തങ്ങളെ ക്വാറന്റൈനില്‍ പാര്‍പ്പിച്ച സ്‌കൂളിന്റെ പരിതാപാവസ്ഥ കണ്ട് അതിഥി തൊഴിലാളികള്‍ കെട്ടിടം പെയിന്റടിച്ചു സുന്ദരമാക്കി!
രാജസ്ഥാനിലെ സികര്‍ ജില്ലയിലെ പല്‍സന ഗ്രാമത്തിലെ ഗവണ്‍മെന്റ് സീനിയര്‍ സെക്കണ്ടറി സ്‌കൂളില്‍ 54 അതിഥി തൊഴിലാളികളെ കൊവിഡ് സംശയിച്ച് ക്വാറന്റൈനില്‍ പാര്‍പ്പിച്ചിരിക്കുകയായിരുന്നു സര്‍ക്കാര്‍. ഉത്തരേന്ത്യയിലെ മറ്റുപല ക്വാറന്റൈന്‍ കേന്ദ്രങ്ങളെയും പോലെ അല്ലായിരുന്നു ആ കെട്ടിടം. കട്ടിടങ്ങള്‍ പഴയതായിരുന്നു, താമസിക്കാന്‍ സൗകര്യങ്ങള്‍ പരിമിതമായിരുന്നു എങ്കിലും, ബാക്കി സംവിധാനങ്ങളൊക്കെ ഉഗ്രനായിരുന്നു.
അവര്‍ക്ക് പ്രിയമുള്ള ദാല്‍, ഭാട്ടി, ചുര്‍മ, ജിലേബി, പായസം, പൊരിച്ച കടികള്‍, പൂരി മസാല, ഹല്‍വ, രസഗുള അങ്ങനെ മൂന്നുനേരം സുഭിക്ഷ ഭക്ഷണമായിരുന്നു. ഒടുവില്‍ അത് ഒരു പ്രശ്‌നമാകാന്‍ തുടങ്ങി. ഇങ്ങനെ മൃഷ്ടാന്നം ഭക്ഷണം കഴിച്ചാല്‍ പിന്നെ, എല്ലുമുറിയെ പണിയെടുത്തില്ലെങ്കില്‍ ശരിയാവില്ല അവര്‍ക്ക്. തങ്ങളുടെ തൊഴിലിടങ്ങളിലെ താമസക്കാലത്തൊന്നും തന്നെ അവര്‍ അങ്ങനെ ശീലിച്ചിട്ടില്ല. ആദ്യത്തെ രണ്ടോ മൂന്നോ ദിവസം അവര്‍ മേലനങ്ങാതെ മിണ്ടാതെ കഴിച്ചുകൂട്ടി. എന്നാല്‍ അധ്വാനലേശമില്ലാത്ത സുഭിക്ഷ ഭക്ഷണവും 24 മണിക്കൂര്‍ ഉറക്കവും ഒക്കെ അവര്‍ക്ക് പെട്ടെന്ന് ബോറടിച്ചു.
ആ കെട്ടിടങ്ങള്‍ക്ക് പെയിന്റടിച്ചിട്ട് ഒരു പത്തുകൊല്ലമെങ്കിലും ആയിക്കാണുമെന്ന് അവിടെ അവര്‍ വന്ന ദിവസം തന്നെ ആ സര്‍ക്കാര്‍ സ്‌കൂളിന്റെ പരിതാപകരമായ അവസ്ഥ കണ്ടപ്പോള്‍ അവര്‍ക്ക് തോന്നിയിരുന്നു. പലമുറികളിലും നിലത്ത് എലികള്‍ മാളങ്ങള്‍ തീര്‍ത്തിട്ടുണ്ട്. ചുവരുകളിലുമുണ്ട് സിമന്റടര്‍ന്ന ഭാഗങ്ങള്‍ പലേടത്തും. ബെഞ്ചും ഡെസ്‌കും പലതും ഒടിഞ്ഞിട്ടുണ്ട്. ഒക്കെ കുട്ടികള്‍ കുത്തിവരച്ചിട്ട് ആകെ അലങ്കോലമായിട്ടുണ്ട്.
അപ്പോഴാണ് കൂട്ടത്തില്‍ ഒരാള്‍ ഒരാശയം പങ്കുവച്ചത്. നമുക്കീ ചുവരൊക്കെ ഒന്ന് പെയിന്റടിച്ച് കൊടുത്താലെന്താ? ബെഞ്ചും ഡെസ്‌കുമൊക്കെ വാര്‍ണിഷ് അടിച്ചാലെന്താ? അത് എല്ലാവര്‍ക്കും ആവേശമായി. അവര്‍, ആരോഗ്യപ്രവര്‍ത്തകര്‍ വഴി സ്‌കൂള്‍ അധികാരികളെ കാര്യമറിയിച്ചു. പെയ്ന്റിനും ബ്രഷിനുമുള്ള പണം ടീച്ചര്‍മാര്‍ തന്നെ പ്രദേശത്തെ സുമനസ്സുകളില്‍ നിന്ന് സ്വരൂപിച്ചു. അറ്റകുറ്റപ്പണികള്‍ നടത്താന്‍ ആവശ്യവമായതെല്ലാം തന്നെ തൊഴിലാളികള്‍ക്ക് അവര്‍ വാങ്ങി നല്‍കി.
പിന്നീട് അവിടെ നടന്നത് ക്വാറന്റൈന്‍ ദിനങ്ങളെ എങ്ങനെ ഫലപ്രദമായി വിനിയോഗിക്കാന്‍ സാധിക്കും എന്ന കാര്യത്തില്‍ ഒരു പക്ഷേ, രാജ്യത്തിനുതന്നെ മാതൃകയായേക്കാവുന്ന ഒരു പ്രവര്‍ത്തനമാണ്. അകത്ത് നിര്‍ബന്ധിത ക്വാറന്റൈനില്‍ കഴിഞ്ഞ ദിവസങ്ങള്‍ കൊണ്ട് ആ സ്‌കൂളിലെ എല്ലാവിധ അറ്റകുറ്റപ്പണികളും പൂര്‍ത്തിയാക്കി, കെട്ടിടത്തെ പുതുപുത്തന്‍ ലുക്കിലേക്ക് പരിവര്‍ത്തനം ചെയ്യിപ്പിച്ചു ആ തൊഴിലാളി സംഘം.
തങ്ങളുടെ സ്‌കൂളിന് അവിചാരിതമായി കിട്ടിയ 'മേക്ക് ഓവറി'ല്‍ അവിടത്തെ അധ്യാപകരും വിദ്യാര്‍ത്ഥികളും ഒരുപോലെ ത്രില്ലടിച്ചിരിക്കുകയാണ്. ഇനി സ്‌കൂള്‍ തുറന്നുകിട്ടിയാല്‍ പുതുപുത്തന്‍ സ്‌കൂളില്‍ ഇരുന്നു പഠനം തുടരുമ്പോള്‍ ഈ സ്‌കൂളിലെ കുട്ടികള്‍, അവധിക്കാലത്ത് താമസത്തിനെത്തിയ 'അതിഥി' തൊഴിലാളികള്‍ തങ്ങള്‍ക്ക് നല്‍കിയ സേവനങ്ങള്‍ നന്ദിയോടെ സ്മരിക്കും. അത്രമാത്രം മതിയെന്നാണ് ഈ ഭഗീരഥ പ്രയത്‌നം തങ്ങളുടെ ക്വാറന്റൈന്‍ കാലത്ത് പൂര്‍ത്തിയാക്കിയ അതിഥി തൊഴിലാളികള്‍ക്കും പറയാനുള്ളത്.
സ്‌കൂള്‍ കെട്ടിടം പെയിന്റടിച്ചതിന് ഞങ്ങള്‍ക്ക് ആരും കൂലിയൊന്നും വേണ്ട. ഇവിടത്തെ കുഞ്ഞുങ്ങള്‍ ഞങ്ങളുടെ മക്കളെപ്പോലെയാണ്. ഇവിടെ പഠിക്കുന്ന വിദ്യാര്‍ഥികള്‍ നാളെ അവരുടെ സ്‌കൂള്‍ പെയിന്റടിച്ചു വൃത്തിയാക്കിയ മാമന്മാരെ തെരുവില്‍ വെച്ച് കണ്ടാല്‍ ഒന്ന് ചിരിക്കണം, അതുമാത്രം മതി ഞങ്ങള്‍ക്ക്. ' തൊഴിലാളികളില്‍ ഒരാളായ ശങ്കര്‍ പറഞ്ഞു.
https://www.facebook.com/Malayalivartha
