനികളിലേക്കാണ് ഇത്തരമൊരു തസ്തികയിലേക്ക് അപേക്ഷ ക്ഷണിച്ചിരിക്കുന്നത്.
കമ്പനി ആവശ്യപ്പെടുന്നത് ഇത്രയേ ഉള്ളൂ, തങ്ങളുടെ ചോക്ലേറ്റ് ഉല്‍പ്പന്നങ്ങള്‍ രുചിച്ച് അതിനെക്കുറിച്ച് വ്യക്തമായ ഫീഡ്ബാക്ക് നല്‍കുകയും പുതിയ പ്രൊഡക്ടിന് വേണ്ട മാര്‍ഗ്ഗനിര്‍ദ്ദേശങ്ങള്‍ നല്‍കുകയും ചെയ്യുക.
തീര്‍ന്നില്ല, ഭാഗ്യം ഇനിയും കാത്തിരിപ്പുണ്ട്! ആഴ്ചയില്‍ അഞ്ചും ആറും ദിവസമൊന്നും ജോലിക്ക് പോകണ്ട. ചൊവ്വ,ബുധന്‍,വ്യാഴം ദിവസങ്ങളില്‍ ഏഴര മണിക്കൂറാണ് ജോലി.
'ചോക്ലേറ്റ് ആന്‍ഡ് കൊക്കോവ ബിവറേജ് ടേസ്റ്റര്‍' എന്നാണ് ജോലിയുടെ ഔദ്യോഗിക നാമം. ഈ ചോക്ലേറ്റ് രുചി ചെയ്യുന്ന വ്യക്തി 11 പാനെലിസ്റ്റുകളും ഒരു പാനല്‍ ലീഡറും ഉള്‍പ്പെടുന്ന സമിതിയുടെ മേല്‍നോട്ടത്തിലായിരിക്കും ജോലി ചെയ്യുക. കണ്‍സ്യൂമേര്‍ സയന്‍സ് ഡിസ്‌കഷന്‍ റൂമിലെ സെന്‍സറി ബൂത്തിലായിരിക്കും ജോലി നടക്കുക.
ഈ ടേസ്റ്റ് നടത്തുന്ന ആളുടെ അഭിപ്രായങ്ങളുടെ പിന്‍ബലത്തിലായിരിക്കും കമ്പനി പുതിയ ഉല്‍പ്പന്നങ്ങള്‍ പുറത്തിറക്കുന്നതിനെക്കുറിച്ച് ആലോചിക്കുക.
തസ്തികയിലേക്ക് അപേക്ഷിക്കുന്നവര്‍ ചോക്ലേറ്റ് ടേസ്റ്റിങ്ങില്‍ പ്രത്യേക പ്രാവീണ്യം നേടിയിരിക്കണമെന്നും പുതിയ പ്രൊഡക്ടുകള്‍ നിര്‍മ്മിക്കുന്നതിലേക്ക് മാര്‍ഗനിര്‍ദേശങ്ങള്‍ നല്‍കണമെന്നും കമ്പനി എടുത്ത് പറയുന്നു.
https://www.facebook.com/Malayalivartha
