മുംബൈയിലെ സല്‍മാന്‍ ഖാന്റെ വീടിനുനേരെ വെടിവെച്ച കേസിലെ പ്രതികളിലൊരാള്‍ ആത്മഹത്യ ചെയ്തു. 32 കാരനായ അനൂജ് ഥാപാന്‍ ആത്മഹത്യയ്ക്ക് ശ്രമിച്ചതായി നേരത്തെ മുംബൈ പോലീസ് അറിയിച്ചിരുന്നു. സല്‍മാന്‍ ഖാന്റെ ഗാലക്‌സി അപ്പാര്‍ട്ട്‌മെന്റിന് പുറത്ത് വെടിയുതിര്‍ത്ത രണ്ട് പ്രതികള്‍ക്ക് ആയുധം നല്‍കിയെന്നാരോപിച്ചാണ് 32 കാരനായ അനൂജ് ഥാപാനെ കേസില്‍ പ്രതിചേര്‍ത്തത്. കേസില്‍ നിലവില്‍ അന്വേഷണം പുരോഗമിക്കുകയാണ്.

പോലീസ് കസ്റ്റഡിയില്‍ ജീവിതം അവസാനിപ്പിക്കാന്‍ ഥാപാന്‍ ശ്രമിച്ചുവെന്നാണ് പോലീസ് പറയുന്നത്. സംഭവത്തിന് ശേഷം മുംബൈ ജിടി ആശുപത്രിയില്‍ പ്രവേശിപ്പിച്ച ശേഷം നില ഗുരുതരമായി തുടരുന്നതിനിടെയാണ് മരണം. ഏപ്രില്‍ 25 ന് പഞ്ചാബില്‍ നിന്ന് മറ്റൊരു പ്രതി സോനു സുഭാഷ് ചന്ദറിനൊപ്പം (37) ഥാപ്പനെ മുംബൈ പോലീസ് അറസ്റ്റ് ചെയ്തു.

ഏപ്രില്‍ 14ന് മുംബൈയിലെ ബാന്ദ്രയിലുള്ള ബോളിവുഡ് നടന്‍ സല്‍മാന്‍ ഖാന്റെ വീടിന് പുറത്ത് ബൈക്കിലെത്തിയ രണ്ട് അജ്ഞാതര്‍ നാല് റൗണ്ട് വെടിയുതിര്‍ത്തത് ശ്രദ്ധേയമാണ്. സംഭവത്തില്‍ ആര്‍ക്കും പരിക്കേറ്റിട്ടില്ല. പുലര്‍ച്ചെ 4.51 ഓടെ രണ്ട് പേര്‍ ഗാലക്സി അപ്പാര്‍ട്ട്മെന്റിന് പുറത്ത് നാല് റൗണ്ട് വെടിയുതിര്‍ത്തതോടെയാണ് സംഭവം നടന്നത്. വെടിവയ്പ്പ് നടക്കുമ്പോള്‍ സല്‍മാന്‍ ഖാന്‍ വീട്ടില്‍ ഉണ്ടായിരുന്നുവെന്ന് മുംബൈ പോലീസ് ഉദ്യോഗസ്ഥന്‍ പറഞ്ഞു.

സംഭവത്തെത്തുടര്‍ന്ന് വെടിവെപ്പ് നടത്തിയ വിക്കി ഗുപ്ത, സാഗര്‍ പാല്‍ എന്നിവരെ ഗുജറാത്തിലെ ഭുജില്‍ നിന്ന് മുംബൈ പോലീസ് കസ്റ്റഡിയിലെടുത്തു. അറസ്റ്റിലായ രണ്ട് ഷൂട്ടര്‍മാര്‍ മുഴുവന്‍ സംഭവത്തിലും തങ്ങളുടെ പങ്കിനെക്കുറിച്ച് ഇന്‍പുട്ട് നല്‍കിയതിനെത്തുടര്‍ന്ന് ഥാപാനെയും ചന്ദറിനെയും മുംബൈ പോലീസ് അറസ്റ്റ് ചെയ്തു. കേസില്‍ അറസ്റ്റിലായ എല്ലാ പ്രതികള്‍ക്കുമെതിരെ മുംബൈ പോലീസ് കര്‍ശനമായ മഹാരാഷ്ട്ര കണ്‍ട്രോള്‍ ഓഫ് ഓര്‍ഗനൈസ്ഡ് ക്രൈം ആക്ട് (എംസിഒസിഎ) പ്രയോഗിച്ചു.