നഷ്ടപ്പെട്ടത് 9 ദശലക്ഷം പൗണ്ട്, 250 പേരുടെ ജോലി... എല്ലാം ഒരക്ഷരം പിഴച്ചതിനാല്...
ഒരക്ഷരമല്ലേ മാറിയുള്ളൂ എന്ന് നമ്മള് തമാശയായി ചോദിക്കാറുണ്ടല്ലോ, ഒരക്ഷരം മാറിയതു മൂലം ജീവിതം വഴിയാധാരമായൊരാളെ പരിചയപ്പെടാം. എസ് എന്നൊരക്ഷരം കൂടിയതാണ് ആകെ പൊല്ലാപ്പായത്. അതുമൂലം ഇദ്ദേഹത്തിന് തന്റെ കമ്പനി തന്നെ പൂട്ടേണ്ടിവന്നു. യു.കെയിലെ വന് ബിസിനസ്സുകാരനായ ഫിലിപ്പ് ഡേവിസണ് മാലദ്വീപില് തന്റെ ഭാര്യയുടെ അന്പതാം പിറന്നാള് ആഘോഷിച്ചു കൊണ്ടിരിക്കുകയായിരുന്നു. അപ്പോഴാണ് ഇടതടവില്ലാതെ തന്റെ ഫോണിലേയ്ക്ക് വിളികള് വന്നു തുടങ്ങിയത്. എല്ലാം തന്റെ കമ്പനിയുടെ കസ്റ്റമേഴ്സ്. ഒട്ടും സൗഹാര്ദ്ദപരമായതായിരുന്നില്ല ആ കോളുകളൊന്നും. ഫിലിപ്പിന്റെ കമ്പനിയുമായി ചേര്ന്ന് ബിസിനസ് സംരംഭങ്ങളില് ഏര്പ്പെട്ടിരുന്നവരായ തങ്ങള്ക്ക്, നിങ്ങളുടെ കമ്പനി അടച്ചു പൂട്ടുന്നതു മൂലം ഇത്ര വലിയ നഷ്ടം നേരിടുന്ന സമയത്ത് നിങ്ങള്ക്ക് രാജ്യം വിട്ടു പോകാനും ഉല്ലസിക്കുവാനും എങ്ങനെ കഴിയുന്നുവെന്നായിരുന്നു അരിശത്തോടെയുള്ള ചോദ്യം.
ഒന്നും മനസ്സിലാകാതെ ഫിലിപ്പ്, കാര്ഡിഫിലുള്ള തന്റെ എഞ്ചിനീയറിംഗ് കമ്പനിയായ ടെയ്ലര് ആന്റ് സണ്സിലേയ്ക്ക് വിളിച്ചന്വേഷിച്ചു. യു.കെയില് രജിസ്റ്റര് ചെയ്യപ്പെട്ടിട്ടുള്ള എല്ലാ കമ്പനികളേയും കുറിച്ചുള്ള അന്തിമ തീരുമാനങ്ങളെടുക്കുന്ന എക്സിക്യൂട്ടീവ് ബോഡിയായ കമ്പനീസ് ഹൗസ്, ഫിലിപ്പിന്റെ കമ്പനിയായ ടെയ്ലര് ആന്റ് സണ്സിന്റെ പ്രവര്ത്തനം നിലച്ചതായി പ്രഖ്യാപിച്ചിരിക്കുന്നുവെന്ന് അപ്പോഴാണ് അറിഞ്ഞത്. അങ്ങനെ പാപ്പരായി പ്രഖ്യാപിക്കേണ്ട യാതൊരു സാഹചര്യവും തന്റെ കമ്പനിയിലില്ലല്ലോ, പിന്നെ എന്തുകൊണ്ട് ഇങ്ങനെ സംഭവിച്ചു എന്ന് ഫിലിപ്പിന് ഒരെത്തും പിടിയും കിട്ടിയില്ല.
