ഇതര സംസ്ഥാനങ്ങളില് കുടുങ്ങിക്കിടക്കുന്ന മലയാളികള് ചോദിക്കുന്നു, അതിഥി തൊഴിലാളികളെ നാട്ടിലെത്തിച്ചു മടങ്ങുന്ന ട്രെയിനുകളില് ഞങ്ങളെ കേരളത്തിലെത്തിക്കാമോ?
ഇതര സംസ്ഥാനങ്ങളില് കുടുങ്ങിക്കിടക്കുന്ന ആയിരക്കണക്കിനു മലയാളികള്ക്ക് സര്ക്കാരിനോടും റെയില്വേയോടും ചോദിക്കാന് ഒരേയൊരു ചോദ്യമേ ഉള്ളൂ... 'ഞങ്ങള്ക്കായി പ്രത്യേക ട്രെയിന് ഓടിക്കണമെന്നില്ല. അതിഥി തൊഴിലാളികളെ നാട്ടിലെത്തിച്ചു മടങ്ങുന്ന ട്രെയിനുകളില് ഞങ്ങളെ കേരളത്തിലെത്തിക്കാനുള്ള കനിവു കാട്ടാമോ?' പണമോ ഭക്ഷണമോ താമസസൗകര്യമോ ചികിത്സാ സംവിധാനങ്ങളോ ഇല്ലാതെ പല സംസ്ഥാനങ്ങളിലും മലയാളികള് ദുരിതത്തിലാണ്. മുംബൈ, പുണെ തുടങ്ങിയ നഗരങ്ങളില് കഴിയുന്ന തൊഴിലാളികളുടെ സ്ഥിതി അതിദയനീയമാണ്.
ഓള് ഇന്ത്യ മലയാളി അസോസിയേഷന്റെ കണക്കുപ്രകാരം കേരളത്തിലേക്ക് അടിയന്തര യാത്രാസൗകര്യം പ്രതീക്ഷിച്ച് ചെന്നൈയില് മാത്രമുള്ളത് അയ്യായിരത്തിലേറെ മലയാളികളാണ്. കേരളത്തില് നിന്ന് അതിഥിത്തൊഴിലാളികളെ നാട്ടിലെത്തിക്കാന് ഒഡീഷ, ബിഹാര്, ബംഗാള് തുടങ്ങിയ സംസ്ഥാനങ്ങളിലേക്കു സ്പെഷല് ട്രെയിനുകള് ഓടിക്കുന്നുണ്ട്. ട്രെയിന് കടന്നുപോകുന്ന സംസ്ഥാനങ്ങളില് ഒട്ടേറെ മലയാളികള് കുടുങ്ങിക്കിടക്കുന്നുണ്ട്.
ഭക്ഷണം ലഭിക്കാതെ ദുരിതത്തിലായ 1500-ലേറെ മലയാളികള്ക്ക് ഓള് ഇന്ത്യ മലയാളി അസോസിയേഷന്റെ നേതൃത്വത്തില് ദിവസവും വിവിധ സംസ്ഥാനങ്ങളില് ഭക്ഷണം വിളമ്പുന്നുണ്ടെന്നു ജനറല് സെക്രട്ടറി പി.എന്. ശ്രീകുമാര് പറഞ്ഞു.മുംബൈ, നാഗ്പൂര്, പുണെ, റായ്പൂര്, വിജയവാഡ, വിശാഖപട്ടണം, ഭോപാല്, ഇന്ഡോര്, ലക്നൗ തുടങ്ങിയ സ്ഥലങ്ങളിലാണ് ഏറെപ്പേരും കുടുങ്ങിക്കിടക്കുന്നത്.
https://www.facebook.com/Malayalivartha