ബീച്ചുകളുടെ സൗന്ദര്യത്തിനപ്പുറം കൊടുംവനങ്ങളും കാട്ടുമനുഷ്യരും സെല്ലുലാര്‍ ജയിലുമൊക്കെ ആന്‍ഡമാനിലെ കാഴ്ചകളാണ്.ആന്‍ഡമാനിന്റെ സൗന്ദര്യത്തിനു മാറ്റുകൂട്ടുന്നതേയുള്ളൂ, ചുറ്റും പരന്നു കിടക്കുന്ന നീലക്കടലും അടിത്തട്ടിലെ പവിഴപ്പുറ്റുകളും കടല്‍സസ്യങ്ങളും മല്‍സ്യങ്ങളുമൊക്കെ. ഹാവ്‌ലോക്ക്, ജോണ്‍ലോറന്‍സ്, ഹെന്റിലോറന്‍സ്, റോസ്, ബറാടങ് എന്നിങ്ങനെയാണ് അവിടുത്തെ ദ്വീപുകളുടെ പേരുകള്‍.

സുന്ദരമായ കാഴ്ചകള്‍ കൊണ്ട് സന്ദര്‍ശകരുടെ മനസ്സുകീഴടക്കുന്ന മറ്റു ദ്വീപുകളില്‍നിന്ന് അല്പം വ്യത്യസ്തമായ കാഴ്ചകളൊരുക്കുന്ന ദ്വീപാണ് ബറാടങ്. അവിടത്തെ ചുണ്ണാമ്പുകല്ലുകള്‍ നിറഞ്ഞ പുരാതന ഗുഹകള്‍ ആന്‍ഡമാനിലെത്തുന്ന സഞ്ചാരികളില്‍ വിസ്മയം ഉണര്‍ത്തും. പോര്‍ട്ട്‌ ബ്ലെയറില്‍നിന്നു 100 കിലോമീറ്റര്‍ വടക്കുമാറി, ഇന്ത്യയില്‍നിന്ന് ഏകദേശം 1300 കിലോമീറ്റര്‍ അപ്പുറത്താണ് ബറാടങ് ദ്വീപ്.

അതിസുന്ദരങ്ങളായ ബീച്ചുകളും കണ്ടല്‍ വനങ്ങളും അഗ്‌നിപര്‍വതങ്ങളുമൊക്കെ നിറഞ്ഞ ഈ ദ്വീപിന്റെ ഏറ്റവും വലിയ പ്രത്യേകത, ഇവിടുത്തെ ഗുഹകള്‍ തന്നെയാണ്.

ഇരുട്ടു നിറഞ്ഞ ഗുഹകളുടെ ഉള്ളില്‍ നിറയെ, ചുണ്ണാമ്പുകല്ലുകളില്‍ രൂപം കൊണ്ട ശിലകളാണ്. ഗവേഷകരും വിനോദ സഞ്ചാരികളും അടക്കം നിരവധിപ്പേരാണ് ഈ ശിലകള്‍ കാണാനെത്തുന്നത്.

ഗുഹകളുടെ അദ്ഭുതലോകത്തിലേക്കെത്തുന്നതിനു മുമ്പായി സന്ദര്‍ശകര്‍ക്കായി നിരവധി കാഴ്ചകള്‍ ബറാടങ്ങിലുണ്ട്. കടലിലൂടെ ഒന്നര കിലോമീറ്റര്‍ നീളുന്ന സ്പീഡ് ബോട്ട് യാത്രയും വനത്തിലൂടെയുള്ള ട്രെക്കിങ്ങുമൊക്കെ അതില്‍ ഉള്‍പ്പെടും. പോര്‍ട്ട്‌ബ്ലെയറില്‍ നിന്നാണ് ജറാവ ട്രൈബല്‍ റിസര്‍വിലേക്കുള്ള പാസ് ലഭിക്കുന്നത്.

നിശ്ചിത ഇടവേളകളില്‍ ഇവിടെ നിന്നു സന്ദര്‍ശകരെ വഹിച്ചുകൊണ്ട് വാഹനങ്ങള്‍ യാത്ര തിരിക്കും. യാത്രയ്ക്കിടെ വാഹനം നിര്‍ത്തുകയോ ചിത്രങ്ങള്‍ പകര്‍ത്താന്‍ അനുവദിക്കുകയോ ഇല്ല. ആ യാത്രയില്‍ ആന്‍ഡമാനിലെ അതിപുരാതന ഗോത്രവിഭാഗമായ ജറാവകളെ കാണാന്‍ സാധിച്ചേക്കാം. പുറംലോകത്തിനു മുമ്പില്‍ അധികമൊന്നും പ്രത്യക്ഷപ്പെടാത്ത ഇക്കൂട്ടരെ കാണുവാന്‍ കഴിയുന്നതു തന്നെ അപൂര്‍വഭാഗ്യമാണ്.