ഉത്തര്‍പ്രദേശിലെ ലക്‌നൗവിലുള്ള അഞ്ജനയ്ക്ക് പള്ളിപ്പാട്ടെ അവരുടെ വീട്ടില്‍ എത്തി ശ്രീജിത് താലി ചാര്‍ത്തി. അങ്ങനെ ലോക്ഡൗണ്‍ നിയന്ത്രണങ്ങള്‍ക്കിടയിലും ആ വിവാഹ മുഹൂര്‍ത്തം തെറ്റിയില്ല.

ഇന്നലെ 12.15-നും 12.45-നും മധ്യേ ഓണ്‍ലൈന്‍ വഴിയായിരുന്നു താലികെട്ട്. പള്ളിപ്പാട് കൊടുന്താറ്റ് വീട്ടില്‍ ജി.പങ്കജാക്ഷന്‍ ആചാരിയുടെയും ശ്രീകാന്തയുടെയും മകള്‍ പി.അഞ്ജനയുടെ വിവാഹമാണ് ഓണ്‍ലൈനായി നടന്നത്.

ചങ്ങനാശേരി പുഴവാത് കാര്‍ത്തികയില്‍ നടേശന്റെയും കനകമ്മയുടെയും മകനാണ് വരന്‍ എന്‍.ശ്രീജിത്.

ശ്രീജിത്തിന്റെ മാതാപിതാക്കളും സഹോദരന്‍ സേതുനാഥും കുടുംബവും ഉള്‍പ്പെടെ 7 പേര്‍ മാത്രമാണ് , യാത്രാനിയന്ത്രണങ്ങള്‍ ഉള്ളതിനാല്‍ വിവാഹത്തിനായി പള്ളിപ്പാട്ടെ അഞ്ജനയുടെ കുടുംബവീട്ടില്‍ എത്തിയത്.

മുഹൂര്‍ത്ത സമയത്ത് അഞ്ജന ഓണ്‍ലൈനായി എത്തിയപ്പോള്‍ ശ്രീജിത് താലിചാര്‍ത്തി. പ്രത്യേകം തയാറാക്കി വച്ചിരുന്ന ചരട് ഈസമയം അഞ്ജന സ്വയം കഴുത്തില്‍ കെട്ടി. സീമന്തരേഖയില്‍ ശ്രീജിത്ത് സിന്ദൂരം ചാര്‍ത്തിയതോടെ ചടങ്ങുകള്‍ അവസാനിച്ചു. തുടര്‍ന്നു സമുദായ ഭാരവാഹികള്‍ നല്‍കിയ റജിസ്റ്ററില്‍ വരന്‍ ഒപ്പു വച്ചു.

സദ്യയ്ക്കു ശേഷം ഗൃഹപ്രവേശ ചടങ്ങുകള്‍ക്കായി വരനും കൂട്ടരും ചങ്ങനാശേരിക്ക് പുറപ്പെട്ടു. ഇവരുടെ വിവാഹനിശ്ചയം നവംബര്‍ 6-നായിരുന്നു നടന്നത്.

ലോക്ഡൗണ്‍ വന്നതോടെ ലക്‌നൗവിലുള്ള അഞ്ജനയ്ക്കും കുടുംബാംഗങ്ങള്‍ക്കും വിവാഹത്തിന് നാട്ടില്‍ എത്താന്‍ കഴിയാതായി. ലക്‌നൗവില്‍ ഐടി എന്‍ജിനീയറാണ് അഞ്ജന. ബാങ്ക് ഉദ്യോഗസ്ഥനാണ് ശ്രീജിത്ത്.