പെയിന്റിംഗ് ബ്രഷുകള്‍ കൊണ്ട് ലോകത്തെ അദ്ഭുതപ്പെടുത്തുകയാണ്, ആദ്യാക്ഷരങ്ങള്‍ കുറിക്കാന്‍ പ്രായം പോലുമാകാത്ത ലോല ജൂണ്‍ എന്ന രണ്ടു വയസുകാരി. കഴിഞ്ഞ ആഴ്ച ന്യൂയോര്‍ക്കില്‍ സമാപിച്ച ചിത്രപ്രദര്‍ശനത്തില്‍ ലോലയുടെ ചിത്രങ്ങള്‍ വിറ്റുപോയത് പതിനായിരക്കണക്കിന് രൂപയ്ക്കാണ്.

ഇതില്‍ ഒരു ചിത്രത്തിന് ഒരു ലക്ഷം രൂപയും ലഭിച്ചു. കുഞ്ഞു പിക്കാസോ എന്ന ഓമനപ്പേരു ലഭിച്ച ഈ കൊച്ചു മിടുക്കിയുടെ, പ്രദര്‍ശനത്തിന് വച്ച 40 ചിത്രങ്ങളില്‍ 34 എണ്ണവും ദിവസങ്ങള്‍ക്കുള്ളില്‍ വിറ്റുപോയി.

ഒരു വയസു തികയും മുമ്പേ ചായങ്ങളോട് കൂട്ടുകൂടിയ ആളാണ് ലോല. പടം വരയ്ക്കാന്‍ ഒരു പേപ്പറും ബ്രഷും കുറച്ച് ചായങ്ങളും കൊടുത്താല്‍പ്പിന്നെ ലോലയ്ക്ക് മറ്റൊന്നും വേണ്ടെന്ന് അവളുടെ അമ്മ ജവിയര്‍ പറയുന്നു. ജവിയറിന്റെ കൂട്ടുകാരിയാണ് ലോലയുടെ ചിത്രകലാ പാടവം ആദ്യം തിരിച്ചറിഞ്ഞത്.

കുഞ്ഞുലോല വരച്ച ചിത്രങ്ങള്‍ അവര്‍ ന്യൂയോര്‍ക്ക് നഗരത്തിലുള്ള ഒരു ഗാലറി ഉടമയെ കാണിച്ചു. ചിത്രങ്ങള്‍ ഇഷ്ടപ്പെട്ട ഗ്യാലറി ഉടമ ഒരു പ്രദര്‍ശനം നടത്താനുള്ള അവസരം നല്‍കുകയായിരുന്നു. പ്രതീക്ഷ എന്നായിരുന്നു ലോലയുടെ ചിത്രപ്രദര്‍ശനത്തിന് നല്‍കിയ പേര്.

വ്യക്തമായ രൂപങ്ങളൊന്നുമല്ല ലോല വരയ്ക്കുന്നത്. തന്റെ കുഞ്ഞുകൈകളില്‍ ബ്രഷ് എടുത്ത് തനിക്ക് ഇഷ്ടമുള്ള നിറങ്ങളെല്ലാം കൂട്ടിക്കലര്‍ത്തുന്ന ഒരു കലാസൃഷ്ടി. അതാണ് ലോലയുടെ ചിത്രങ്ങള്‍.