പൊലീസ് കല്യാണത്തിന് ഓണം വരെ അവധി, കോവിഡ് കാലത്ത് ഡ്യൂട്ടി മുഖ്യം!
തൃക്കുന്നപ്പുഴ കോട്ടോമുറി കുപ്പക്കിടത്തു കിഴക്കതില് വി.അരുണ്കുമാറും മാന്നാര് എണ്ണയ്ക്കാട് രവി ഭവനത്തില് രഞ്ജി രവീന്ദ്രനും ഒരു വര്ഷമായി ഹരിപ്പാട് സ്റ്റേഷനിലെ സിവില് പൊലീസ് ഓഫിസര്മാരാണ്.
സൗഹൃദം പ്രണയമായി മാറിയപ്പോള് വിവാഹത്തിനു വീട്ടുകാരുടെയും സഹപ്രവര്ത്തകരുടെയും പിന്തുണയുണ്ടായി. വിവാഹം വരുന്ന ഞായറാഴ്ചത്തേക്ക് നിശ്ചയിച്ചതായിരുന്നു.
കോവിഡ് കാലത്തെ പൊലീസ് ജോലി മാറ്റിവയ്ക്കുന്നതിനെക്കാള് അവര്ക്കു താല്പര്യം വിവാഹം മാറ്റിവയ്ക്കാനായിരുന്നു. ആ വിവാഹം ഓണത്തിനു നടക്കും. ചടങ്ങ് ലളിതമാക്കി, മിച്ചം പിടിക്കുന്ന പണം മുഖ്യമന്ത്രിയുടെ ദുരിതാശ്വാസ നിധിയിലേക്കു നല്കും
ഞായറാഴ്ച തന്നെ ചടങ്ങ് നടത്താന് മേലുദ്യോഗസ്ഥരുള്പ്പെടെ പറഞ്ഞുനോക്കിയെങ്കിലും ഫലമുണ്ടായില്ല. 'വിവാഹം കഴിക്കാന് അവധിയെടുക്കേണ്ടിവരും. പക്ഷേ, ഈ സാഹചര്യത്തില് ഡ്യൂട്ടിയില്നിന്നു മാറിനില്ക്കുന്നതു ശരിയല്ല.' - ഇരുവര്ക്കും ഒരേ സ്വരം.
എടത്വ സെന്റ് അലോഷ്യസ് കോളജില് നിന്നു ഗണിതശാസ്ത്രത്തില് ബിരുദം നേടിയ അരുണ് 10 വര്ഷമായി സേനയിലുണ്ട്. ചെങ്ങന്നൂര് ക്രിസ്ത്യന് കോളജില് നിന്ന് ഇംഗ്ലിഷ് സാഹിത്യത്തില് ബിരുദാനന്തര ബിരുദം നേടിയ രഞ്ജി സേനയില് ചേര്ന്നിട്ട് 4 വര്ഷമായി.
https://www.facebook.com/Malayalivartha