എന്നെ എന്തു വേണമെങ്കിലും ചെയ്‌തോ എന്റെ മുടി മുറിക്കരുത് എന്ന് വിതുമ്പുന്ന കൊക്കെയ്ന്‍ കേസില്‍പ്പെട്ട് എറണാകുളം സബ് ജയിലില്‍ റിമാന്‍ഡിലുള്ള സിനിമാ താരം ഷൈന്‍ ടോം ചാക്കോയുടെ അപേക്ഷ തന്ത്രമെന്ന് വിലയിരുത്തല്‍. ഷൈന്‍ ടോമിന്റെ തലമുടി മുറിച്ചത് അന്വേഷണം അട്ടിമറിക്കാനെന്നു സൂചന. കൊക്കെയ്ന്‍ ഉപയോഗിച്ച വ്യക്തിയുടെ മുടിത്തുമ്പില്‍ അതിന്റെ അംശം മൂന്നു മാസം വരെ നിലനില്‍ക്കും. ഈ പരിശോധന ഒഴിവാക്കാനായാണ് ജയില്‍ ദിനാഘോഷത്തിന്റെ മറവില്‍ താരത്തിന്റെ മുടി മുറിച്ചതെന്നാണു വിവരം.
അഞ്ചു പ്രതികളുടെയും രക്തസാമ്പിളുകളില്‍ കൊക്കെയ്‌നിന്റെ അംശമില്ലെന്ന കാക്കനാട് റീജണല്‍ കെമിക്കല്‍ എക്‌സാമിനേഷന്‍ ലാബിന്റെ റിപ്പോര്‍ട്ട് കഴിഞ്ഞ ദിവസം പുറത്തുവന്നിരുന്നു. മുടിത്തുമ്പാണ് പരിശോധനയ്ക്കു ലഭിച്ചിരുന്നതെങ്കില്‍ കൃത്യമായ റിപ്പോര്‍ട്ട് കിട്ടുമായിരുന്നുവെന്നാണ്‌ലാബ് അധികൃതരുടെ വെളിപ്പെടുത്തല്‍.
രക്തം, മൂത്രം, മുടിത്തുമ്പ് എന്നിവ പരിശോധിച്ചാല്‍ ശരീരത്തിലെ കൊക്കെയ്ന്‍ അംശം കണ്ടെത്താനാകും. രക്തത്തില്‍ മണിക്കൂറുകള്‍ മാത്രമേ കൊക്കെയ്ന്‍ അംശം നിലനില്‍ക്കുകയുള്ളു. മൂത്രത്തില്‍ 23 ദിവസവും മുടിത്തുമ്പില്‍ മൂന്നു മാസം വരെയും നിലനില്‍ക്കും. സിനിമാതാരമടക്കമുള്ള സംഘത്തെ പിടികൂടി 24 മണിക്കൂറിനു ശേഷമാണ് രക്തസാമ്പിളുകള്‍ ലാബിലെത്തിച്ചത്. 
രക്തത്തില്‍ കലര്‍ന്ന് ഒന്നര മണിക്കൂറിനുള്ളില്‍ കൊക്കെയ്ന്‍ അംശം പകുതിയാകുമെന്നു മനസിലാക്കിയാണ് രക്തം ലാബില്‍ എത്തിക്കാന്‍ വൈകിച്ചത്. അഞ്ചു മില്ലിയില്‍ താഴെ രക്തസാമ്പിളുകളാണ് പോലീസ് ലാബില്‍ നല്‍കിയത്. രക്തത്തില്‍ കൊക്കെയ്‌നിന്റെ അംശം കണ്ടെത്തുന്നതിന് ഗ്യാസ് ക്രോമറ്റോഗ്രാഫി ടെസ്റ്റാണ് കാക്കനാട് ലാബില്‍ നടത്തിയത്. എന്നാല്‍ പ്രതികള്‍ കൊക്കെയ്ന്‍ ഉപയോഗിച്ചോ എന്ന് വ്യക്തമാകണമെങ്കില്‍ എച്ച്.പി.എല്‍.സി. ടെസ്റ്റ് നടത്തണമെന്നാണു പോലീസ് നിലപാട്. എച്ച്.പി.എല്‍.സി. ഉപകരണം ഉപയോഗിച്ച് നടത്തുന്ന പരിശോധനയേക്കാള്‍ ആധുനികവും ശാസ്ത്രീയവുമാണ് ജി.സി.എം.എസ്. ഉപയോഗിച്ചുള്ള പരിശോധന. ഡല്‍ഹിയിലെ നാഷണല്‍ ഫോറന്‍സിക് ലാബില്‍ പരിശോധന നടത്താനാണ് പോലീസ് തീരുമാനം. ലാബില്‍ നിന്നു കോടതിയില്‍ തിരിച്ചേല്‍പിച്ചിട്ടുള്ള ശേഷിക്കുന്ന രക്തസാമ്പിളുകള്‍ ഇതിനായി ഉടന്‍ ഡല്‍ഹിയിലേക്കയയ്ക്കും. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha