കേരളം പ്രളയക്കെടുതിയില്‍ മുങ്ങിക്കൊണ്ടിരുന്ന അവസരത്തില്‍ പേരും പ്രശസ്തിയും മറന്ന് ജനങ്ങള്‍ക്കൊപ്പം നിന്ന് അവര്‍ക്കു വേണ്ട കാര്യങ്ങള്‍ ചെയ്ത പ്രമുഖര്‍ വളരെയധികമുണ്ട്. അവരിലൊരാളാണ് മലയാള ത്തിലെ യുവനടന്‍ ടോവിനോ തോമസ്.

ജനങ്ങള്‍ക്കൊപ്പം നിന്ന് താരജാഡകളില്ലാതെ ഭക്ഷ്യവസ്തുക്കളും മറ്റും ടോവിനൊ ചുമന്ന് കൊണ്ട് സുരക്ഷിത സ്ഥാനത്ത് കൊണ്ടു വയ്ക്കുന്നതിന്റെ വീഡിയോ ദൃശ്യങ്ങള്‍ സാമൂഹ്യമാധ്യമങ്ങള്‍ ഇരുകൈയ്യും നീട്ടിയാണ് സ്വീകരിച്ചത്.

എങ്കില്‍ ഇപ്പോഴിതാ റിലീസിനൊരുങ്ങുന്ന ടോവിനോ തോമസിന്റെ ചിത്രമായ തീവണ്ടിയുടെ പോസ്റ്ററിന് ഒരാള്‍ നല്‍കിയ അഭിപ്രായത്തിന് ടോവിനോ നല്‍കിയ മറുപടിയാണ് നവമാധ്യമങ്ങള്‍ ഇരുകൈയ്യും നീട്ടി സ്വീകരിക്കുന്നത്.

'ദുരിത സമയത്ത് കൂടെ നിന്നതിനു ഒരായിരം നന്ദി പറയുന്നു. പക്ഷെ അതിന്റെ പേരില്‍ മാത്രം ഈ പടം കാണാന്‍ ഉദ്ദേശിക്കുന്നില്ല. (താങ്കളും അത് ആഗ്രഹിക്കുന്നില്ലെന്നറിയാം.) നല്ല പടം ആണെങ്കില്‍ തീര്‍ച്ചയായും കണ്ടിരിക്കും'. ഇതായിരുന്നു ടോവിനോ പങ്കുവച്ച പോസ്റ്ററിനു ചുവടെ ആരാധകരിലൊരാള്‍ നല്‍കിയ അഭിപ്രായം.

ഇതിനു മറുപടിയായി ടോവിനോ കുറിച്ചു. 'സത്യം. അങ്ങനയെ പാടുള്ളു. സിനിമ വേറെ ജീവിതം വേറെ'. ടോവിനോയുടെ മറുപടിയെ അഭിനന്ദിച്ച് നിരവധിയാളുകളാണ് രംഗത്തെത്തിയിരിക്കുന്നത്. ടി.പി. ഫെലിനി സംവിധാനം ചെയ്യുന്ന തീവണ്ടിയാണ് റിലീസിനൊരുങ്ങുന്ന ടോവിനോ ചിത്രം.