എറണാകുളം ജില്ലയിലെ മാട്ടുപുറത്തുനിന്നും പ്രളയം ബാധിച്ച് അഭയം തേടിയെത്തിയവരെ എറണാകുളം മാഞ്ഞാലി കുന്നുംപുറമെന്ന പലഹാര ഗ്രാമം ഇരു കൈയ്യുംനീട്ടി സ്വീകരിച്ചു. തങ്ങള്‍ ഉണ്ണാതെ അവര്‍ പ്രളയബാധിതരെ ഊട്ടി.

അവര്‍ക്ക് ഉടുക്കാന്‍ വസ്ത്രങ്ങള്‍ നല്‍കി. ഉറങ്ങാന്‍ ഇടം നല്‍കി. ഉണ്ടാക്കിയ പലഹാരമെല്ലാം നല്‍കി, വിശപ്പെന്തെന്നറിയിക്കാതെ പോറ്റിയത് ഏഴു ദിവസം.

പെരിയാറില്‍ വെള്ളം ഉയര്‍ന്നുവന്നതോടെ മാട്ടുപുറത്തും മാഞ്ഞാലി തേലത്തുരുത്തിലുമുള്ളവരുടെ ലക്ഷ്യം പ്രദേശത്തുതന്നെയുള്ള ഉയര്‍ന്ന കെട്ടിടങ്ങളായിരുന്നു. എന്നാല്‍, പുഴയില്‍ ഉയര്‍ന്നുവരുന്ന വെള്ളം അവിടെയൊന്നും നില്‍ക്കില്ലെന്നറിഞ്ഞതോടെ എല്ലാവരും പലായനം തുടങ്ങി. ഒരേയൊരു ലക്ഷ്യം മാഞ്ഞാലി കുന്നുംപുറം. മാഞ്ഞാലി സ്‌കൂളിലൊരുക്കിയ ക്യാമ്പ് തികയാതെയായി.

ജുമാ മസ്ജിദിലും പാരിഷ് ഹാളിലും അങ്കണവാടിയിലുമെല്ലാം ക്യാമ്പ് തുടങ്ങി. അവിടേയും തിരക്കായതോടെ മറ്റു വീടുകളിലേക്ക് കയറിച്ചെന്നു. ഒരു വീട്ടില്‍ നാലു കുടുംബക്കാര്‍ വരെ തിങ്ങിനിറഞ്ഞെങ്കിലും കുന്നുംപുറത്തുകാരാരും പരിഭവം കാട്ടിയില്ല. പകരം അന്നം നല്‍കി പോറ്റുകയായിരുന്നു.

ക്യാമ്പുകളിലെത്തിയവര്‍്‌ക്കെല്ലാം എല്ലാ സഹായവും നല്‍കി. ആവശ്യങ്ങള്‍ ചോദിച്ചറിഞ്ഞ് സഹായിക്കാന്‍ കുന്നുംപുറത്തുകാര്‍ മത്സരിക്കുന്ന കാഴ്ചയാണ് കാണാന്‍ കഴിഞ്ഞത്. അതുപോലെ പല തുരുത്തുകളിലായി ഒറ്റപ്പെട്ടുപോയവരെ തേടിപ്പിടിച്ചുകൊണ്ടുവരുന്നതിനും നേതൃത്വം നല്‍കി അവര്‍.

ബിരിയാണിയുള്‍പ്പെടെ വിവിധ തരം പലഹാരങ്ങളുണ്ടാക്കി വില്‍പ്പന നടത്തുന്ന ധാരാളം തൊഴിലാളികളുള്ള ഇവിടത്തെ ദുരിതാശ്വാസ ജീവിതം നല്ലൊരു പാഠവും അനുഭവവുമായിരുന്നു.