എന്നാല് അപ്പോഴേക്കും ധനകാര്യ സ്ഥാപനങ്ങള് ടെയ്ലര് ആന്റ് സണ്സിന് നല്കി കൊണ്ടിരിക്കുന്ന ലോണുകളെല്ലാം നിര്ത്തുന്നതായി തീരുമാനമെടുത്തു കഴിഞ്ഞിരുന്നു. പുതിയ ഓര്ഡറുകള് നല്കിയിരുന്നവര് അത് പിന്വലിച്ചു, കമ്പനിയ്ക്കു വേണ്ട അവശ്യ വസ്തുക്കള് നല്കിയിരുന്നവര് തങ്ങള്ക്ക് കിട്ടേണ്ട പണം ആവശ്യപ്പെട്ടു തുടങ്ങി. കമ്പനിയുടെ സഹഉടമയും മാനേജിംഗ് ഡയറക്ടറുമായ ഫിലിപ്പിന് അത് ലോകാവസാനം പോലെയാണ് തോന്നിയത്. പിന്നീട് ഫിലിപ്പിന്റെ ഫോണില് നിന്നും പുറത്തേക്ക് വിളികള് ഒഴുകി. എല്ലാ സര്ക്കാര് ഡിപ്പാര്ട്ടുമെന്റുകളുമായും ബന്ധപ്പെട്ടു. ഒടുവില് ആ സത്യം തിരിച്ചറിഞ്ഞു. അടച്ചുപൂട്ടപ്പെട്ടത് യുകെയിലെ മാഞ്ചസ്റ്ററിലുള്ള ടെയ്ലര് ആന്റ് സണ് ലിമിറ്റഡ് എന്ന മറ്റൊരു കമ്പനിയാണ്. എന്നാല് ടെയ്ലര് ആന്റ് സണ്സ് ലിമിറ്റഡ് എന്ന ഫിലിപ്പിന്റെ കമ്പനിയുടെ പേരുമായി കമ്പനീസ് ഹൗസ് അതിനെ തെറ്റിദ്ധരിക്കുകയാണുണ്ടായത്.
ഒരു അക്ഷരപ്പിശകു വരുത്തിയ പ്രശ്നങ്ങളാണിതെന്ന് മൂന്നു ദിവസം കഴിഞ്ഞപ്പോള്തന്നെ എല്ലാവരെയും അറിയിച്ചു എങ്കിലും ഫിലിപ്പിന്റെ കമ്പനിയുടെ ഏറ്റവും വലിയ കസ്റ്റമര്മാരായിരുന്ന ടാറ്റാ സ്റ്റീല് അവരുടെ 3,72,00000 രൂപയുടെ കോണ്ട്രാക്റ്റും നാഷണല് ലൈഫ് ബോട്ട് ഇന്സ്റ്റിറ്റിയൂഷന് 27,90,00000 രൂപയുടെ കോണ്ട്രാക്റ്റും റദ്ദാക്കി കഴിഞ്ഞിരുന്നു.
ഒരു മാസം കൂടി കഴിഞ്ഞപ്പോള് കമ്പനിയ്ക്കു പ്രവര്ത്തിക്കാന് കാശില്ലാതായി. അതോടെ 134 വര്ഷത്തെ പ്രവര്ത്തന പാരമ്പര്യമുള്ള കമ്പനി അടച്ചു പൂട്ടാന് നിര്ബന്ധിതമായിത്തീര്ന്നു. സ്ഥാപനം പ്രവര്ത്തന രഹിതമായതോടെ അവിടെയുണ്ടായിരുന്ന 250 പേര് തൊഴില് രഹിതരുമായി. എല്ലാം സംഭവിച്ചത് ഒരക്ഷരത്തെറ്റു മൂലം. ഏതായാലും 6 വര്ഷത്തിനിപ്പുറം ഫിലിപ്പിന്റെ കമ്പനിയ്ക്ക് കമ്പനീസ് ഹൗസ് 8.8 ദശലക്ഷം ബ്രട്ടീഷ് പൗണ്ട് നഷ്ടപരിഹാരം കൊടുക്കണമെന്ന് കോടതി വിധിയായിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha