റഷ്യയില്‍ നിന്നുള്ള യുറേനിയം ഇറക്കുമതിക്ക് നിരോധനമേര്‍പ്പെടുത്തി യു.എസ്. ഇതിനുള്ള ബില്ലില്‍ പ്രസിഡന്റ് ബൈഡന്‍ ഒപ്പുവെച്ചു. യുക്രെയ്ന്‍ അധിനിവേശം തുടരുന്ന റഷ്യക്കുമേല്‍ കൂടുതല്‍ സമ്മര്‍ദം ചെലുത്താന്‍ ലക്ഷ്യമിട്ടാണ് യു.എസ് നടപടി. 90 ദിവസത്തിനുള്ളില്‍ യു.എസ് ആണവനിലയങ്ങളിലേക്കുള്ള യുറേനിയം റഷ്യയില്‍ നിന്നും ഇറക്കുമതി ചെയ്യുന്നത് ഒഴിവാക്കും.

യുറേനിയം ലഭിക്കുന്നതിന് എന്തെങ്കിലും ബുദ്ധിമുട്ടുണ്ടായാല്‍ ഇതില്‍ ഇളവുകള്‍ അനുവദിക്കുന്നതിന് യു.എസ് ഊര്‍ജ വകുപ്പിന് അനുമതിയുണ്ടാകും.

യുറേനിയത്തിന്റെ ഏറ്റവും വലിയ വിതരണക്കാരില്‍ ഒരാളാണ് റഷ്യ. യു.എസ് ആണ് റഷ്യ വിതരണം ചെയ്യുന്ന യുറേനിയത്തിന്റെ 24 ശതമാനവും ഉപയോഗിക്കുന്നത്. റഷ്യയുടെ യുക്രെയ്ന്‍ അധിനിവേശം നടന്ന് ആഴ്ചകള്‍ക്കകം തന്നെ അവിടെ നിന്നുള്ള എണ്ണയുടെയും ഗ്യാസിന്റേയും ഇറക്കുമതി യു.എസ് കുറച്ചിരുന്നു.

റഷ്യക്ക് വിദേശനാണ്യം ലഭിക്കുന്നത് ഒഴിവാക്കുക ലക്ഷ്യമിട്ടായിരുന്നു യു.എസ് നടപടി. റഷ്യക്കും പിന്നെയും യു.എസും സഖ്യരാജ്യങ്ങളും ഉപരോധങ്ങള്‍ ഏര്‍പ്പെടുത്തിയിരുന്നു.എന്നാല്‍, ആണവനിലയത്തിന്റെ പ്രവര്‍ത്തനം താളംതെറ്റുമെന്ന ഭയം കൊണ്ടാണ് യു.എസ് ഇത്രയും നാള്‍ യുറേനിയം ഇറക്കുമതിക്ക് നിരോധനമേര്‍പ്പെടുത്താതിരുന്നത്.

രാജ്യത്തെ 93 ആണവനിലയങ്ങളിലും റഷ്യന്‍ ഇന്ധനം ഉപയോഗിക്കുന്നുണ്ട്. ഇറക്കുമതി നിരോധിച്ചാല്‍ ഇവയുടെ പ്രവര്‍ത്തനം നിലക്കുമെന്ന് യു.എസിന് ആശങ്കയേറുന്നു.