പെരിയാര്‍ കടുവാസംരക്ഷണകേന്ദ്രം സന്ദര്‍ശിക്കവേ കാണാനിടയായ ഒരു ദൃശ്യത്തെക്കുറിച്ച് സാമൂഹികനീതിവകുപ്പ് സ്‌പെഷല്‍ സെക്രട്ടറി ബിജു പ്രഭാകര്‍ വിവരിക്കുന്നത് ഇങ്ങനെയാണ്.

വന്യജീവി ഫോട്ടോഗ്രഫി ഇഷ്ടപ്പെടുന്ന ഒരാള്‍ എന്ന നിലയില്‍ ഒരു കാടും ഒരിക്കലും നിരാശപ്പെടുത്തിയിട്ടില്ല. മിക്കപ്പോഴും അപ്രതീക്ഷിതമായ അനുഭവങ്ങള്‍ സമ്മാനിച്ചിട്ടുമുണ്ട്. അത്തരമൊരു അനുഭവമായിരുന്നു പെരിയാര്‍ കടുവാസംരക്ഷണകേന്ദ്രത്തില്‍ എന്നെ കാത്തിരുന്നത്.

പൊടുന്നനെയാണ് കാട്ടുനായകളുടെ കൂട്ടം (ഇന്ത്യന്‍ വൈല്‍ഡ് ഡോഗ് എന്നു ശാസ്ത്രീയനാമം, ചെന്നായയെന്നു പലരും പറയാറുണ്ടെങ്കിലും അതു ശരിയല്ല) മുന്നില്‍ പ്രത്യക്ഷപ്പെട്ടത്. കാട്ടില്‍ എവിടെനിന്നോ ഒരു മ്ലാവിനെ (സാംബാര്‍ ഡീര്‍) ഓടിച്ചുകൊണ്ടുവരികയായിരുന്നു. ക്യാമറ ഫോക്കസ് ചെയ്തപ്പോഴേയ്ക്കും മ്ലാവിനെ വെള്ളത്തിലിറക്കിയിരുന്നു.

15ഓളം നായകളുണ്ടായിരുന്നു അക്കൂട്ടത്തില്‍. സാധാരണ 12 മുതല്‍ 40 വരെ നായകളുണ്ടാകും ഒരു കൂട്ടത്തില്‍. ഇത് അച്ഛനും അമ്മയും മക്കളുമടങ്ങുന്ന സംഘമാണെന്നാണു തോന്നിയത്. തന്ത്രപരമായിരുന്നു ഓരോ നീക്കവും. മ്ലാവിനെ ഓടിച്ചു വെള്ളത്തിലിറക്കിയത് ഒരു തന്ത്രമായിരുന്നു. ആക്രമിക്കുന്നവരെ പ്രതിരോധിക്കാനുള്ള മ്ലാവിന്റെ ഏക ആയുധം പിന്‍കാലുകളാണ്. ഒരു തൊഴി കിട്ടിയാല്‍ വേട്ടക്കാരനു മിക്കവാറും പിന്നെ എണീറ്റുനടക്കാനാകില്ല. തൊഴിയുടെ സാധ്യത ഒഴിവാക്കാനാണ് മ്ലാവിനെ വെള്ളത്തിലിറക്കിയത്.

പൂര്‍ണവളര്‍ച്ചയെത്തിയ മ്ലാവ് ആയിരുന്നു അത്. നായകള്‍ക്ക് മ്ലാവിന്റെ കാലുകളുടെയത്ര ഉയരം പോലുമില്ല. വെള്ളത്തിലിറക്കിയ മ്ലാവിനെ കീഴ്‌പ്പെടുത്തലായിരുന്നു പിന്നീട്. ആറോ ഏഴോ പേരടങ്ങുന്ന ഒരു സംഘം നീന്തിച്ചെന്ന് മുന്നിലും പിന്നിലും വശങ്ങളിലുമായി ഒരേസമയം ആക്രമണം തുടങ്ങി. വേദനിച്ചു കരയുന്നുണ്ടായിരുന്നു മ്ലാവ്. കരയില്‍ കയറി രക്ഷപ്പെടാതിരിക്കാന്‍ മറ്റൊരു സംഘം കാവല്‍ നിന്നു.

ഇതിനിടെ ഞാന്‍ പടമെടുക്കുന്നതുകണ്ട കൂട്ടത്തിലെ ഇളംപ്രായക്കാരന്‍ എന്നെത്തന്നെ നിരീക്ഷിച്ചുകൊണ്ട് ഇരിപ്പായി. ഇടയ്ക്ക് മറ്റു ചിലര്‍ വന്ന് നിരീക്ഷണം നടത്തിപ്പോയി.

ആക്രമണത്തില്‍ തളര്‍ന്ന മ്ലാവിനെ വെള്ളത്തില്‍ മുക്കിക്കൊല്ലാനായി പിന്നീടുള്ള ശ്രമം. ആദ്യത്തെ നായകളുടെ സംഘം ക്ഷീണിച്ചപ്പോള്‍ അവര്‍ നീന്തി കരയ്ക്കു കയറി. കരയില്‍ നിന്നിരുന്ന സംഘം ഇറങ്ങി. ചെവിയിലും തലയിലും മുതുകത്തുമൊക്കെ കടിച്ച് വെള്ളത്തില്‍ മുക്കുക തന്നെയായിരുന്നു. കുടഞ്ഞ് രക്ഷപ്പെടാനുള്ള മ്ലാവിന്റെ ശ്രമങ്ങള്‍ പാഴായി. ഏതാണ്ട് ഒന്നരമണിക്കൂറോളം നീണ്ട ശ്രമത്തിനൊടുവില്‍ മൂന്നുതവണയായാണ് മ്ലാവിനെ കീഴ്‌പ്പെടുത്തിയത്.

ഇര ചാവാന്‍ കാത്തുനില്‍ക്കാതെ ചില നായകള്‍ മാംസം കടിച്ചെടുത്തു തീറ്റ തുടങ്ങിയിരുന്നു. പിന്നീട് എല്ലാവരും ചേര്‍ന്ന് കടിച്ചുവലിച്ച് മ്ലാവിനെ കരയിലെത്തിച്ചു. അപ്പോഴും ഫോട്ടോഗ്രഫറെ നിരീക്ഷിക്കാന്‍ ചുമതലപ്പെടുത്തിയവന്‍ ജോലിയില്‍ നിന്നു പിന്മാറിയിരുന്നില്ല...