യുഎസ് എ യിലെ ഇലിനോയിസിലുള്ള റാന്‍ഡി ഷ്മിറ്റ്‌സ് എന്ന മുപ്പതുകാരന്‍ കുടുംബവുമൊത്ത് സൗത്ത് കരോലിനയിലെ മിര്‍ട്ടലെ ബിച്ചില്‍ ഒഴിവുകാലം ആഘോഷിക്കാന്‍ പോയത് കുറച്ചുനാള്‍ മുമ്പാണ്. പക്ഷേ ജീവിതത്തിലൊരിക്കലും മറക്കാനാവാത്ത ഒരു അനുഭവമായി അയാള്‍ക്കത് മാറി.

കടല്‍ത്തീരത്ത് ഉല്ലസിച്ചു നടക്കുന്നതിനിടെ പെപ്പര്‍ പാലസ് എന്ന പേരുള്ള ഒരു സോസ് കടയുടെ മുന്നിലെത്തി. അവിടെ അപ്പോള്‍ ഹോട്ട് സോസ് ചലഞ്ച് എന്ന ഒരു തീറ്റ മത്സരം നടക്കുന്നു. ഈ പ്രപഞ്ചത്തില്‍ തന്നെ ഏറ്റവും എരിവു കൂടിയ മുളകിനങ്ങളായ കരോലിന റീപ്പര്‍, സ്‌കോര്‍പിയോണ്‍, ജൊലോകിയ ( ഗോസ്റ്റ്), ഹെബാനെറോ പെപ്പര്‍ എന്നിവയെല്ലാം കൂടി ചേര്‍ത്തുണ്ടാക്കിയ ഫ്‌ളാഷ്ബാങ് എന്ന ചില്ലിസോസ് കഴിക്കുക എന്നതാണ് മത്സരം. എരിവിന്റെ പൂരമാണ് ആ സോസ് എന്ന് പ്രത്യേകം പറയേണ്ടല്ലോ.

മത്സരത്തിന്റെ സംഘാടകര്‍ അതിന്റെ എരിവിനെ കുറിച്ച് മല്‍സരാര്‍ത്ഥികളെ പ്രത്യേകിച്ച് ഓര്‍മ്മപ്പെടുത്തുന്നുണ്ടായിരുന്നു. ഒരു ചെറിയ ടൂത്ത്പിക്ക് കൊണ്ട് ആ സോസിലൊന്ന് തൊട്ടതിനുശേഷം അത് രുചിച്ചു നോക്കിയിട്ട് കഴിക്കണോ വേണ്ടയോ എന്ന് തീരുമാനിച്ചാല്‍ മതി. റാന്‍ഡിയും സോസ് ഒന്നു രുചിച്ചു നോക്കാന്‍ തീരുമാനിച്ചു.

ഫ്‌ളാഷ് ബാങ് സോസില്‍ ടൂത്ത് പിക്ക് മുക്കിയിട്ട് ഒന്നു നാവില്‍ തൊട്ടു വച്ചു റാന്‍ഡി. ആകപ്പാടെ ഒരു പരവേശം. ഛര്‍ദ്ദിക്കാതെ അഞ്ചു മിനിറ്റ് പിടിച്ചു നിന്നതോര്‍മ്മയുണ്ട് റാന്‍ഡിക്ക്. പിന്നെ കണ്ണു തുറന്നപ്പോള്‍ ആശുപത്രിയിലാണ്. ചുറ്റും നിന്നവരോട് റാന്‍ഡി കാര്യം തിരക്കിയപ്പോഴാണറിഞ്ഞത്. ചില്ലി സോസ് കഴിച്ച റാന്‍ഡി അഞ്ചു മിനിറ്റ് കഴിഞ്ഞതോടെ ബോധംകെട്ടു വീണെന്ന്!

അവിടം കൊണ്ടും തീര്‍ന്നില്ല റാന്‍ഡിയുടെ ദുരിതം. ബോധം വീണ്ടു കിട്ടിയ ഉടനെ വല്ലാത്ത വിറയല്‍ ബാധിച്ചു. അതോടെ ഡോക്ടര്‍മാര്‍ എം ആര്‍ ഐ സ്‌കാന്‍ നടത്താന്‍ നിര്‍ദ്ദേശിച്ചു. ഉര്‍വ്വശീശാപം ഉപകാരമായെന്നു പറഞ്ഞാല്‍ മതിയല്ലോ! സ്‌കാന്‍ ചെയ്തപ്പോള്‍ റാന്‍ഡിയ്ക്ക് ബ്രെയിന്‍ കാന്‍സറുണ്ടെന്ന് കണ്ടെത്തി. ഭാഗ്യത്തിന് അത് ക്യാന്‍സറിന്റെ ആരംഭദശയായിരുന്നതിനാല്‍ തലച്ചോറിലെ മുഴ ശസ്ത്രക്രിയയയിലൂടെ നീക്കം ചെയ്തതിനാല്‍ റാന്‍ഡി ക്യാന്‍സറില്‍ നിന്നും രക്ഷപ്പെട്ടു.

റാന്‍ഡിയുടെ കഥ അറിഞ്ഞപ്പോള്‍ ഒരു ചില്ലിസോസിന് ജീവിതത്തെ ഇങ്ങനെ മാറ്റി മറിക്കാന്‍ കഴിയുമെന്നറിഞ്ഞത് അത്ഭുതപ്പെടുത്തുന്നുവെന്നും, തങ്ങളുടെ ഷോപ്പ് ഈ ജീവിതകഥയുടെ ഭാഗമായതില്‍ സന്തോഷമുണ്ടെന്നും പെപ്പര്‍ പാലസിന്റെ സിഇഒ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha