ടൈപ്പ് റൈറ്ററിന്റെ കീ-സ്ട്രോക്കിലൂടെ ചിത്രങ്ങള് വരയ്ക്കുന്ന ചന്ദ്രകാന്ത് ഭിഡേ; 50 വര്ഷത്തിനിടയില് വരച്ചെടുത്തത് 150-ലധികം ചിത്രങ്ങള്, ഗാന്ധി, നെഹ്റു, അമിതാഭ്, സച്ചിന് തെന്ഡുല്ക്കര്...
കമ്പ്യൂട്ടര് വന്നതോടെ ടൈപ്പ് റൈറ്ററിനെ എല്ലാവരും മൂലയിലേയ്ക്ക് തള്ളിയെങ്കിലും മുംബൈയിലെ ചന്ദ്രകാന്ത് ഭിഡേയ്ക്ക് ഇന്നും അതില് നിന്നും കൈയ്യെടുക്കാന് സമയമില്ല. 72-കാരനായ ഈ ടൈപ്പിസ്റ്റിന്റെ വിരലുകള് കീയിലൂടെ ചലിക്കുമ്പോള് പക്ഷേ പുറത്തുവരുന്നത് അക്ഷരങ്ങളല്ല, പ്രമുഖരുടെ ചിത്രങ്ങളാണ്.
സ്ഥിരം ജോലിയില് പുതുമ പരീക്ഷിച്ച മുംബൈയിലെ ചന്ദ്രകാന്ത് ഭിഡേ ടൈപ്പ് റൈറ്റര് ഉപയോഗിക്കുന്നത് ചിത്രം വരയ്ക്കാനാണ്. രാഷ്ട്രീയക്കാര് മുതല് സിനിമാ, ക്രിക്കറ്റ്, ആനിമേഷന് താരങ്ങളും മതചിഹ്നങ്ങളുമെല്ലാമായി ഇതിനകം 150-ല് പരം ചിത്രങ്ങളാണ് ഒരു പിഴവുമില്ലാത്ത അസാധാരണ പൂര്ണ്ണതയോടെ ഭിഡേ വരച്ചു പൂര്ത്തിയാക്കിയത്.
മഹാത്മാഗാന്ധിയും നെഹ്റുവും ഇന്ദിരാഗാന്ധിയും ചാര്ലി ചാപ്ലിനും ലോറല് ആന്റ് ഹാര്ഡിയുമെല്ലാം ടൈപ്പ് റൈറ്ററില് ചിത്രങ്ങളായി പെയ്തിറങ്ങി. ടൈപ്പ് റൈറ്ററില് ചിത്രം വരയ്ക്കുന്നത് തനിക്ക് ഹോബിയും പാഷനുമാണെന്ന് ഇയാള് പറയുന്നു.
കഴിഞ്ഞ അമ്പതു വര്ഷത്തിനിടയ്ക്ക് 12-ല് അധികം എക്സിബിഷനുകളിലൂടെ തന്റെ കലാചാതുരി വെളിപ്പെടുത്തിക്കഴിഞ്ഞു ഭിഡെ. പഠിക്കുന്ന കാലത്ത് ചിത്രകലാ സ്കൂളില് ചേര്ന്ന് വലിയൊരു ആര്ട്ടിസ്റ്റായി മാറണമെന്ന് ആയിരുന്നു ഭിഡെ ആഗ്രഹിച്ചിരുന്നതെങ്കിലും അതിന്റെ ചെലവ് താങ്ങാന് കുടുംബത്തിന് കഴിയുമായിരുന്നില്ല. ചിത്രകല പഠിക്കുന്നതിന് പകരം കുടുംബത്തിന് താങ്ങാകാന് വേണ്ടി പഠിച്ചത് സ്റ്റെനോഗ്രാഫിയായിരുന്നു.
