കടശ്ശി കണ്മണിയെപ്പോലെയാകാന് അച്ഛനുമമ്മയും ദേഹത്ത് ടാറ്റൂ ചെയ്തു!
ആദ്യത്തെ കണ്മണിയെക്കുറിച്ച് എല്ലാ മാതാപിതാക്കള്ക്കും നിറയെ സങ്കല്പ്പങ്ങളുണ്ടായിരിക്കും. ആദ്യത്തെകുഞ്ഞ് ആണായിരിക്കണമെന്നോ വെളുത്തതായിരിക്കണമെന്നോ, അച്ഛനെപ്പോലെയിരിക്കണമെന്നോ ഒക്കെ സ്വപ്നങ്ങള് കാണാത്തവരുണ്ടാകില്ല.
യു.കെ.യിലെ ഗ്രിംസ്ബിയിലെ ടാന്യക്കും ആഡത്തിനും നാലു മക്കാളാണുള്ളത്. നാലാമത്തെ മകളായ ഹണിറേയുടെ ജനനദിവസത്തേക്കുറിച്ച് ഓര്ക്കുമ്പോള് ഇപ്പോഴും ടാന്യയുടെ മനസ്സ് സങ്കടം കൊണ്ട് നിറയും. ശ്വാസം കഴിക്കാന് തന്നെ വല്ലാതെ ബുദ്ധിമുട്ടിയ കുഞ്ഞിനെ പിറന്നയുടന്തന്നെ സ്പെഷല് കെയര് യൂണിറ്റിലെ ഇന്കുബേറ്ററില് പ്രവേശിപ്പിച്ചു.
അതിനുള്ളില് കിടക്കുന്ന കുഞ്ഞിനെ ആദ്യമായി കാണാനെത്തിയ ടാന്യയുടെ കണ്ണുകള് പെട്ടെന്ന് പതിഞ്ഞത്, ചരിഞ്ഞുകിടന്നുറങ്ങുന്ന കുട്ടിയുടെ വലതുകാലിന്റെ പിന്നില് പാദം മുതല് മുതുകുവരെ പടര്ന്നുകിടക്കുന്ന പിങ്ക് നിറമുള്ള മറുകിലാണ്. കാല് മറഞ്ഞുകിടക്കുന്ന തരത്തിലുള്ള വസ്ത്രങ്ങള് ധരിച്ചില്ലെങ്കില് ജീവിതകാലം മുഴുവന് അവള്ക്ക് മറ്റുള്ളവരില് നിന്നുള്ള കളിയാക്കലുകള് നേരിടേണ്ടിവരുമല്ലോയെന്നോര്ത്ത് ടാന്യക്ക് വല്ലാത്ത ആശങ്കയായി. അന്നുമുഴുവന് അവര് കരഞ്ഞു.
പിന്നീട് ഹണിറേ-യേയും കൊണ്ട് പുറത്തുപോകുമ്പോഴെല്ലാം ശരീരം മൂടുന്ന വസ്ത്രം ധരിപ്പിക്കാന് പ്രത്യേകം ശ്രദ്ധിച്ചിരുന്നു. കാരണം \' അയ്യോ...കഷ്ടം\' എന്ന മട്ടില് തന്റെ കുഞ്ഞിനെ ആരും നോക്കരുതെന്ന് അവര് ആഗ്രഹിച്ചു.
ഹണിറേ-ക്ക് ഒരു വയസ്സ് തികയുന്നതിന് അല്പദിവസം മുന്പ് കുഞ്ഞിനേയുംകൊണ്ട് പുറത്തുപോയപ്പോള് മനപൂര്വ്വം കാലുകള് പുറത്തുകാണുന്ന തരത്തിലുള്ള വസ്ത്രമാണ് ധരിപ്പിച്ചത്. ഹണിറേ-യെ ഷോപ്പിംഗ് മാളില് നടക്കാന്വിട്ടിട്ട് അല്പം മാറിനിന്ന് ആളുകളുടെ പ്രതികരണം എങ്ങനെയാണെന്ന് നിരീക്ഷിച്ചു. അപ്പോഴാണ് ഒരു ദമ്പതികളിലൊരാള് ഹണിറേ-യെ ചൂണ്ടിക്കാട്ടി തന്റെ പങ്കാളിയോട് രഹസ്യം പറയുന്നത് കണ്ടത്.
അതോടെ അതുവരെ ടാന്യക്കുണ്ടായിരുന്ന ഭയങ്ങള് സത്യമാണെന്ന് ഉറപ്പായി. ജീവിതകാലം മുഴുവന് തന്റെ മകള് താന് മറ്റുള്ളവരില് നിന്നും വ്യത്യസ്തയാണെന്ന ചിന്താഗതിയോടെ വളരുകയും, അത് അവളുടെ വ്യക്തിത്വവികാസത്തെത്തന്നെ ദോഷകരമായി ബാധിക്കുകയും ചെയ്യുമെന്ന കാര്യം ടാന്യക്ക് ബോധ്യപ്പെട്ടു. അന്നു തന്നെ ടാന്യയും ആഡമും ഒരു തീരുമാനമെടുത്തു. തങ്ങളുടെ മകളുടെ ശരീരത്തിലുള്ള മറുകിനു സമാനമായി, തങ്ങളുടെ പാദം മുതല് മുതുകുവരെ ടാറ്റൂ ചെയ്യുവാന് ഉറപ്പിച്ചു. അങ്ങനെ ആ അച്ഛനുമമ്മയും അവരുടെ അവസാനകണ്മണിയെപ്പോലെയായി മാറി.
അച്ഛന്റേയും അമ്മയുടേയും കാലുകളിലും തന്റെ കാലിലേതുപോലുള്ള പാടുകള് ചെറുപ്പം മുതലേ കണ്ടുവളര്ന്നാല്, പാടുകളും അടയാളങ്ങളുമില്ലാത്തതായിരിക്കണം കാലുകള് എന്ന ചിന്ത അവളുടെ മനസ്സില് വേരൂന്നില്ല എന്ന സത്യം ആഡമും ടാന്യയും മനസ്സിലാക്കി. അതുകൊണ്ടുതന്നെ ഒരാളിന്റെ ഉള്ളിലെ സൗന്ദര്യത്തിന്റേയും ചിന്താരീതികളുടേയും പ്രതിഫലനമാണ് ഒരാളുടെ വ്യക്തിത്വം എന്ന യാഥാര്ത്ഥ്യം തിരിച്ചറിയാന് ഹണിറേ-ക്ക് ചെറുപ്പത്തില്തന്നെ കഴിയുമെന്നതിനാല് പക്വതയുള്ള ജീവിതദര്ശനമുണ്ടാകുമെന്ന് തീര്ച്ചയായും ഉറപ്പിക്കാം.
അച്ഛന്റേയും അമ്മയുടേയും പാദങ്ങളിലെ ടാറ്റൂ-വും തന്റെ മറുകും തൊട്ടുകാണിച്ചിട്ട് ഹണിറേ ഈയിടെ പറഞ്ഞു, \'സെയിം പിന്ച്\' എന്ന്! തങ്ങള് എടുത്ത തീരുമാനം ശരിയായിരുന്നുവെന്ന് ആഡമും ടാന്യയും തിരിച്ചറിഞ്ഞ നിമിഷമായിരുന്ന് അത്!
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha