ഒന്നായാണ് ജനിച്ചത്. സ്വതന്ത്രമായ യാതൊരു ചലനവും ഇല്ലാതെ ഒരുമിച്ച് ഒരു വര്‍ഷത്തിലധികം കഴിഞ്ഞു. ഇനി പിരിയണം. അതിനുള്ള തയ്യാറെടുപ്പിലാണ് നിമയും ദവയും. ഭൂട്ടാനിലെ ആദ്യ സയാമീസ് ഇരട്ടകളാണ് ഇവര്‍.

വയറുകളും, നെഞ്ചിന്റെ ഒരു ഭാഗവും പരസ്പരം ഒട്ടിച്ചേര്‍ന്ന നിലയിലായിരുന്നു ജനിച്ചത്. അവര്‍ക്കിരുവര്‍ക്കും തനിയെ യാതൊന്നും ചെയ്യാനാകില്ല.

2017 ജൂലൈ 13-നാണ് ഏറെ സങ്കീര്‍ണ്ണമായ സിസേറിയന്‍ ശസ്ത്രക്രിക്കു ശേഷം ഇവര്‍ പുറത്തുവരുന്നത്. പിന്നീട് 14 മാസം ഒരുമിച്ച്.

ഈ പിരിയല്‍ അനിവാര്യമായതു കൊണ്ടു തന്നെ അതിനുള്ള തയ്യാറെടുപ്പിലാണ് മാതാപിതാക്കള്‍. തന്റെ പെണ്‍മക്കള്‍ ജീവിതത്തിലേക്ക് ഊര്‍ജ്ജസ്വലരായി തിരിച്ചുവരുമെന്നാണ് പ്രതീക്ഷയെന്ന് ഇവര്‍ പറയുന്നു.

സന്നദ്ധസംഘടനകളുടെ സഹായത്തോടെയാണ് ശസ്ത്രക്രിയക്കുള്ള പണം കണ്ടെത്തിയത്. ഓസ്‌ട്രേലിയയിലെ മെല്‍ബണില്‍ അടുത്തയാഴ്ചയാണ് അടിയന്തര ശസ്ത്രക്രിയ.

ഈ ഭൂട്ടാന്‍ സഹോദരിമാരുടെ ശസ്ത്രക്രിയ നടത്തുന്നത് ബംഗ്ലാദേശില്‍ നിന്നുള്ള സയാമീസ് ഇരട്ടകളായ തൃഷ്ണയുടെയും കൃഷ്ണയുടെയും ശസ്ത്രക്രിയ 2009-ല്‍, വിജയകരമായി നടത്തിയ വിദഗ്ധ സംഘമാണ്.

അന്ന് 27 മണിക്കൂര്‍ നീണ്ട ശസ്ത്രക്രിയയാണ് ഇവര്‍ നടത്തിയത്. ഇത്തവണ എട്ട് മണിക്കൂര്‍ നീളുന്ന ശസ്ത്രക്രിയയാണ് ഉദ്ദേശിക്കുന്നതെന്ന് ഡോക്ടര്‍മാര്‍ അറിയിച്ചു.