മേയ് നാലിന് ലോക്ക് ഡൗൺ പൂർണമായും പിൻവലിക്കില്ലെന്ന് സൂചന. ലോകാരോഗ്യ സംഘടന ഒറ്റയടിക്ക് ലോക്ക് ഡൗൺ പിൻവലിക്കുന്നതിനെതീരെ രംഗത്തെത്തിയ സാഹചര്യത്തിൽ അത്തരമൊരു തീരുമാനത്തിൽ നിന്ന് പിൻമാറുമെന്നാണ് റിപ്പോർട്ട്. ഘട്ടം ഘട്ടമായി നിയന്ത്രണം പിൻ വലിക്കണമെന്നാണ് ലോകാരോഗ്യ സംഘടനയുടെ നിലപാട്.

കോവിഡിനെതിരെ മരുന്നും വാക്സിനും കണ്ടെത്തിയിട്ടില്ല. മരുന്ന് കണ്ടെത്തിയാൽ രോഗം ഭേദമാക്കാം. എന്നാൽ മരുന്നില്ലാത്ത രോഗത്തിന് സാമൂഹിക അകലം മാത്രമാണ് പോം വഴി. അതിന് ലോക്ക് ഡൗണാണ് പരിഹാരം. ഇന്ത്യ ഇക്കാര്യത്തിൽ ലോകാരോഗ്യസംഘടനക്ക് ഒപ്പമാണ്.

സാമ്പത്തിക തളർച്ചയെ തുടർന്ന് ഇന്ത്യയും യു എസും ഉൾപ്പെടെയുള്ള രാജ്യങ്ങൾ ലോക്ക് ഡൗൺ ഒറ്റയടിക്ക് പിൻവലിക്കുന്നു എന്നറിപ്പോർട്ട് ശ്രദ്ധയിൽ പെട്ടതിനെ തുടർന്നാണ് ലോകാരോഗ്യ സംഘടന മുന്നറിയിപ്പ് നൽകിയത്. ഇന്ത്യ ഇത് സംബന്ധിച്ച് കൂടിയാലോചനകൾ ആരംഭിച്ചുവെന്നാണ് റിപ്പോർട്ട്.രാജ്യാന്തര വിമാനങ്ങൾ ഓപ്പറേറ്റ് ചെയ്തു തുടങ്ങിയാൽ കേരളം ഉൾപ്പെടെയുള്ള സംസ്ഥാനങ്ങളിൽ രോഗം വ്യാപിക്കുമെന്ന് രാജ്യം കരുതുന്നു.

യുഎസിലെ ചില സംസ്ഥാനങ്ങൾ ലോക്ക് ഡൗണിൽ നിന്ന് വ്യവസായങ്ങൾക്ക് ഇളവ് നൽകിയിട്ടുണ്ട്. 27000 ജീവനക്കാരുമായി ബോയിംഗ് വിമാന കമ്പനി ഈയാഴ്ച പ്രവർത്തനം ആരംഭിക്കുമെന്നാണ് യു എസിൽ നിന്നുള്ള റിപ്പോർട്ട്.

ഇറ്റലിയും മേയ് 4 മുതൽ ഇളവു നൽകാനുള്ള തീരുമാനത്തിലാണ്. അതേ സമയം സിംഗപൂർ ജൂൺ ഒന്നു വരെ ഭാഗിക ലോക്ക് ഡൗൺ നീട്ടാൻ തീരുമാനിച്ചു. ലോകാരോഗ്യ സംഘടനയുടെ തീരുമാനം വരുന്നതിന് മുമ്പ് തന്നെ സിംഗപ്പൂർ തീരുമാനം എടുത്തിരുന്നു. എന്നാൽ സ്പയിൻ ഇളവ് നൽകാനുള്ള ഒരുക്കത്തിലാണ്. 430 പേർ രാജ്യത്ത് മരിച്ചു കഴിഞ്ഞു. ശ്രീലങ്ക പാർലെമെന്റ് തെരഞ്ഞടുപ്പ് മാറ്റിവച്ചു.

ലോകത്ത് കോവിഡ് ബാധിതർ 25 ലക്ഷം പിന്നിട്ട സാഹചര്യത്തിലാണ് ലോകാരോഗ്യ സംഘടന രംഗത്തെത്തിയത്. ഇന്ത്യാ ഗവൺമെന്റ് ലോകാരോഗ്യ സംഘടനക്ക് വലിയ പ്രാധാന്യം നൽകുന്ന രാജ്യമാണ്. എന്നാൽ അമേരിക്ക അങ്ങനെയല്ല.

ചൈനയോട് ആഭിമുഖ്യം കാണിക്കുന്നു എന്ന ആരോപണം ലോകാരോഗ്യ സംഘടനക്കെതിരെ അമേരിക്ക ഉന്നയിച്ചു കഴിഞ്ഞു. അതിനിടെ കൊറോണ വൈറസ് ചൈനയിലെ വവ്വാലിൽ നിന്നാണ് പടർന്നതെന്ന് ലോകാരോഗ്യ സംഘടന പരസ്യമാക്കി. ഇത് ട്രംപിന്റെ നിലപാടിന് എതിരാണ്.