വിവാഹദിനം സമ്മാനിക്കുന്ന ഓര്‍മ്മകള്‍ ആരും അത്ര എളുപ്പമൊന്നും മറക്കാറില്ലല്ലോ. അന്നത്തെ നാളും തീയതിയുമൊക്കെ മറന്നെന്നു വരാം. എങ്കിലും അന്നു നടക്കുന്ന കാര്യങ്ങളൊക്കെ മനസ്സിനെ മധുരിപ്പിക്കുന്ന അനുഭവങ്ങളായി ഭൂരിപക്ഷം പേരുടെയും ഓര്‍മ്മച്ചെപ്പിലുണ്ടാവും.

യുകെയിലെ വെസ്റ്റ് യോര്‍ക്ക്ഷയറില്‍ റ്റി.വി അവതാരകനായ അലക്‌സ് സിമ്മണ്‍സിനും ഗേള്‍ഫ്രണ്ട് എമി ഇവിംഗിനും വിവാഹദിനത്തെക്കുറിച്ചുള്ള സ്മരണകള്‍ ഇനി അക്ഷരാര്‍ത്ഥത്തില്‍ ഇരട്ടിമധുരമുള്ളതായിരിക്കും.

ഒരു ചാരിറ്റി സമ്മേളനത്തില്‍ വച്ചാണ് 2014 ല്‍ 26 കാരിയായ നിയമ വിദ്യാര്‍ത്ഥി എമിയും 32 കാരനായ അലക്‌സും കണ്ടുമുട്ടിയത്. പ്രഥമ ദര്‍ശനത്തില്‍ തന്നെ പ്രണയബദ്ധരായ അവര്‍ 2015 അവസാനത്തോടെ വിവാഹിതരാകാന്‍ തീരുമാനിച്ചിരിക്കുകയായിരുന്നു. രണ്ടുപേരുടെയും രണ്ടാം വിവാഹമായതിനാല്‍ വലിയ ആര്‍ഭാടങ്ങളൊന്നുമില്ലാതെ വിവാഹം കഴിയ്ക്കാമെന്നാണ്  വിചാരിച്ചിരുന്നത്‌. രണ്ടുപേര്‍ക്കും ഈ രണ്ട് കുഞ്ഞുങ്ങള്‍ വീതമുണ്ട്.

അപ്പോഴാണ് ബ്രൈഡല്‍ഷോപ്പ് നടത്തുന്ന അബിലൂയിസിന്റെ വക ഒരു പരസ്യം അവര്‍ ഫെയ്‌സ്ബക്കില്‍ കണ്ടത്. വിവാഹാഘോഷവുമായി ബന്ധപ്പെട്ട് നിലവിലുള്ള രണ്ടു ലോക റെക്കോര്‍ഡുകള്‍ തകര്‍ക്കാന്‍ സന്നദ്ധരായ വധു-വരന്മാരെ തേടുന്നു എന്നതായിരുന്നു പരസ്യം. വിവാഹവേളയില്‍ വരനെ അനുഗമിക്കുന്ന അഷേഴ്‌സിന്റേയും വധുവിനെ അനുധാവനം ചെയ്യുന്ന ബ്രൈഡ്‌സ്‌മെയിഡിന്റേയും എണ്ണത്തിന്റെ കാര്യത്തിലെ ലോകറെക്കോര്‍ഡാണ് തകര്‍ക്കേണ്ടത്. 2003 ല്‍ കാനഡയില്‍ വച്ചു നടന്ന അരുളനന്ദം സുരേഷ് ജൊയാക്കിമിന്റെ വിവാഹത്തിനുണ്ടായിരുന്ന 47 അഷേഴ്‌സ് എന്നതാണ് നിലവിലെ ലോകറെക്കോര്‍ഡ്. 2013 ല്‍ ശ്രീലങ്കയില്‍ വച്ചു നടന്ന ചംപികാ ഷിറാനി സിരിവര്‍ധനയുടെ വിവാഹത്തിനുണ്ടായിരുന്ന 126 ബ്രൈഡ്‌സ്‌മെയ്ഡ് എന്നതാണ് ആ കാര്യത്തില്‍ നിലവിലുള്ള ലോക റെക്കോര്‍ഡ്.

ഇത്ര ആര്‍ഭാടമായി വിവാഹം നടത്താനുള്ള സാമ്പത്തിക സ്ഥിതി ഇല്ലെങ്കിലും ഫേസ്ബുക്ക് മല്‍സരത്തില്‍ ജയിച്ചാല്‍ 1,10,000 പൗണ്ട് ( 1 കോടി 23 ലക്ഷം ഇന്ത്യന്‍ രൂപ) ആണ് സമ്മാനമായി കിട്ടുന്നത്. അതു കൂടാതെ വിവാഹത്തിന്റെ സമസ്ത ചെലവും അബി ലൂയിസിന്റെ കമ്പനി വഹിക്കുകയും ചെയ്യും. ഏതായാലും എമിയും അലക്‌സും മല്‍സരത്തില്‍ വിജയിച്ചെന്നു പറഞ്ഞാല്‍ മതിയല്ലോ.

ബാക്കിയെല്ലാം അബി ലൂയിസ് ചെയ്തു. 130 ബ്രൈഡ്‌സ്‌മെയ്ഡും(126 മുന്‍ റെക്കോര്‍ഡ്), 100 അഷേഴ്‌സുമാണ് (47 മുന്‍ റെക്കോര്‍ഡ്) അവരുടെ വിവാഹത്തിനുണ്ടായിരുന്നത്. രണ്ടു റെക്കോര്‍ഡുകളും കൂടി ഒറ്റ വിവാഹത്തില്‍ വച്ചു തകര്‍ക്കാന്‍ ശ്രമിച്ചത് ആദ്യമായാണ്. റെക്കോര്‍ഡ് അംഗീകരിച്ചു കിട്ടണമെങ്കില്‍ ഓരോ ബ്രൈഡ്‌സ്‌മെയിഡിന്റേയും അഷറിന്റേയും വ്യക്തിപരമായ വിവരങ്ങളെല്ലാം വധു-വരന്മാര്‍ അറിഞ്ഞിരിക്കണമെന്ന് വ്യവസ്ഥയുണ്ടായിരുന്നു. എല്ലാം വിജയകരമായി തന്നെ ചെയ്തു. ഗിന്നസ് ബുക്ക് ഓഫ് വേള്‍ഡ് റിക്കോര്‍ഡിന്റെ അധികൃതര്‍ എമിയുടെയും അലക്‌സിന്റെയും വിവാഹ വിശേഷങ്ങള്‍ പുതിയ റെക്കോര്‍ഡായി അംഗീകരിച്ചു. ഇരട്ട റെക്കോര്‍ഡിന്റെ ഇരട്ടി മധുരം കൂടി ഇനി ഇവര്‍ക്കു സ്വന്തം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക