കൊറോണക്കാലത്ത് സംഗീതവും കരുതലും ഒപ്പം നല്കിക്കൊണ്ട് റേഡിയോ മീഡിയ വില്ലേജ്!
ചങ്ങനാശേരി കേന്ദ്രമാക്കിയുള്ള റേഡിയോ മീഡിയാ വില്ലേജ് ജനങ്ങള്ക്കൊപ്പം നിന്ന് കോവിഡ് 19-നെ പ്രതിരോധിക്കുമ്പോള് തന്നെ അവശ്യം വേണ്ട പ്രോല്സാഹനവും ജനങ്ങള്ക്ക് നല്കുന്നുണ്ട്. രാവിലെ അഞ്ചു മുതല് തുടങ്ങുന്ന പ്രക്ഷേപണത്തിനിടയില്, ജനങ്ങള് പാലിക്കേണ്ട ആരോഗ്യ ശീലങ്ങളും മുന്കരുതലുകളും ഓര്മിപ്പിക്കുന്നതിനൊപ്പം അത്യാവശ്യക്കാര്ക്ക് സഹായങ്ങളും റേഡിയോയിലൂടെ എത്തിക്കാനാണ് റേഡിയോ മീഡിയാ വില്ലേജ് ശ്രദ്ധ പുലര്ത്തുന്നത്.
മാര്ച്ച് 22-ലെ ജനതാ കര്ഫ്യൂവിനു പിന്നാലെ ലോക്ക് ഡൗണ് പ്രഖ്യാപിച്ചതോടെ ഒറ്റയാള് പോരാട്ടവുമായി സ്റ്റേഷന്റെ പ്രോഗ്രാം ഹെഡ് വിപിന് രാജ് കര്മനിരതനായിരുന്നു. അന്നു മുതല് ഇതുവരെ എന്നും പത്തു മണിക്കൂറിലധികം വിവിധ റേഡിയോ പ്രോഗ്രാമുകള് തയാറാക്കി അവതരിപ്പിക്കുന്നതിന് സാധിച്ചതായും ജീവിതത്തില് ആദ്യമായാണ് ഇങ്ങനെയൊരും അനുഭവമെന്നും വിവിന് രാജ് പറഞ്ഞു. പരിപാടികള്ക്ക് സ്റ്റേഷന് ഡയറക്ടര് ഫാ. ആന്റണി ഏത്തക്കാട്ടാണ് നേതൃത്വം നല്കുന്നത്.
അസിസ്റ്റന്റ് ഡയറക്ടര് ഫാ.ജോഫി പുതുപ്പറന്പില്, സെന്റ് ജോസഫ്സ് കോളജ് ഓഫ് കമ്യൂണിക്കേഷന് ഡയറക്ടര് ഫാ.ജോസഫ് പാറക്കല് എന്നിവരും റേഡിയോയില് പ്രോഗ്രാമുകള് തയാറാക്കുന്നുണ്ട്. 18 പേര് ജോലി ചെയ്തിരുന്ന സ്ഥാപനത്തില് ലോക്ക്ഡൗണ് മൂലം ആര്ക്കും എത്താന് കഴിയുന്നില്ല. അഞ്ചുപേര് വീട്ടിലിരുന്ന് പ്രോഗ്രാമുകള് ചെയ്ത് അയയ്ക്കുന്നുണ്ട്.
നിരവധി പേര് ഫോണില് വിളിച്ച് മരുന്ന്, ഭക്ഷണം, സാമ്പത്തിക പ്രതിസന്ധി എന്നീ കാര്യങ്ങള് പറഞ്ഞു കൊണ്ട് സഹായം ആവശ്യപ്പെട്ടിരുന്നു. ഈ പരിപാടി റേഡിയോയിലൂടെ കേള്ക്കുന്നവര് ഫോണ് നമ്പര് ശേഖരിച്ച് ഇവരെ സഹായിക്കാന് മുന്നോട്ടുവന്നു.
മൂന്നാര്, മുണ്ടക്കയം, കട്ടപ്പന, ആലപ്പുഴ തുടങ്ങിയ സ്ഥലങ്ങളില് റേഡിയോയുടെ പ്രക്ഷേപണം ലഭിക്കുന്നുണ്ട്. വിദേശങ്ങളിലുള്ള മലയാളി നഴ്സുമാരും മറ്റുള്ളവരും അവരുടെ അനുഭവങ്ങളും നേരിടുന്ന പ്രശ്നങ്ങളും ഫോണ് മുഖേന റേഡിയോ മീഡിയാ വില്ലേജിലൂടെ നാട്ടിലെ മലയാളികളുമായി പങ്കുവയ്ക്കുന്നുണ്ട്.
https://www.facebook.com/Malayalivartha