ചുമട്ടു തൊഴിലാളിയായ ഷാജി പാറവിളയാണ് അഞ്ചല്‍ , ഏരൂര്‍ പഞ്ചായത്തിന്റെ വിളക്കുപാറയിലെ സാമൂഹിക അടുക്കളയിലെ താരം.

അടുക്കളയുടെ പ്രധാന ചുമതലക്കാരില്‍ ഒരാളായ ഷാജി ജന്മനാ ഭിന്ന ശേഷിക്കാരനാണ്. വിറക് ശേഖരണം, വിറക് കീറല്‍, പാത്രങ്ങള്‍ വൃത്തിയാക്കല്‍ തുടങ്ങിയ അടുക്കളയിലെ കഠിനമായ ജോലികള്‍ എല്ലാം ഷാജി സ്വയം ഏറ്റെടുത്തിരിക്കുകയാണ്.

സംസാരിക്കാനും കേള്‍ക്കാനും കഴിയില്ലെങ്കിലെന്താ... പാചകത്തില്‍ വരെ കേമന്‍!

അഞ്ചല്‍ ടൗണില്‍ സിഐടിയു യൂണിയനിലെ ചുമട്ടു തൊഴിലാളിയാണ് . ലോക്ഡൗണ്‍ പ്രഖ്യാപിച്ചതോടെ ജോലിയില്ല.

വെറുതേ വീട്ടില്‍ ഇരിക്കുന്നതു തീരെ ഇഷ്ടമല്ലെന്ന് ഷാജി ആംഗ്യ ഭാഷയില്‍ പറയും. അടുക്കളയില്‍ സേവനം ചെയ്യുന്നതില്‍ അതീവ സന്തോഷം.

ഒരു മകളുണ്ട്. ഭാര്യയ്ക്കു വിദേശത്തു ചെറിയ ജോലിയുണ്ട്, അവിടെയും മഹാമാരി ദുരിതം വിതയ്ക്കുന്നത് ഷാജി അറിയുന്നുണ്ട്.