യൂണിയന് ബാങ്കില് അഡ്മിനിസ്ട്രേറ്റീവ് ഡിപ്പാര്ട്ട്മെന്റിലായിരുന്നു ജോലി കിട്ടിയത്. 1967-ല് ഒരു ദിവസം തന്റെ ബോസ്, സ്റ്റാഫുകളുടെ ഇന്ര്കോം നമ്പറുകള് ടൈപ്പ് ചെയ്ത് തരാന് ഭിഡേയോട് ആവശ്യപ്പെട്ടു. ഇതില് എന്തെങ്കിലും വ്യത്യസ്തമായ രീതി പരീക്ഷിക്കാന് ആലോചിച്ച ഭിഡേ അത് ചെയ്തു കൊടുത്തത് ഒരു ടെലിഫോണിന്റെ ചിത്രമായിട്ടായിരുന്നു. അതുകണ്ടപ്പോള് ഒന്നാന്തരമായിരിക്കുന്നെന്ന് തോന്നിയ ഭിഡേ പിന്നീട് അവിടെ ടൈപ്പ് റൈറ്ററിലൂടെയുള്ള കലാപ്രതിഭാ വിലാസം തുടങ്ങി. ഒരിക്കല് വെറും എക്സ് എന്ന അക്ഷരം കൊണ്ടു മാത്രം ഗണപതിയെ സൃഷ്ടിച്ചു.
പിന്നീട് ഡബ്ല്യു ഉള്പ്പെടെയുള്ള മറ്റു കീ കൊണ്ടും പരീക്ഷണം തുടര്ന്ന ഭിഡേ ആംപ്രസന്റ്, പേര്സന്റേജ് ചിഹ്നങ്ങളെല്ലാം ഉപയോഗിച്ച് ഇന്ത്യയ്ക്ക് അകത്തും പുറത്തുമുള്ള സെലിബ്രിട്ടികളുടെ ചിത്രം വരച്ചു. പൂര്ണ്ണതയുള്ള ചിത്രങ്ങള് വരയ്ക്കാന് ഏറെ നേരം എടുക്കുന്ന ഭിഡേ ഗണപതിയുടെ ചിത്രം വരയ്ക്കാന് 15 മിനിറ്റാണ് എടുക്കുന്നത്. പ്രമുഖരുടെ മുഖം വരയ്ക്കല് ചിലപ്പോള് മണിക്കൂറുകളോളം വരുന്ന വേദനയേറുന്ന ജോലിയാണെന്നും ഭിഡേ പറയുന്നു. ഇത് ഏറെ ശ്രദ്ധയും സമര്പ്പണവും വേണ്ട ജോലിയാണെന്നും ഒരിടത്ത് വീഴുന്ന തെറ്റായ സ്ട്രോക്ക് പോലും വീണ്ടും ജോലി ആദ്യം മുതല് ചെയ്യാന് കാരണമാകുമെന്നും ഇയാള് പറയുന്നു. കമ്പ്യൂട്ടര് അല്ലാത്തതിനാല് ഡിലീറ്റ് ചെയ്യാന് കഴിയില്ല. മുമ്പ് പല തവണ തെറ്റു വന്നപ്പോഴും ആദ്യം മുതല് തുടങ്ങേണ്ടി വന്നിരുന്നു.
ഇതിനകം അമിതാഭ് ബച്ചനും ദീലീപ് കുമാറുമെല്ലാം ചിത്രങ്ങളായി. അമേരിക്കന് കാര്ട്ടൂണ് കഥാപാത്രങ്ങളായ മിക്കി മൗസ്, ആര്ച്ചി, ക്രിക്കറ്റ് താരങ്ങളായ ബ്രയന് ലാറ, സച്ചിന് തെന്ഡുല്ക്കര് തുടങ്ങിയവയെല്ലാം ഭിഡേയ്ക്ക് വരയ്ക്കാന് വിഷയമായി. ഇന്ത്യന് പത്രങ്ങള്ക്ക് നിരവധി തവണ ഫീച്ചറിന് വിഷയമായ ഭിഡേ ചിത്രം വരയ്ക്കുന്നത് വെറുതേ രസത്തിന് മാത്രം. പണത്തിന് വേണ്ടിയല്ലെന്നര്ത്ഥം. അമേരിക്കന് പ്രസിഡന്റ് ഡൊണാള്ഡ് ട്രംപ്, ബ്രിട്ടീഷ് രാജ്ഞി എലിസബത്ത് റാണി, പ്രധാനമന്ത്രി നരേന്ദ്രമോഡി എന്നിവരെ വരയ്ക്കാനാണ് ഭിഡേയുടെ അടുത്ത പദ്ധതി. 90-കളില് ജോലിയില് നിന്നും വിരമിച്ചപ്പോള് ബാങ്ക്, ഒരു രൂപയ്ക്ക് സമ്മാനമായി നല്കിയ ഹാല്ഡാ ടൈപ്പ്റൈറ്ററിലാണ് കഴിഞ്ഞ 30 വര്ഷമായുള്ള ചിത്രം വര.
https://www.facebook.com/Malayalivartha